میدیای ئەڵمانی: ئەرڎۊغان خەتێوە نەرمە مەگێرۊرە وەر
جە ئەرەیاونایەکاو ئەڵمانیاینە دلۍ وەرسەنگنایۊ ورچنیەیۊ رەجەب تەیب تەیب ئەرڎۊغانینە، ئاماژە پانەیە کریا، ئەرڎۊغان سەروو خەتێوە هەنگامە مەنیۊ
جە شرۊڤێوە ڕۊنامەو فرانکفۊرتەر روندشاوینە، کە یۊن جە ڕۊنامە سەرەکییەکاو ئەڵمانیای، ئاماژە پانەیە کریان کە ئەرڎۊغان گەرەکشا ئەو کەشە نەتەوەپەرسییە، ئیسلامییە فاڕۊوە پەی ورچنیەی ساڵۍ ئایندۍ. جە شرۊڤەکەنە ئامان: "دماو ورچنیەیۊ ئەرڎۊغانی جیای خاسبییەی هەرمانەکا خراپتەرۍ با. وەروو ئانەی سەرۊککۊمار سەرجەنۊ ورنەچنیاوە نەواتش کە قۊرتەکاو وەڵاتی چەنی نمازۊ. ئەرڎۊغان بە وەعدۍ و دروۍ نەتەوەپەرسیۍ تاوابێش لایەنگێرەکاش وزۊ جمووجووڵۊ. وەلۍ نەواتەبێش کە چەنی ورماسای مرکنۊراوە. چەنی دۊخی ئابووریی خراپی چارەسەر کەرۊ و چەنی یانەکاو مەنتێقە بووەلەرزەوەنەدریایەکا خاس کەرۊوە. جیای ئا گرد کەموکوڕییا تەنیا سەوقاتیی ورچنیەیش بەخشناوە . وەلۍ وەروو ئانەی سەرچەمەکاو دەوڵەتی تاڵانۍ کریێنۍ، ئا سەرچەمەیچشە یاونا دما یاگۍ. پوی ورچنیەیەکاو ساڵێوە تەری گەرەکشا ئیستەنبوڵ و ئەنقەری بەرۊوە. چەنی ئانەیجە گەرەکشا دۊخی ئارۊییانە دژوو وەراوەرەسیاسییەکاو ئیسەیش بەکار بارۊ. ئینەیچ ئاماژێوە ئەرێنی نییا".
ئەگەرش هەن کە ئەورووپا دژوو تورکیای زیادتەر تند و وشک مامەڵە کەرۊ
ڕۊنامەو شتوتگارت ناچریشتەنیچ وەڵاش کەرڎۊ، کە ئەرڎۊغان متاوۊ سیاسەتێوە تندتەر کەرۊ، جە هەمان وەختنە ئەورووپایچ هەمان هەڵوێست کە وەراوەروو قەتەری یا سعودیەی نیشانەش دا متاوۊ دژوو تورکیای گێرۊشرە وەر.
جە شرۊڤەکەنە ئامان: "ئانۍ چەمەڕوانۍ با سەرۊککۊمار ڕەجەب تەیب ئەرڎۊغان دماو سەرکەوتەی جە ورچنیەینە سەروو خەتۍ نەرمتەرێوە هەرمانە کەرۊ، بە ئەگەری فرەوەوە چەمەڕوانییەکێشا نمەیا دی و ئاماژەش کەرڎەن پانەیچە، کە ئەرڎۊغان جە شەوەو ورچنیەکەینە بەرش وست، کە چەنی وەراوەرە سیاسییەکاش تندوتیژ بۊ.
دایوسانایەکا چەنی یۊبییەی ئەورووپای مشۊم دماییشا بێ
لە شرۊڤەو فۊرزهیمەر زیتونگینە ئانە وزیان ڕووە، کە مشۊم چێولای دایوسانایەکا بەینوو یۊبییەی ئەورووپای و تورکیای دماییشا پەنە بۍ واتەنش: "پێسە ئانەی گردلایۍ بێتاقەتێنۍ، ئەرڎۊغان تاکڕەوی لە وەڵاتەکەشنە وەڵا کەرۊوە و سیاسەتوو زەڕی و ئابووریی غەڵەتی کە خەڵكی زیادتەر هەژار کەرۊ درێژە پەنە بدۊ. دۊخەکە چینەیە دژوارتەر بۊ. هاموەخت چەنی ئانەی بانگەوازوو سەرکرڎەو پارتوو گەلوو ئەورووپای مانفرێد وەبەر پەی دماییئارڎەی بە دایوسانەکا چەنی تورکیای پەی ئەندامبییەی جە یۊبییەی ئەورووپای غەڵەتا. گرد کەس مزانۊ کە بە ئەرڎۊغانیوە ئەندامبییەی تورکیانە جە یۊبییەی ئەورووپای وێخەڵەتناین. وەلی دماییئارڎەی بە دایوسانای چەنی تورکیای کە ئەرڎۊغان میانجیی مۊسکۊی کەرۊ، زیادتەر تورکیای جە ئەورووپای دوور وزۊوە. ئینە جە هەمان وەختنە پەی ئا تورکایچە دەنگشا بە ئەرڎۊغانی دان بۊ بە ئاماژێوە وڕنەر".
س.ز
