هامسەرۆکایەتی کۆنسەو ڕاوەبەری کەجەکەی پەیوەس بە هرووژمە دڕندەکێ دۆڵەتو تورکی و چەتەکاش سەرو گەلا سەرنیشتوو و وەرکەوتوو سووریای ئەرەیاونێوەش وەڵا کەردۆ و ئاماژەش پانەیەدا مشۆم بە گرڏ شێوێ ئی هرووژمە ئەرەگیرا شەرمەزار کریانە و بەڕیزدارییۆ یاڏو گەشمەرڏا مڏرامنو بەندواو تشرینیش کەردۆ.

ئەرەیاوناکەو کەجەکەی بی جۆرە بێ:

"چنی وڕاو ڕژێمو سووریای، دۆڵەتو ئەرەگیری تورکی هرووژمە ئەرەگیرییەکێش زیاتەر کەردێ و هرووژمش کەرد پەی سەرو بەنداو تشرینی و سردەو قەرەقۆزاقی. دۆڵەتو تورکی هرووژم مکەرۆنە سەرو خەڵکی مەدەنی- کە ملانە پەی پارێزناو بەنداو تشرینی. ئەرەیاویا جە هرووژمەکێ ئی دماییا کە بە فڕۆکە کریێنێ سەرو خەڵکو مەدەنی، ٦ کەسێ ژیوایشا جە دەسدان و بە دەیان تەرێ زامڏارێ بیێنێ. بە تنی ئی ئەرەگیرکارییەو دۆڵەتو تورکی و ئی هرووژمە نامرۆڤانێشە شەرمەزار مکەرمێنە. بە ڕێزداریی گەشمەردا تشرینی یاڏ مکەرمیوە کە گیانو وێشا کەرد سەنگەر و وڵاتو وێشا جە ئەرەگیرا پارێزنا. ئاڏێ گەشمەردێ گەلا کوردەسان، وەرنیشتوو، سەرنیشتوو و وەرکەوتوو سووریاینێ. مەرجی هەرە بنەڕەتی دڵسۆزی بە گەشمەرڏا و وڵاتپارێزا ئانەن کە مرۆڤ سەرو ڕێشا بەردەوام بۆنە و بەردەوامی دۆنە بە تەمامکەردەو ئەوەکۆشایشا. گەلا سەرنیشتوو و وەرکەوتوو سووریای سەرەڕاو هرووژمەکا بە بێ تەرس ملانە تشرین و دڵسۆزی وێشا نیشانە مرانە. هونەرمەندی شانۆکار جوما خەلیل (تاتەو تایەر)ی کە بە وەشەویسیۆ دلێ گەلو کوردینە ئشناسیابێ، چی هرووژمانە ژیوایش جەدەسدا. جوما خەلیل ماوێوە وەڵێ گەشمەرڏە بییەیش واتەبێش، 'چنەتا مەتەرسمێنە، قوربانی هەرچی بۆنە گرنگ نییا و جە مڏرامانەنە بیمێ' و بی بەربڕییەو وێش هەڵوێسو گەلو کوردی، گەلا سەرنیشتوو و وەرکەوتوو سووریاییش نیشانەدا. بە ڕێز و پنەزانایۆ یاڏ مکەرمێوە و جە ئاستشەنە سەرەما منامنمێرە. گەلا سەرنیشتوو و ڕۆژ‌وەرکەوتوو سووریای مشۆم بەردەوامێ بانە جە لوایشا پەی بەنداو تشرینی و بە بەهێزییۆ خاوەنداری جە گەشمەرڏەکاشا کەرانە. مشۆم گرڏو هێزە دیموکراتیکوازەکا و بە تایبەت گەلو وڵاتپارێزو کوردەسانی پشتیوانی بەهێزو گەلا سەرنیشتوو و وەرکەوتوو سووریای بانە، جە گرڏ یاگێنە هرووژمەکێ دۆڵەتو تورکی و چەتەکێ SNA شەرمەزار کەرانە و جە وەراوەرو هرووژ مەکانە هەڵوێسی بەهێز نیشانە دانە. بانگەواز جە گرڏ کەسێ مکەرانە سەرو ئی بنەمێ ناڕەزایەتیی بەهێز نیشانە دانە و هەڵوێس هورگێرانە.

دماو ٧انەی ڕژێمو بەعسی وڕا، هیواو ئانەی درووس بی جەنگ جە سووریانە دمایش بێ، سووریایێ دیموکراتیک ژیواو یەکسانی گەلا سەرجەنۆ بونیاد نریۆنە. جە دۆخێوە چی جۆرەنە هرووژمەکێ دۆڵەتو تورکی و چەتەکێ SNA جە دژو ئی هیوا و حەسرەتەو گەلا ئەنجام دریۆنە. دۆڵەتو تورکی پەی ئانەی سووریایێ دیموکراتیک نەمەزیۆرە هرووژمێ مکەرۆنە. پۆکەی گرڏو ئا کەسا لایەنگرو سووریایێ دیموکراتیک و یەکپارچەیی سووریاینێ، مشۆم ئی مەترسیا وینانە و جە دژو هرووژمەکا مدراوە. هرووژمەکێ دۆڵەتو تورکی و چەتەکێش SNA بەشێوێوە ئاشکرا پاشێلکەردەو یاسای مییاننەتەوەیی و سەروەری گەلا سووریاین. ئی هرووژمێ جە گرڏ ڕەهەندێوەنە ناڕەوانێ، ئەرەگیرکاری و کۆمکووژیین. سەرەڕاو گرڏو ئینیشا بێدەنگی و نەویناو ئی هرووژما یاگێ قبوڵ کەردەی نییا. نەتەوە یۆگێرتەکێ و یۆبییەی عەرەبی کە سووریا ئەندامشانە، هەرپاسە هێزەکێ هامپەیمانی جە سووریا بۆنە جە وەراوەرو هرووژمەکێ دۆڵەتو تورکی و کۆمکوژییەکێ ئیتر بێدەنگێ نەبانە و هەڵوێس هۆرگێرانە