کەجەکە ئا کەسېشە ۋیرئارڎېوە کە جە کۆکوژی ئەنقەرەینە ژیۋایشا جە دەستدابۍ، حەرپاسە ئەرەیاۋناش، هێزە دیموکراتیکە شۆڕشگێڵەکۍ خۊتان ئا ئەرکەنۍ کە جە دژوو فاشیزمی ئاکەپە-مەهەپەی یۊبیەی دیموکراتیکی و واڵە و برایەتی گەلا بەقوەتتەر کەرڎۍ.
هامسەرۆکایەتی دەسەی ڕاوەبەری کۆما جڤاکێن کوردسان (کەجەکە) کۆکوژی ١٠و تشرینی یۋەم و ٢٠١٥و گاری ئەنقەرەی کە جە لایەن و دەوڵەتوو تورکیوە و جەڕاو داعشیوە کریا، جە هەشتەم ساڵیاڎشەنە شەرمەزار کەرڎ و گەشمەرڎا دیموکراسی و ئاخېزیش ۋیرئارڎۍ.
هامسەرۆکایەتی ئەرەیاۋناش، کە هۆشمەنڎی و نزیکایەتیېوە بنەڕەتی کە فاشیزمی بەقوەت کەرۊ ئا مرۆڤېنۍ کە جە بەروو سیستمیۊ ۋینیا، بەڵام مەتاوا چنەش بڕیارە و ئەرەیاۋناش، "فرە گرنگا کە هێزە دیموکراتیکە شۆڕشگێڵەکۍ جە ۋەران ۋەروو ئا ئەقڵیەتەینە کۊشیانە، رێکوستەی و یۊبیەی دیموکراتیکی راستەقینەو گەلا خوڵقنا. دڵسۆزی بە یاڎ و کۊشیای گەشمەرڎا، ڕاو جابەجېکەرڎەی ئینەینە".
ئەرەیاۋناکەی پی جۆرەنە
"جە ١٠و تشرینی یۋەموو ٢٠١٥ینە پارتوو دیموکراتیکی گەلا، ژمارېوە فرە سەندیکا، رێکوزیۍ مەدەنی، رێکوزیۍ جەماوەری دیموکراتیک گلېرۊبیەی ڕەنجی، ئاشتی و دیموکراسیشا سازکەرد، بە دەیان هەزار کەسۍ بەشدارییشا چنە کەرڎ، بەڵام جە ۋەران ۋەروو ئا گلېرۊبیەینە هجوم و کۆکوژی گەورە ئەنجامدریا. جارېوەتەر بە توڕەیېوە گەورۊ ئا کۆکوژیەیە شەرمەزار کەرمۍ، ئانۍ جە کۆکوژیەکەنە گیانشا جە دەسدا بە رێزوو پنەزانایۊ ۋیرمارمېوە. جە کەسایەتی ئاڎیشانە گەشمەرڎا دیموکراسی و ئاخېزی جارێوەتەر یاڎ کەرمېوە و وەعد واوەی کەرمېوە کە دڵسۆزۍ یاڎوو ئاڎیشا بیمۍ.
ئێمە شاڎیی ئاڎیشا گەورەتەر کەرمۍ
چنی ئېشەکا ئا کۆکوژیە، تاسە و حەزوو ملۋېنان ئینسانا کە جە مېڎانەکانە نیشانەدریا، جە دڵمانە هۊرگېرمۍ. ئاڎۍ بۊنەو واڵە و برایەتی گەلانە، پۍ پېوەرە ژیۋای و یۊبیەی دیموکراتیکی گەلوو کورڎی و گەلا تورکیاینە، پەی تورکیایۍ دیموکراتیکی و کوردسانێوە ئازاڎیی کۊشیۍ. پا داواکارییۊ ئا ڕووەی مجیېرە مېڎانەکا بە زەماۋنە و گۆرانیۍ داواو ئاشتی، واڵە و برایەتی و یەکسانیشا کەرڎ. ئەرکوو ئێمەن کە ئا مەراسیمەو ئاڎیشا گەورە کەرمۍ، گۆرانی واڵە و برایەتی و ئازاڎیی بە دەنگێوە بەرزتەر ماچمېوە، ئێمە ماچمۍ کە بە دڵنیاییوە ئانەی پېکمارمۍ.
جە چوارچێوەو پلانەو ئاکەپە- مەهەپەینە ئەنجامدریا
ئا هجومە بی بە مەڵامەتوو یۊ جە گەورەترین کۆکوژیەکا تاریخوو تورکیای کە جە چوارچێوەو پلانەکا وڕناینە کریا. پېسە کۆڵەکە سەرەکیەکا ئەرەمەرزناو فاشیزمی ئاکەپە-مەهەپەی هجوم و کۆکوژی پی جۆرە پلانکریا و جابەجۍ کریا. جە ڕاو کردەوە خراپەکاوە چارەسەری دیموکراتیکی پەرسوو کورڎی، چارەسەروو قۊرتە بنچینەییەکا، بنیاڎنیای ژیۋایۍ دیموکراتیک و ڕۊشنکەرڎەیۊ تورکیای ڕاش ۋنە گیریا، بە داخۊ وەڵۍ جابەجېکەرڎەی ئانیشانە تورکیا سەرجەنۊ بەرەو قۆناغێوە تاریک پەلکێش کریا. ئامانج جە هجومەکەو گاری ئەنقەرەی و هجوم و کۆکوژیەکا جە مەنتیقەکا تەری ئانەبۍ. ئانۍ گرڎ بە دەسوو دەوڵەتی و دەسەڵاڎداری ئەنجام دریۍ.
