بڕێو سەرچەمۍ نویسیاریۍ و کتێبۍ دلۍ ئەدەبیاتوو وەڵاتا هەنۍ جیاکار جە تەشک و دیامانیوی زانشتی و ڕێکوپێکی کە هەنشا هەتا جە نویستەیشا ویەرۊ فرەتەر ئێژایی و پیتشا گنۊوە سارا چووک هۊرگیرۍ پاشەکەوتیوی ئاڵتوونیەنۍ و پارێزنەرۍ بەشیوی فرە جە فولکلۊوروو ئانیشتگایەنۍ.فولکلۊرێو کە دلۍ وێشەنە جەهانێو قسۍ، مەتەڵۍ، ئەفسانۍ، ڕازۍ، لایەلایەو ئەدٚای، ویەرینیوی دەمواچ و….ئا نەتەوەیشە شاراینێوە و دەم بە دەم خەڵکیوی بەبەینەتی پارێزناینۍ و نویسەر، پەیجۊرکار و دڵسۊچنیوی خەمەوەرش گەرەکا ئا خەزێنەیە دەموو کۊمەڵگایەوە بژنەڤۊ، بنویسۊشاوە و تۊمارێشا کەرۊ.

"پێسە فرەو هەرمانە نەکەرڎٚەکاما دێر دەسما دان ئی کاریەوە"

ماوێوی فرەن ئەدەبیاتە گەورەکاو دنیایەنە هەمیەتوو ئی هەرمانۍ کەوتەنەوە سارا و پیویان پەی نویسەرەکاشا یانەو فەرهەنگ و ئەدەبیاتوو وەڵاتیشا پا پاشەکەوتیەوە بەنندٚا. گلێرەوە کەرڎٚەی فولکلۊری پێسە ئەرکیوی نەتەوەیی بریان ڕاوە و هەروەرەنە ئەدەبیاتەکۍ دەوروپشتیچما هەر چا تەشابیەوە دیاینێنە ئا باخە وەرەچەم وەش و ئەوەڕازیایە، دەسشا کەرڎٚەن کەل وکار گێرتەی و نەماینۍ لۊسۍ پەی هۊربڕنایش.گازرەو ئی هەمیەتیە ئێننە لاو پەیجۊرکەراوە قایما کە سەروو فولکۊروو وەڵاتەکاتەریچەوە هەرمانەشا کەرڎٚێنە و کەرا پەی نموونەی یان ریپکا نویسەر و لەیەکەوەدەری گەورەو وەڵاتوو چێکی ساڵۊ ۱۹۵۶زایینی کتێبێو سەروو فولکلۊروو ئێرانی بە زوانی چێکی منویسۊ. بەداخێوۍ گرانەوە مشیۊم واچوو هەورامانەنە پێسە فرەو هەرمانە نەکەرڎٚەکاما دێر دەسما دان ئی کاریەوە، چێوۍ ئەنتیکۍ فرێما بە فەوتیای بەشەرە بەئاوەزەکاما لواینۍ چێروو هەمارێو خوڵۍ.

داخۊم چن ڕازۍ، ئەفسانۍ، مەتەڵۍ، باوەڕۍ و هۊرزەوئەرەنیشتۍ کە چن هەزار ساڵۍ چیەو وەڵۍ بیێنۍ بە باو و خەڵک تخوونشا کەوتەنەوە وەروو ئەوەنەپەرسای زەمانوو ئێمەنە دلێنە شیێبا.تا وەڵۍ ئێمە هەورامان ئامەشۊش نەکریان پەوکەتی فاکتە فەرهەنگیەکێش پارێزیاینۍ و ئەوەجەش بە تۊمار کەرڎٚەیشا نەبیەن بەڵام ئیسە دێهاتە جەهانیەکەو مارشال مەک لووهانی ئامان وەرەوە، فەرهەنگە هازدارەکۍ بە یاوەری یاونەرە کۊمەڵایەتیەکا و میدیا جەهانیەکاشا چەم ترووکنی فەرهەنگیوی بۍ هازی گێج ئاڤۊ وێشانە نقم کەرا، بە سەرەنج دای پی نوونگە کاریگەرێوە موازۊ فولکۊروو ئێمەیچ بنویسیۊوە و پارێزیۊ.وەڵاتێو کە بۍ هیچ شکێوە متاوی واچی بێشکەو شارستانیەتی بیەن وەروو تۊمار نەکەرڎٚەی، خدٚۍ نەدٚای بە نویستەی و نویسیاری نەکەرڎٚەی خزێنێوی ئاڵتوونیش دەسەنە شیەن وەلێم خۊ پێسە فارس ماچۊ ماساو هەر وەختێو ئاویەنە گێریش تازەن!

