موراد قەرەیلان پەیامو سەروەشیش ئاراسەو بنەیانەو فەقە و چەتۆی کەرد
موراد قەرەیلان ئەندامو کۆمیتەو ڕاوەبەری پەکەکەی پەیامو سەرەوەشیش ئاراسەو بنەیانەو وڵاتپارێزنەرا دێریکی، ئەبو عەلی (عەودیە فەقە)ی و ئیسماعیل چەتۆی کەرد.
ئەندامو کۆمیتەو ڕاوەبەری پەکەکەی و فەرماندەو مییانگەو هێزەکا پارێزناو گەلی موراد قەرەیلان بەمەڵامەتو کۆچی دماینو وڵاتپارێزنەرا دێریکی و وەرنیشتوو کوردەسانی، ئەبوو عەلی و ئیسماعیل چەتۆ، سەرەوەشیش جە بنەیانەکاشا کەرد.
پەیامەکەو موراد قەرەیلانی ئینەن:
"پەی بنەیانەو وڵاتپارێزنی قارەمانی، ئەودیە فەقێ
سەرەتا سڵام و ڕێزو وێم ئاراسەو گرڏو ئەنداما بنەیانەکەیتا کەرونە و چەمشا ماچ کەرونە.
هەواڵما پنەیاوا کە مامۆی قارەمانما ئەبو عەلی ئشناسیا بە عەودیە فەقێ حەفتەی ویەردە کۆچی دماینش کەردەن. بەژنەویەو ئی هەواڵەیە خەمبارێ بییەیمێ. وەرو ئانەی زانمێنە ئەڤدیە فەقە جە شارو کۆچەراتا و هەرێمو دێریکینە بە گرڏی کەسێوە خاوەن پێگێوە ئازا بێ و گرڏ کەسێ ئشناسێش و ڕێزش چەنە گێرێنێ. پەی وێش کەسایەتیێ وەشەویسو و ڕێزدار بێ جە ناوچەکەنە. بەتایبەت دماو ئانەی پارتیما، پەکەکە و ویرۆکەو ڕابەر ئاپۆی لوا ئا هەرێمۆ، یۆ جا بنەیانا کە سەرەتا ویرۆکەو ڕابەر ئاپۆیشا ئشناسا و بڕواشا پنە کەرد و بە دڵ و گیان بەشداری شۆڕشی بیێ و جە ڕووەو ماددی و مەعنەویۆ، پاڵپەشتیێ گۆرەشا جە شۆڕشی کەرد، بنەیانەو ئەبو عەلی و ئەڤدیە فەقە بێ.
یاگێ ئاماژەین چی بنەیانەنە دووێ شۆڕشگێڵێ گۆرێ، دووێ ٫کەشمەرڏێ گۆرێ سەرشا هوردا. یۆشا هەڤاڵ دیلان کۆچەر بێ کە بی بە فەرماندەو هەرێمو گارزانی و یاوا ئاستو شەهادەتی و ئەوی تەریشا هەڤاڵ عەلییە کە فەرماندەو کەش و جودیش دەسۆ بێ و گەشمەرڏە بی. یانی ئەبو عەلی تاتەو دووێ ٫ەشمەرڏان، دووێ شۆڕشگێڵێ گۆرێ. هەرپاسە پێسە مزانریۆنە ئی بنەیانە خاوەنو گەشمەرڏا تەرێشەنێ. بەڵام خودو ئەبو عەلی، پێسەو دۆستێوە دڵسۆزو ڕابەر ئاپۆی، پێسەو وڵاتپارێزێوە تا دمای خاوەن سۆز و وەفاو وێش بێ، بەردەوام پەی دۆزو شۆڕشی ئەوەکۆشای کەرێ، و بەردەوام سەرمەشق بێ.
جە حەقیقەتەنە پێسەو بنەیانەکەیش پابەندبییەیشا بە هێڵەو گەشمەرڏاوە بیێ بەها و ڕەمزو کۆمەڵایەتی بییەی جە سەرانسەرو ناوچەکەینە. ئەبو عەلی یۆن جە کەسایەتییە سەرمەشقو گەلەکەیما. گرڏما مزانمێنە جە بەهێزکەردەو ئەوەکۆشای وڵاتپارێزی جە ناوچەکەنە دەورێ وەرچم بێ، هەرپاسە بە شێوەی شەخسیی هەرمانەی فرێش کەردێنێ و فرەو جە کێشە کۆمەڵایەتییەکاش هەرێمەکەنە چارەسەرکەردێنێ. بەمەڵامەتو ئی کەسایەتی و تایبەتمەندیاوە لاو گرڏی یاگێ ڕێزی وەشەویسی بێ. بی بۆنۆ کۆچو دمای ئەبو عەلی بەڕاسی زەرەرێ گۆرە بێ پەی ئێمە و پەڕکەردەیۆ یاگێش ئەستەما.
بەڵام دڵنیانمێ مانیابییەو گەلو وڵاتپارێزی، ئەوەکۆشای ڕابەرایەتی و گەشمەرڏاما بە زەرەر نەلانو و مەلۆنە. جە ماوەو ئی ١٢ساڵا ویەردەینە شۆڕشێوە جە وەرنیشتەنە ئینا ئارانە و ئی شۆڕشە بییەن بە شۆڕشو گەلا و هیواش بە گرڏو گەلو کوردەسانی دان. هەرپاسە ئا مڏرامانەی کە چی ڕوانە بەدرێژایی بەحرو فوراتی و بەنداو تشرینی و قەرەقۆزاقی و دێرحافیرە ملۆ ڕاوە، دڵ گەرمیش بە گرڏو گەلەکەیما دان. ئی شۆڕشە بەرهەمو ئەوەکۆشای ڕابەر ئاپۆو، گەشمەرڏا و گرڏو گەل وڵاتپارێزو هەرێمەکەیمانە.
