ڕاپیمای گۆرەو ئازاڎیی، کە پۍ ئازاڎیی جەسڎەیی ڕابەروو گەلوو کوردی عەبدوڵا ئۆجالانی. جە دووۍ قۆڵێوە دەسشپنەکەردەن، قۆڵوو قارسی و وانی ڕاپیماو گۆرەی ئازاڎیی جە ١٣و شوباتینە میاوۆ ئامەڎ.

ئەڎایا جە ئێشکگیری دادپەروەرینە پۍ ئاژانسوو هەواڵوو فوراتی (ANF)ی قسێشا کەردە، پۍ ماڕای گۆشەگیری ئاماژەشا بە گرنگی کۊشیای و بەشداریکەردەی جە ڕاپیمای گۊرەو ئازاڎیینە کەرد.

ئامانج جە ڕاپیماکەی دادپەروەری، یەکسانی و مرۆڤایەتییا

مەریەم سۆیلوە ئاماژەش بە گرنگی چالاکیەکەی کەرد و واتش: "من جە بەرۆ سڵام جە مدرامانوو زینڎانیا کەروو. ئێمەیچ جە بەرۆ ئینایمۍ ئێشکگیرینە، ئانەی داواشکەرمۍ ئاشتی و دادپەروەرییا. سیستەم گەرەکشا ئەڎایا بێ دەور کەرۆ، بەڵام ئیتر مەتاوۆ ئەڎایا بێ ئیراڎە کەرۆ. ڕاپیماو وانی فرە گرنگا و ئامانجوو ڕاپیماکەی دادپەرەوەری، یەکسانی و مرۆڤانەن. پۊکەی داواو بەشداری جە گرڎ کەسۍ کەرمۍ. گۆشەگیری تەنیا جە زینڎانەکانە نیا، بەڵکم گۆشەگیری سەروو گرڎوو گەلین، پۊکەی هەتا مسۆگەرکەردەی ئازاڎیی ڕابەروو گەلوو کوردی، جە چالاکی و کۊشیای بەردەوامۍ بیمۍ".

داواو ئازاڎیی بەڕێز ئۆجالانی کەرمۍ

ئەندامەو ڕاوەبەری ئامەڎوو دەبەپەی موشەهر ئولکەرە کە ئینا چنی ئەڎایا ئێشکگری دادپەروەری، ئاماژەش بەگرنگی ڕاپیمای گۆرەو ئازاڎیی کەرد و واتش: "ئەڎایا ڕووانە جە گرڎ یاگێنە ئینۍ ئێشکگیرینە. داواو ئازاڎیی بەڕێز ئۆجالانی کەرمۍ. ئی چالاکیۍ هەتابۍ ۋەرفراوانتەرۍ با. ڕاپیمای ڕاپیماو ئاشتیا و ئامانجش ماڕای گۆشەگیریی و ئازاڎیی بەڕێز ئۆجالانیا".