ئانەی داعش نەتاواش کەرۊش، خودوو ۋېش کەردش
ئا مامەڵە کەرڎەیە داعشی پېسە ۋەرپرسیاروو کۆکوژیەکەی نیشانە مڎۊ، هۊرخەڵەتناین. ئانەی کۆکوژیەکەش کەرڎ خودوو دەوڵەتی بۍ ، ئاکەپەو مەهەپە بېنۍ. جە لاو گرڎ لایېوە زانیان کە داعش جە ئەوەڵۊ چېروو کۆنتڕۆڵوو دەوڵتی و ئاکەپەینە بۍ، داعش پلانەکا ئاکەپە-مەهەپەی جا بەجۍ کەرۍ. داعش مەژگ و رێبازەکا ۋېش جە دەسەڵاڎداری ئاکەپە-مەهەپەی هۊرگېرتەن، پۍ جابەجېکەرڎەی ئامانجەکاش ئاڎ کەوتەن جموجوڵۊ. مەژگوو داعشی مەژگوو دەسەڵاڎداری ئاکەپە-مەهەپەی فاشیستیا. ۋېش جە ۋېشەنە دماو ئانەی داعش جە ڕاو کۊشیای هێزە دیموکراتیکە شۆڕشگێڵەکا و گەلاوە دلېنەبریا، دەسەڵاڎداری ئاکەپە-مەهەپەی دەسش پانەی کەرڎ کە ئانەی داعش نەتاۋاش کەرۊش، خودوو ۋېش ئەنجامش بڎۊ. ئا راسیە ئارۊ فرە عالتەر ۋینیۊ و درکش پنەکریۊ. بەتایبەتی هجومەکۍ سەروو ۋەرنیشتی، گرڎوو کردەوۍ و هجومەکۍ دەسەڵاڎداری ئاکەپە-مەهەپەی ئا راسیە نیشانە مڎا.
ئانۍ کە جە بەروو سیستمەکەیۊ مەناوە مەتاوا چنەش بڕیارە، فاشیزمی بەقوەت کەرا
حەر کار و کردەوېوە دەسەڵاتوو فاشیستی ئاکەپە-مەهەپەی، دژایەتیی کەرڎەی واڵە و برایەتی گەلان، دژایەتیکەرڎەی پېوەرە ژیۋای و دیموکراتیزەبیەو تورکیاین. حیچ قسۍ و پراکتیکێوە جە بەروو ئا ڕاسیۊ نییا. ۋیرکەرڎەیۊ پێچەوانەو ئانەی، نیشاندای بڕۍ کرڎەوێ دەسەڵاتوو ئاکەپە-مەهەپەی بە شێۋېوە دروس، بە ماناو درێژەدای بەهەمان ڕاو فاشیزمین. بەتایبەت ئانۍ ئینۍ دلۍ سیستمینە، پاسە بەرش وزا کە ئینۍ بەروو سیستمیۊ، بەڵام مەتاوا چنەش بڕیارە، حۊڵ مڎا هجومەکا دەسەڵاتوو ئاکەپە-مەهەپەی جە دژوو گەلوو کورڎی پا جۊرە نیشانە بڎا. ئانە ئا ئەقڵییەت و مامەڵە بنچینەییەنە کە فاشیزمی بەقوەت کەرۊ. فرە گرنگا هێزە دیموکراتیکە شۆڕشگێڵەکۍ دژوو ئا ئەقڵییەتەیە کۊشیای، ڕێکوستەی، یۊبیەی و یەکڕیزی دیموکراتیکی ڕاستەقینەو گەلا خوڵقنا. ڕاو بەدی ئارڎەی ئانەیچ وەفاڎاربیەین بە یاڎ و کۊشیای گەشمەرڎا.
ئەرکوو بەقوەتکەرڎەی یۊبیەی دیموکراتیکی گەلا
چی چوارچێوەنە ئێمە کۆکوژیەکەی جە هەشتەم ساڵیاڎشەنە جارێوەتەر شەرمەزار کەرمېوە، مشۊم بزاندۍ کە ئەرکوو ئێمەن دژوو فاشیزمی ئاکەپە-مەهەپەی یۊبیەی دیموکراتیک، واڵە و برایەتی گەلا زیاتەر بەقوەت کەرمۍ و کۊشیای بەرزکەرمېوە. مشۊم ئێمە بە ئەنەیاوایۊ مامەڵە کەرمۍ. ئا ئەرک و وەرپرسیاریە تاریخیەی بە هێزە دیموکراتیکە شۆڕشگێڵەکاش مڎۊ ئینەنە".
