کۊنگرەو جڤاکوو دیموکراتیکوو کورڎسانییا ئەورووپانە (کەجەدەکە-ئە) ئەرەیاونیاێوە نویسیاش وەڵا کەرۊ و واتش: "دژوو گۊشەگیری و ئەشکەنجەی و نادادی، کە ٢٥ ساڵێن بەرڎەواما، ١٧شوباتینە کۊڵننە سەفەربەرۍ بیمێ. تورکیا و کورڎسان و وەرکەوتوو دلێراسەی بە قۊناغێوە چارەنویسسازرە ویەرا. لێوە کۊکوشی و هەوڵۍ ئەرەگیریی دەوڵەتوو تورکی، لێوە تەرۊ گۊشەگیریی سەروو ڕابەر ئاپۊی، هەرپاسە هجووموو ئەرەگیرکاری وەراوەروو گەلوو کوردی تا مۍ زیاتەر بۊ".

ئەرەیاونایەکە ڕەخنەش وەنەو هەڵوێستوو وەڵاتاو ئەورووپای گێرتەن، کە وێشا بە پارێزنەروو مافەکاو ئینسانی مزانا و وەلۍ بەشدارۍ با جە پیلانگێڵنیینە دژوو ڕابەروو گەلوو کوردی عەبدوڵا ئۊجالانی. وەراوەروو ڕابەروو گەلوو کوردی عەبدوڵا ئۊجالانی گرد پیمەرە میاننەتەوەییەکا پاشێلۍ کەرا و سیستمێوە ئەشکەنجەیش سەرەرە سەپییان.

ئەرەیاوناش دەوڵەتوو تورکی دوورگەو ئیمراڵیینە گردوو پیمەر و بەها گەردوونییەکا پاشێلۍ کەرۊ، چی سیستمەنە حیچ ماف و دادوەریێوە نییا، وەرپەرسبییەیەکەی گنۊ گەرڎەنوو کۊنسەو ئەورووپای و سی پی تی.

ئاماژە کەرا کە دەوڵەتوو تورکی هجووم کەرۊ سەروو گەلوو کورڎسانی و چەکی کیماوی بەکار مارۊ، وەلۍ گەلوو کورد بەرڎەوام ڕابەروو گەلوو کوردی عەبدوڵا ئۊجالانی پێسە ڕابەروو وێش قبووڵ کەرۊ، ماچۊ: "چەنی ماندێلا پانیشتوو ئەفریقاینە هێزوو چارەسەری شکۊداری بۍ، عەبدوڵا ئۊجالانیچ تورکیانە هێزوو چارەسەروو پەرسەو کوردین، نوێنەروو کۊشیای دیموکراسی و ئازاڎیی گەلوو کوردین".

بانگەواز جە سی پی تی و کۊنسەو ئەورووپای و نەتەوە یۊگێرتەکا کەرا دمایی بە سیستموو ئەشکەنجەو ئیمراڵی بارا.

ماچا: "سڵام کیانمۍ پەی ئەنتەرناسیۊنالیستا پەی ڕاپیمای گەورەو ئەورووپای و ١٧شوباتی سەفەربەریشا دەس پەنە کەرد و ژنێڤۊ تا ستراسبۊرگ ڕاشا پیما، هەرپاسە پەی ئا ڕاپیمایە ئەڵمانیاوە گەنجا دەس پەنە کەرد و ٢٥ ڕوێن فەرەنساوە دەسش پەنە کەرڎەن".

ئەرەیاوناش هەڵمەتەو ئازاڎیی میاننەتەوەیی قەوەتتەرە کەرا و پیلانگێڵنیی ١٥ شوبات پووچەڵ کەراوە.

ئاخرۊ ماچا: "پێسە کەجەدەکە-ئەی داوا جە تەماموو گەلەکەیما و دۊسەکاما و دیموکراتیکا و شۊڕشگێڵنا و ڕۊشنویرا و ژەنۍ و زارۊڵەی و گەنجا و کەسە بەتەمەنا کەرمۍ بەشدارۍ با جە ڕاپیمای کۊڵنینە، کە ١٧ شوباتینە دەس پەنە کەرۊ. بە ڕۊحوو سەفەربەرییوە جوابێوە تنڎ مدەیمێوە هێزە پیلانگێڵنەکا".

ڕاپیمایی گەورەو ١٧ شوباتی گرنگیێوە تارێخییش هەن، چی ڕاپیمایەنە یۊ گێرمۍ و کۊشیەیمۍ وەراوەروو سیستموو ئەشکەنجەو ئیمراڵی و بەرزتەرش کەرمێ".