عەلی خامنەیی، ڕێبەرو باڵاو ئاینی ئێرانی ڕۆو چوارشەممەی جە پەیامێوەنە واتش: "ئیسرائیل خەڵەتێ گۆرەش کەرد پۆکەی مشۆم باجو خەڵەتەکەیش دۆنە. ونە و گەشمەرڏا و هرووژم و ئیسرائیلی پەی سەر و خاکەکەیما جە یاڏ مەکەرمێ."

هەرپاسە خامنەیی جە ئەرەیاوناکەینە هۆشدارییش دا و واتش: "پەنەوازا ئەمریکا زانۆنە کە ئێران ملکەچ مەبۆنە و ئەگەرو هەر جۆرە هرووژمێ ئەمریکای پەی سەر و ئێرانی، ڕووبەڕوو جوابی  قورسی بۆوە."

بە پاو  ڕاپۆرتە و هەواڵە و ئیرنای، خامنەیی ڕابەرو ئاینی ئێرانی ئەرەیاونانش کە گەلوو ئێرانی هەم وەراوەر و جەنگێوە سەپیا و هەم ئاشتی سەپیا مڏرامان مکەرۆ، پۆکری قەت هەرەشێ چانێ جە ئێڕانی نەکەردێ، وەر و ئانەی گەلوو ئێرانی ملکچ بە هیچ کەسێ مەبۆنە."

خامنەیی جواب و بانگەوازو دۆناڵد ترەمپی، سەرۆکو ئەمریکای کە واتەبێش "بێ مەرج تەسلیمێ بیدێ"، ئەرەیاوناش: "کەسی عاقڵ، ئانەی کە ئێرانی مشناسۆ، میللەتەکەش و تاریخەکەیش مشناسۆ، قەت هەڕەشێ چانێ جە ئێرانی مەکەرۆ، چونکە گەلوو ئێرانی قەت تەسلیم مەبۆ و پەنەوازا ئەمریکییەکێ بزانا کە هەر دەسوەردێوە سەروازی دژو ئێرانی بەدڵنیاییۆ زەرەرێ گۆرەشا پەی وەش مکەرۆ."

ئیسرائیل بە ٢٥ فڕۆکێ جەنگیێ بۆمبوارانش دەس پنەکەرد

هێزو ئاسمانی ئیسرائیلی سەرسەعبو ئارۆی پەی دای وەنە جە ئامانجە سەروازییەکا وەرنیشتوو ئێرانی هرووژمی ئاسمانییشا ئەنجامدا. بە قسێ واتەواچوو سوپاو ئیسرائیلی، نزیکەو ٢٥ فڕۆکێ جەنگیی ئیسرائیلی زیاتەر جە ٤٠ مییانێ مووشەکیێ، کۆگای مووشەکیێ و مییانو سەروازیشا بە ئامانج گێرتەن. هەرپاسە بە درێژایی شەوێ فڕۆکە جەنگییەکێ مووشەکەکێ ئێرانی کە نامێشا "عیماد"ـ هوردان کەردەنشا ئامانج.

فڕۆکەخانەو کرماشانی بۆمبوران کریا

سەرچەمەکێ ئێرانەنە ئەرەیاوناشا کە فڕۆکەخانەو کرماشانی بۆمبوران کریان.