کەنەکە جە دژو هرووژمەکا دۆڵەتو تورکی ئەرەگیری پەی سەرو سەرنیشتوو وەرکەوتوو سووریای کاردانەوەش نیشانەدا و داواش جە هێزە مییاننەتەوەییەکا کەرد ڕاگیری جە هرووژمە دڕندانەکاو دۆڵەتو تورکی بکەرا.
کۆمیتەو ڕاوەبەری کۆنگرەو نەتەوەیی کوردەسانی (کەنەکە) جە دژو هرووژمەکا دۆڵەتو تورکی ئەرەگیری سەرو سەرنیشتوو و وەرکەوتوو سووریای ئەرەیاونێوەش وەڵا کەردح و داواش جە هێزە هامپەیمانەکا جە هەرێمەکە، نەتەوەیۆگێرتەکا و، ئەمریکا و گلێرگەی مییاننەتەوەی کەرد کە هرووشمەکا دۆڵەتو تورکی مدرنانە وەرپرسیارێتی وێشا هورگێرانە.
جە ئەرەیاوناکەو کەنەکەینە ئامان: "جە یوەم ڕۆو دەسپنەکەردەو ڕووەدایەکا جە سووریانە دۆڵەتو تورکی ئەرەگیرو و چەتەکاش، هرووژمو هەرێمەکا چێر دەسو قەسەدەیشا کەرد. ئامانجو دۆڵەتو تورکی ئەرەگیری تەمامو سەرنیشتوو و وەرکەوتوو سووریاین و دلێنەبەردەو دەستکەوتەکا گەلوو کوردین. دۆڵەتو تورکی چنی هرووژمەکاش دەسوەردای جە سووریانە مکەرۆنە و هەوڵمرۆنە جە تەمامو هەرێمەکا دەسەڵات بنیۆرە.
بێدەنگی گلێرگەو مییاننەتەوەیی جە دژو مرۆڤاییەتی
تورکیا گرڏو هێزە سەروازییەکاش، سیاسی و دیپۆلۆماتیکەکاش سەفەربەر کەردێنێ. بە هەزاران سەروازێش هەرێمەکەنە نییەنێرە، بە گرڏ جۆرە چەکێ، فرۆکە، درۆن، تانک و تۆپ هرووژمو گەلوو کوردی مکەرۆ و مەدەنییەکا بە ئامانج گێرۆنە. بە پاو ئەرەیاوناکەو قەسەدەی جە حەفتەکا ویەردەینە ٣٨ مەدەنیێ کە زاڕۆڵێ، ژەنی، ڕۆنامەنوویس و هونەرمەندێش چنە بینه گەشمەرڏێ کریێ. دما جار فرۆکەی جەنگی هرووژمش کەرد سەرو سرینی و ١٣ کەسێ گیانشا جە دەسدا و فرێش زامڏارێ بیێ. جە هەمانکاتەنە هرووژمش کەرد سەرو شارۆچکەو زرگانی و چنین مەدەنیش گەشمەرڏێ کەردێ.
دۆڵەتو ئەرەگیری بە هرووژمەکاش گرڏو یاسا و پەیماننامە مییاننەتەوەییەکا جە دژو مرۆڤایەتی پاشێل مکەرۆ و جەنگەکەی جە هەرێمەکەنە وەرفراوان مکەرۆ. بەنداوی تشرینی و سردەو قەرەقۆزاقی بە ئامانج گێرۆنە، هرووژمەکێش جە تەمامو هەرێمەکا سەرنیشتوو و وەرکەوتوو سووریای و وەرنیشتوو کوردەسانی بەردەوامێنێ. جەهان و هامپەیمانانی مییاننەتەوەیی و نەتەوەیۆگێرتەکێ جە وەراوەرو ئی هرووژمانە بیدەنگێنێ.
مشۆم هامپەیمانا مییاننەتەوەیی دەمودەس ڕا چی هرووژمە دڕندانا گێرۆنە
پەنەوازا هامپەیمانی مییاننەتەوەیی زانۆنە، ئەر مەبەس و ئەرکەکەی جە دژو تیرۆرو داعشی جەنگ مکەرا، ئی گروپێ کە چێرو دەسەڵات و هامکاری دۆڵەتو تورکی دژو هێزەکا قەسەدەی و کوردا جەنگ مکەرا، هەمان زیهنیەتو داعشی و جیهادیستەکاشا هەن.
بییەو ئی چەتا تەرسی سەرو ئاسایشو هەرێمەکەی وەش مکەرا، هەمان هەڕەشێ سەرو ئاسایشو جەهانینە وەش مکەرا. هەر پۆکەی ئەرکو هامپەیمانا مییاننەتەوەییا کە دەمودەس بە ئەرکو وێشا هورزانە و وەڵێ چی هرووژمە دڕندانا گێرانە.
هیواو خەڵکو هەرێمەکەی ئانەن کە هێزە هامپەیمانە مییاننەتەوەییەکا، نەتەوەیۆگێرتەکا، ئەمریکا و جەهانی مەیدانی دەمودەس دمای بە بێدەنگی بارانە و بە ئەرکو سەرەکی وێشا ئەرەپڕاو وەڵێ جە هرووژمەکا دۆڵەتو تورکی ئەرەگیری و چەتەکا گێرانە.
خاڵەی هەرە گرنگە ئانێنە کە گەلوو کوردی و دۆساشا بە ئیرادێوە بەهێز و بە ڕۆحو سەفەربەر خاوەندارێتی جە بییەو وێشا کەرانە و پەشتگیری هێزەکا قەسەدەی کەرانە".