"هەشت ساڵۍ خەریکوو تۊمارکەرڎٚەی و ئەوەنویستەیشا بییەن"

یۊ چا هەرمانە ژیرانە و بەکەڵکا کە بە ویرم بنەڕەتیوی هێقم و هەسەما پەی ئەوەکەرڎٚەی و نۊژنەوە کەرڎٚەی یانەو فەرهەنگوو هەورامانی،  نویستەی و چاپوو کتێبوو افسانەهای دیار ما هینوو کاک کوورش ئەمینی ا.ئی کتێبە کتێبیوی یەرە جڵدیا گرڎٚەوە ۱۵۵۰پەلێن جە تەشکەو وەزیریەنە وەڵاوگەو تاڤگەی جە شاروو سنەینە چاپ کەرڎٚەن.هەر جڵدێوەنە باسوو بەشێو چی ئەفساناشە کەرڎٚەن و سەرشاوە پەیجۊریش کەرڎٚەن.گلێرەوە کەرڎٚەی ئا ئەفسانا،  ئیجا جە یەرۍ پارێزگاینە هەرمانێوە قۊرسە،  سەخڵەتە و پڕووکنەرەنە و ویریوی تێژ، ئاوەزیوی حەنەر و هازێوە قوەتەش گەرەکەنە کە لاو کاک کوورشیەوە بیێنۍ و هەنۍ. ئی ئەفسانۍ هەرپاسە کە نویسەر جە ئەژناسە کەرڎٚەیشەنە ماچۊ ئا ئەفسانا گێرۊنە وەر کە دوۍ پارێزگای کورڎٚەسان و کرماشان وو ئێران و پارێزگاو هەڵەبجە و هەریموو کورڎٚەسانیەنە هۊرش گێرتێنۍ و گرڎٚەوە هەشت ساڵۍ خەریکوو تۊمار کەرڎٚەی و ئەوەنویستەیشا بیەن. چی کتێبەنە یەکەم جارا جە هەورامانەنە پەی گلێرەوە کەرڎٚەی ئەفسانەکا جە شێوەی زانشتی ئارنە-تامسۊن ی کەڵگ گیریان.تەشکوو دەستەبەندیشا هینوو مەکتەبوو فەلاندیەکان.بە چاپوو ئی کتێبیە ئەفسانەکۍ هەورامانیچ لواینە پێکئاماو دەستەبەندٚی جەهانی.

"گەورەتەرین خزمەتا بە ترۊق و گەشەو زوان و فەرهەنگوو هەورامانی"

بەشکەم چاپوو ئی کتێبە یەرە جڵدیە بۊ بنەڕایێو پەی گلێرەوە کەرڎٚەی فرەو بەشەکاو فولکۊروو هەورامانی، فولکلۊریوی دەوڵەمەندٚ کە بە تۊمار کەرڎٚەیش و لەیەکەوەدایش جوابوو فرەو پەرسە قووڵا میۊزیۊوە.هەر پاسە وەڵتەر واچیا گلێرەوە کەرڎٚەی ویەرینی دەمواچ، هۊرپڕای، تازیۍ، جەژنۍ، باوەرۍ دینیۍ و…گەورەتەرین خزمەتا بە ترۊق و گەشەو زوان و فەرهەنگوو هەورامانی.

بەڕاسی کاک کوورش ئەمینی بە چاپوو کتێبە یەرە جڵدیەکەیش خزمەتیوی بۍ ئەوپەڕینش بە فەرهەنگوو نیشینگەو ژیرلا کەرڎٚ ئیجا بەشکەم نویسەرۍ و پەیجۊرکارە دڵسۊچنەکێچ چەم بڕانە هەرمانەکێش و هەر یۊ یاگۊ وێشانە بە پاشەکەوت وستەی بەشێو چی فولکلۊرە بەپیتەیە پارێزەرۍ فەرهەنگوو وەڵاتەکەیشا با.ئاواتوو لەش ساقی، سەربەرزی، سەرکەوتەی و نەبەزیایم هەن پەی کاک کوورشی و خامە ئەرەنەکاسیاکەیش تا ئەواڕەم هەورامانی جە بەر و بەرهەمە کەڵکدارەکاش بۍ پشک نەکەرۊ.

"ئۊمێد حەبیبی"

س.ز