بنەیانە و گەلی قارەمانما ڤە کۆچەراتا:
ئێمە مزانمێنە بنەیانە قارەمانەکێما جە هەرێمو کۆچەراتا و تەمامو هەرێمو دێریکینە ئینێ ئەرکو وڵاتپارێزی بەهێزینە و وێشا سەلەمنان. ئی هەرێمە یۆن جە هەرێمەکا ئێمە کە سەرمەشقایەتی شۆڕشیش کەردەن و دەیان فەرماندێ و شۆڕشگێڵێ گۆرێما چی هەرێمەنە سەرشا هوردان. هەرپاسە جە بەرزکەردەیۆ ئەوەکۆشای و وەڵوستەو جەنگو گەلینە دەورێ گۆرەشا نیشانەدان. پۆکەی جەلایەنو خەڵکو هەرێمەکەی و گەلو کوردەسانیۆ یاگێ شانازی و ڕێزونە نیاینێ.
بی هیوا و بڕوێوە جارێوە تەر بە نامێ ڕاوەبەرایەتی و حیزب و جمیەرەکەیما سەروەشیشا چنە کەرونە و ماچمێنە سەرتا سڵامەت و سەرو ڕابەر ئاپۆ و سەرو گەلەکەیما سڵامەت بۆنە.
پەی شمە و گرڏو گەلەکەیما جە هەرێمەکەی جە ژیوای، هەرمانە و ئەوەکۆشایتا هیواو سەرکەوتەی وازمێنەو و ماچمێنە؛ "گەشمەرڏە مەمرۆنە"
پەی بنەیانەکەو قارەمان ئیسماعیل چەتۆ:
سەرەتا سڵام و ڕێزم ئاراسەو گرڏو بنەیانەکیش کەرونە و یۆ بە یۆ چەمشا ماچ کەرونە.
بەهەمان شێوە ژنیما وڵاتپارێزی قارەمانما و هەڤاڵی قارەمانما ئیسماعیل چەتۆ کۆچو دمایش کەردەن. بەڕاسی بە هەواڵو کۆچی دمای هەڤاڵما و برای قارەمانما ئیسماعیل خەمبارێ بییەیمێ. جارێوەتەر سەرەوەشی وێما ئاراسەو بنەیانەو قارەمانما و گرڏو گەلو دێریکی مکەرمێنە و ماچمێنە سەرو شمەو، ڕابەرایەتیما و پارتیما سڵامەت بۆنە.
جە حەقیقەتەنە هەڤاڵ چەتۆ ئیسماعیل کەسێوە ئاسایی نەبێ.
جە هەرێمو دێریکنە، دۆسی پێسەو ئیسماعیل چەتۆی، ئانێ پێسەو محەمەد ئیسماعیلنێ، ئانێ پێسەو ئەڤدیە فەقەینێ، و فرەو کەسا تەرێ کە جە ماوەو٤٠ ساڵا ویەردەینە دەورێ گۆرەشا جە تاریخو ئەوەکۆشای ئازادیی پەکەکەینە بێ. ئیسماعیل چەتۆ یۆ بێ جا کەسا کە جە هەرێمو دێریکینە پێسەو کەسایەتیێوە ڕاستگۆ و دڵسۆز ئشناسیابی. بەمەڵامەتو تایبەتمەندییە بەرزەکاشۆ، جەلایەنو گرڏو خەڵکو هەرێمەکەیۆ وەشەویس و یاگێ ڕێزی بێ. کاتێک پارتیما پەکەکە دەسش بە ئەوەکۆشای کەرد، یۆ جە کەسایەتییە یەکەمەکا هەرێمەکەی کە فکرو ڕابەر ئاپۆیش زووتەر ئشناسا وبە دڵ وگیان بەشداریش کەرد، ئیسماعیل چەتۆ بێ. ئاڏ بەڕاسی بی بە هەڤاڵو ڕابەری و گرڏیما. جە گرڏو پرۆسەکا شۆڕشینە بە جدیەتۆ بەشدار بێ. جە دۆخە قورسەکا وەرنیشتینە تەنانەت ئاما قەندیل و جە گلێرۆبییە و کۆنگره کا پەکەکەینە بەشداریش بێ. جە حەقیقەتەند گرڏو سەرمەشقەکا جمیەرەکەیما کەسایەتی ئیسماعیل چەتۆی خاس ئشناسێنێ و زانێنێ دۆس و پاڵپشتی دۆزو کوردەسانین. با مەڵامەتۆ بە دڵنیایۆ کۆچو دمای بەڕێزیشا زەرەرێ قورس بێ پەی ئێمە. فرە ئەستەما یاگێ کەسێ بەقیمەتێ پێسەو ئیسماعیل چەتۆی پەڕکریۆوە. دیسان بە نامێ ڕاوەبەرایەتی پەکەکە-پارتیماوە سەرەوەشی وێما ئاراسەو بنەیانەو قارەمان ئیسماعیل چەتۆی مکەرمێ و بە ڕێزداریۆ سڵام ئاراسەو گرڏی مکەرمێ."
