جە ٢٨و نیسانینە، جە لېوارەکا ئەل هیرۆی جە دوورگە کەنارییەکا ئیسپانیاینە، حۊت ژەنۍ و زاوڵۍ کناچۍ جە کەشتیێوەنە گیانشا جە دەسدا. حەرچڼە فرەو ئا سەرنشینا کەشتییەکەی کە نوقمو ئاوۍ بی ڕزگارکریۍ کە ١٤٥ کەسۍ بێنۍ، بەڵام واوەی پرسو فرەیی کۆچبەرا ژەنۍ و ئا مەترسیا کە ڕووبەڕووش باوە بی بە یاگۍ سەرنجی.

ڕێژەو ئا ژەنا کە جە ۋەرنیستوو ئەفریقایۆ بەرەو ۋەرنیشت کۆچمکەرا یەکجار بەرزبیەنۆ. بەپاو ئاژانسوو پەنابەرا نەتەوە یۆگێرتەکا، بەمەڵامەتو ئاژەو ناجێگیری و هەژارییوە جە وڵاتا (بورکینا فاسۆ، مالی، نێجیریا)یۆ بە ملیۆنان کەسۍ ناچارۍ با کۆچ بکەرا و باس چانەی کریا کە ژەنی سەرمەشقی ئا کۆچبەرییە مکەرۆ.

جوان کارلۆس لۆرێنزۆ، ۋەرپەرسو 'CEAR' قسێش پەی ڕۆنامەو گاردنی کەردۍ و واتش، ژەنی ئیتر جە پڕۆسەو کۆچبەرینە نەک هەر یاگۍ باسینۍ، بەڵکم دەوری سەرەکیشا هەن. ژەنی بەتەنیا یان بە زاوڵەکاشاوە یاخوڎ چنی ژەنا تەری ڕا گێرانە ۋەر و مۆدێلو کۆچبەریشا فاڕا کە وەڵتەر جە پیایاوە سەرشهۊردابۍ.

دماو ئانەی یۊبیەی ئۊروپای کۆچکەردەیش جە بەحری مېیامینینە سنووردار کەرد، کۆچبەرا ڕووەشا کەرڎە زەریای ئەتڵەسی. جە ساڵۊو ٢٠٢٤ینە زیاتەر جە ٢٠،٠٠٠ کۆچبەرا ڕووەشا جە لېوارەکا ئەل هیرۆی کەرڎ. ئی ڕۍ بە درێژیی و ڕاو مەرگی ئشناسیێنە. جە لېوەتەرۆ، ژەنی نەک تەنیا ۋەرو کێشەو ئابووری، بەڵکم ۋەرو کێشەکا پېسە تنوتیژی سێکسی، هامسەرگیریی زۆرەملێ و سوننەتکەردەی ژەنا ئا ڕا دژوارۍ گېرانە ۋەر.