کۆدار بە بۆنەو ششەمین ساڵیادوو گەشمەردەبییەی باجوەری و هامڕایاشۆ بەیاننامێوە نویسیاش وەڵا کەردۆ و دلیسەنە داواش جە گرد لاێوە کەردە، پەی پاریزنای و ڕزگاریی ژیوگەی جە هەڕەشاو وێرانکاری، چالاکیی مەدەنی و سیستماتیک بکەرا بە بەشێوە جە ژیوای ڕوانەیشا و پاسە بکۆ
گلێرگەی دیموکراتیک و ئازادیی وەرکەتوو کوردسانی (کۆدار) به بۆنەو ششەمین ساڵیادوو گەشمەردەبییەی باجوەری و هامڕایاشۆ، گەشمەرداو ژیوگەو زاگرۆسی ئەرەیاوناێوەش وەڵا کەردۆ، کۆدار جگە جە ڕێزی و یادوو ئا گەشمەردا، ئاماژەش بە قەیرانە ژیوگەییەکا و هەڵوێستێوە کە مشۆم بگێریۆرە وەر کەرد و واتش:" قەیرانە ژیوگەییەکێ ئانەما فکر موزانێوە،کە پارێزنای و ڕزگاریی ژیوگەی، هەرمانێوە ئەخلاقییە و ئینسانییە و کولتوورییەنە نمەبۆ یەک دەیەقە فەرامۆشە بکریۆ. پی یاواینەی و هۆشیارییەوە مشۆم تا بتاومێ پەی پارێزنای ژیوگەی بەشداریی کۆشیای بکەرمێ، چونکوم بەتەمامی بەسیانۆ بە مەسەلێ پارێزنای ئینسانی و گلێرگەیوە، یادوو گەشمەرداو ٢٤و ئابی و ژیوگەی بەرز و مەبارەک بۆ".
بەیاننامەکەو کۆداری بە نامونیشانوو " جە ڕێبازوو گەشمەردە باجوەری و هامڕایاشۆ زیاتەر جە کەمپەینی، پەنەوازییما بە وەڵێوستەی کۆشیای ئیکۆلۆژیین" ئینەنە:
"ئارۆ ششەمین ساڵڕۆو گیانبەختکەردەی گەشمەرداو ژیوگەپارێزنین زاگرۆسی "شەریف باجوەری و هامڕایاش"ا، کە ٢٤و ئابو ٢٠١٨ینە مەریوانەنە بە پلانەو هێزە ئەمنییەکاو ڕژێمو وئێرانی گەشمەردێ بیێ. پا بۆنەوە گلێرگەی دیموکرتایک و ئازادوو وەرکەوتوو کوردسانی (کۆدار)" جە ششەمین ساڵیادوو گەشمەردەبییەی باجوەری و هامڕایاشنە، بە ڕێز و حورمەتۆ یادوو ئادیشا و سەرجەموو گەشمەرداو زاگرۆسی بەرز مرمانۆ".
"شەریف باجوەر و هامڕێکێش " ٢٤و ئابوو ٢٠١٨ینە پەی پاریزنای دارسانە نەرەکاو زاگرۆسی کە سەرچەمەو ژیوای و هەناسەداینێ پەی گەلی،گیانشا بەخت کەرد. گلێرگەی دیموکراتیک و ئازادوو وەرکەوتوو کوردسانی (کۆدار) جە یەرەمین کۆنگرەو ساڵەو ٢٠٢٠یشنە ئا ڕۆشە بە حورمەتوو کۆشیایەکاو باجوەری و هامڕایاشۆ پێسەو ڕۆو "ژیوگەپارێزنی" و "گەشمەرداو ژیوگە"ی نامێ نیان.
ئیکۆسیستموو زاگرۆسی دڵوو دایوەنەی و بەخشای ژیوای گەلوو وەرکەوتوو کوردسانی و ئێرانین، بێگومان بییەی گەلەکەیما چی ژیوگە بێهامتانە تاوانش بە درێژایی تاریخی بمەنۆوە و بە تێکەڵکەردەی چەنی سرووشتوو زاگرۆسی کولتوورێوە دۆڵەمەندش بە ئینسانی بەخشان و ئارۆ ئانە کە گرگەن ئانەنە کە هەم بییەی زاگرۆسی و هەم گەلوو کوردی و هەم ئا گەلەیە کە چی ژیوگەنە مژیوا،بۆنەو تاڵانکاری و دژایەتیوە چەنی سروشتی لاو ساعیبەکاو سەرمایەداریی ئێرانیوە ئینێ خەتەرنە. زاڵبییەی سەرگوتکەرانە و قۆرخکاریی سەروەت و سامان و دەسەڵات و تەماعەو تێرنەواردەی سیستموو سەرمایەداریی ئێرانی و مۆدێرنیتەی لاڕارەلوا، بیێنێ بایسوو وێرانکەردەی کارەساتباریی ژیوگەیی. لاوازیی ئێکۆلۆژیکی ئێرانەنە بەدڵنیاییوە ئەنجامی کرداری حکوومەتە ناکارامەکاو ئێرانین تارێخی هامچەرخەنە، کە ئینسان و سیستمی ژیوگەییشا پیوە دلێنە بەردێنێ. ئی هەرمانێ کەوتێنە قۆناغێوە فرە ئاڵۆز و خەتەرۆ، ئەگەر نەمردنیۆ ژیوای ئینسانی و ئاژەڵایچ ئێران و زاگرۆسەنە دلێنە بەرۆ. پەوکای ئارۆ گلێرگە و ژیوگە بۆنەو ملەملێ دەسەڵاتداراوە، کەوتێنێ خەتەرۆ، کە پەی ڕزگاریی چا دۆخەی پەنەوازش بە زانستی ئیکۆلۆجی و کۆشیای کۆمەڵایەتیی یۆگێرتەی هەن.
