مانگێرتەی سەرانسەری جە ۋەرکۊتوو کورڎەسانینە دەسشپنەکەرڎ
ئارۆ هامکات چنی دووەم ساڵیاڎو سەرهۊردای ژەنی، ژیۋای، ئازاڎیی مانگێرتەی سەرانسەری جە ۋەرکۊتوو کورڎەسانینە ملۆڕاوە.
سەرو داواو پەژاکی، کەژاری و ژمارێوە حزب و لایەنا تەرو ۋەرکۊتوو کورڎەسانی و چالاکا دلێینەی، ئارۆ جە دووەم ساڵیاڎو دەسپنەکەرڎەو سەرهۊرداو ژەنی، ژیۋای، ئازاڎیینە، جە چن شارێوە ۋەرکۊتوو کورڎەسانینە بە وستەیرەی دوکان و بازاڕەکا مانگێرتەی لواڕاوە.
جە شارە جیاجیاکا پارێزگاکاو سنە، ورمێ و کرماشانینە مانگێرتەکەی دەسشپنەکەرڎەن و تا مۍ فراوانتەر مبۆ.
هامکات جە شارو سەقزی، ماواو ژینا ئەمینیۍ پەی ڕاگێرتەی جە لوایڕاوەو مەراسیمو یاڎکەردەیۆکەی سەرو قەبرەو ئا کناچە کورڎێوە کە بیە بە هێماو سەرهۊرداکەی، هێزێوە فرەی ئەمنی و سەروازی چواردەورو قەبرسانو ئایچیشا گێرت و ڕاشا جە هاموڵاتیا گێرت کە بلانە سەرو قەبرەو ژینۍ.
دوو ساڵۍ چێوەڵی و بەمەڵامەتوو ئەشکەنجەو پۆلیسی ئەخلاقی ئێرانیۆ جە تاران، ژینا ئەمینیە کناچە کوردەو شارو سەقزی ژیۋایش جە دەسدا، ئانەیچ بی بە سەرەتاو دەسپنەکەرڎەو سەرهۊردایۍ بە سەرمەشقایەتی ژەنا و جوانا بە دروشمەو ژەنی، ژیۋای، ئازاڎیی.
ئا سەرهۊردایە کە بە گۊرەتەرین و فراوانتەرین ناڕەزایی تەمەنو کۆمارو ئیسلامی منریۆرە، ماوەو چڼین مانگاش خواینا وسەرەڕاو سەرکوتکەردەی و کوشتاریچ ناتاویان بە تەمامی کپ بکریۆ و جە بۆنە و کاتی جیاجیانە سەرهۊرمڎۆوە و هاموڵاتیۍ بە شێوەی جیاجیا ناڕەزایی ۋێشا ۋەرا ۋەر بە سیاسەتەکا دۆڵەتی بەربڕا.
