رۊدیارو ئارۊ دۋە شەممەی ٢٠٢٣/٠٢/٢٧ی، جە بارەگاو راۋەبەری ناحیەو خورماڵ-ی، ئەندامۍ کەمپەینو بەقەزاکەردەی خورماڵ-ی چەنی ئیدارەو ناحیەکەی و ئیدارەو پارێزگاو هەڵەبجە-ی کۆبیێوە.
ئامانج جە کۆبییەکەی دواکاری بۍ پەی بە قەزاکەدرەی خورماڵی.
جە کۆبیەکەنە کە راوەبەرو خورماڵی و پارێزگارو هەڵەبجەی ئامادێش بیۍ، بڕیار دریا بە فەرمی داواکاری بە قەزاکەردەکەی بدریۆن بە حکومەتو هەرێمو کوردستانی.
جە دمای کۆبیەکەی، جە کۆنگریۋی رۊچنامەۋانیەنە، ئازاد تۆفێق، پارێزگارو هەڵەبجەی باس جە گرنگی تاریخیی و شۆنەۋاریی، ئیداریی و گەشتوگێڵیی شارو حورماڵ (گوڵعەنبەر)ی کەرد و پەشتیوانی وێش و ئیدارەو پارێزگاو هەڵەبجەی پەی بە قەزاکەردەی خورماڵی نیشانەدا.
خورماڵ نزیک بە ٢٥ هەزارۍ ئەرەنیشتێش هەنۍ و شارێۋی فرە دێرینەن و سەرەڕاو ناوەندو شارەکەی، ٤٦ دەگایۍ هەورامانی و شارەزووری جەوێش مگێرۆنە و ناوچێۋی گاڵیاری، باغداری، گەشتوگێڵی و مەرزی فرە گرنگەن.
خورماڵ جە پانیشتو کوردستانی هامسنورەن چەنی ناحیەکۍ بیارۍ، سیروان، ناڵپارێزی، ناوەندی هەڵەبجەی و هەرپاسەقەزاو سەیسادقی. جە وەراسانو کوردستانیچەوە هامسنورەن چەنی هەورامانو شامیانی.

خورماڵ وەڵتەر نامێش گوڵعەنبەر بییەن و زووتەریچ جە سەردەمەکاو مەکەدۆنی و ساسانییەکانە نامێش نیم ئەزرا بییەن. جە ئاسەوارە گرنگەکاش، شورا و قەڵاکێشەنە کە مێژووێۋی فرە کۆنشا هەن. شوراکە ٩ کیلۆمەترۍ درێژەن و بەشێۋازی بازنەیی دەورو قەڵاکێش دان. هەرپاسە کەندەک (خەندەق)ێو ئاۋۍ بەدرێژایی ١٣ کیلۆمەترا جە دەور تا دەورو قەڵا و شوراکێشەنە دریان ونە.
هەرپاسە مزگی گەورەو شاری کە دروستکەردەیش پەی زیاتەر ١ هەزاری ساڵۍ جەی وەڵەتەری مەگێڵۆنەوە و یاگێوە گرنگەی ئاینیەن و سەردەمانێۋ مەدرەسێۋی ئاینی نامی هەورامان، کوردستان و هەرێمەکەی بییەن.
هەرپاسە گەڕاوەکێش کە چارەسەگایێۋە سروشتیەنە و تاف و سەرچەمەو زەڵمی جە سەیرانگایە گرنگەکاشەنۍ و ساڵانە دەیان هەزار گەشتیارۍ سەردایشا مکەرانۍ.

بەشێ جە ۋێنەکا/ هەورامان نیوز