گەشمەردە شەریف باجوەر و هامڕێکێش و بە یاواینەی چی لایەناو ژیوای ئینسانی و بە مەبەسوو پارێزنای ژیوگەو زاگرۆسی دەسشا بە هەرمانێ کەردە، بە ئامانجوو ڕاگیریکەردەی چا پڕۆسە دڕندانەیە،کە دژوو سیستموو ژیوگەپارێزنی زاگرۆسەنە کریا، پێسەو ڕۆڵێوە هۆشیاری و بەهاگاو گلێرگەی و گەلەکەیما کۆشیێ. بەڵام جە پیلانگێلنیدامودەزگا ئەمنییەکاو سیستموو دژە ژیوگەو ئێرانی کریێ ئامانج و گەشمەردێ کریێ، بێگومان ئانێ میراتێوە گەورەشا،پەی نەوەکاو دماتەریشا جیا ئاست. پیلانگێلنیی دامودەزگا ئەمنییەکاو سیستموو دژە ژیوگەو ئێرانی کریێ ئامانج و بە پەرۆشی و هۆشیتایریی زیاتەرۆ پەرە بە زانستوو ژیوگەی بدا و بتاوا ڕاو ڕزگاریی گلێرگەی و ژیوگەی بوێزاوە، جمیەری ڕزگاریوازوو سەردەمی بە گردوو هێز و نەبەزیایشاوە بنیات بنیا. کردەوە فیداییەکاو باجوەری و هامڕایاش بێگومان هۆشداریێوە بێ، جە تەرسەو دلێنەشییەی زاگرۆسی و گلێرگەو ئینسانی.پەوکای هەرچندە ئیکۆ سیستموو زاگرۆسی تەرسیش سەرە بۆ، گلێرگەیچ ئاندە، پەوکای تا دێر نەبییەن و مشۆم هەڵمەتەی کۆشەرانێ گلێرگەی پەی ئازادیی بە جۆشوخرۆشۆ پەرە پەنە بسانمێ.
"گلێرگەی دیموکراتیک و ئازادوو وەرکەوتوو کوردسانی (کۆدار)" جگە جە ڕێزگێرتەی یادوو گەشمەرداو ٢٤و ئابی و جەموو گەشمەردە ژیوگەپاریزنا و بەتایبەت گەشمەرداو پاوەی و لوڕسانی، داوا جە گردوو گردوو گەلی، کرێکارا و چینی هۆشیاری و زەحمەتکێشی مکەرۆ کە چالاکییە سیستماتیکییە مەدەنییەکا پەی ڕزگارکەردەی ژیوگەی کە ئینا دلێنەشییەینە بکەرا بە هەرمانەی ڕوانێشا و چی بوارەوە خەباتی کولتووری پەرە پەنە بدا. ئارۆنە ژیوگە بەگردین و کوردسانەنە و جیهانەنە تەرسیوە فرێشئینا سەرۆ، پەوکای پەنەوازییش بە کۆشیای ڕوانەی و ستراتیژیی هەن. قیرانە ژیوگەییەکێ ئانەما فکر موزانێوە، کە ڕزگارکەردەی و پارێزنایش هەرمانێو ئینسانییە و ئەخلاقییە و سیاسیینە، کە پەی یەک دەیەقەیچ نمەبۆ فکرەما بشۆ. پی هۆشا=یاری و یاواینەیوە با بە گردوو توانایماوە بەشدارێ کۆشیای پارێزنای ژیوگەی بیمێ، کە تەمام بەسیان بە بییەی و پارێزنای ئینسانی و گلیرگەیوە، واوەی یادوو گەشمەردا باجوەری و هامڕایاشا و تەماموو ژیوگەپارێزنا یاد مکەرمێوە".
