جە چوارجەمەو گرنگیدای بە زوانی هەورامینە و بەرڎەوامی ئی ڕەوتەیە هەورامانوو وەرکەوتینە، نویسەرۍ و چالاکۍ فەرهەنگی و ئەنجوومەنە ئەدەبیەکۍ ئینۍ حەوڵی ئانەینە نازا سەیەو زوانەکای تەری هەسەبۊوە سەروو زوانوو ئەدێرە، و چی مەیدانەنە جموجووڵۍ فەرهەنگیۍ تایبەتۍ نریا، ڕوەفی مەحموود پوور شاعیر و نویسەری نەوگەراو هەورامانینو داراو چند دننە کتێبان بوار و شیعرۍ و ڕەخنەی و تارێخی و ئرماننامەی هەورامیانیە، بەرگەمۍ تازەش پێشکەشوو هامزواناش کەرد، بارەو بەرهەنەکەیۊ نویسەر واتش؛" ئی بەرهەمە داستانێوە تازۍ تایبەت بە زاڕۊڵانە. چەنی ئانەی لەزەتبەرڎەی ڕۊحی و خجڵیای سوودبەخشانە پەی زاڕۊڵا وەرچەم گیریان، بابەت و ناواخنی ماناداریچش چەنە گونجیان و بەزوانێوی پاراو و زاڕۊڵەپەسەندٚ ئامادە کریان"

"وێناکاری دلێو ئی کتیبیە کاروو خانم گونا خەرامانی بیەن جە بەشێوە  کتیبەکەیەنە ئامان،

خه‌ڵك واچێ: ئا دره‌خته‌ ڕازێوه‌ گه‌ورێش دڵشه‌نه‌ حه‌شار دێنه‌. بێژگه‌ سۊفی زانای، که‌س پا ڕازۍ نمه‌زانۊ

سۊفی زانا پیالێوه‌ ڕیش چه‌رمه‌ی ئێسک سووک بۍ. گرد حه‌فتێو جاریۍ، ئادٚیچ ڕوه‌کاو چوارشه‌مه‌یەنە، ئۍ سه‌یه‌و ئی دره‌ختی‌. سه‌روو ته‌وه‌نه‌کۍ بنێشه‌وه‌ نیشێره‌. تاره‌که‌یش گێرۍ ده‌سه‌وه‌ . بە ئاهەنگێوە دڵنەواز ئارێشەوە دەنگ. ده‌موو ئاهەنگەکەیەوە مه‌لۍ سه‌روو دره‌خته‌که‌ی نیشێنۍ وە‌نای. هیچکام نه‌پڕێنۍ. خه‌ڵکوو ئا ده‌وروبه‌ریچه‌ کۊ بێنێوە و عال گۊشش پەی دارێنۍ.

ئانه‌ حه‌وت مانگۍ ڕه‌به‌ق بۍ ‌ وریا چا دەوروبه‌رانه‌ خولیێوه‌ تا جه‌ ڕازه‌و ئا سازیه و ئا درەختیە‌ بیاوۊنه‌. لوۍ لاو هه‌رکه‌سی، بۍ سوود بۍ. گردکه‌س په‌ی لاو سۊفی زانای ڕانموونیش که‌رۍ. سۊفی زانایچ ڕازی نەبۍ و ڕازه‌کۍ لاو که‌سیۊ نه‌درکنۍ. به‌ڵام وریا کۊڵ نەدٚۍ و ده‌سبه‌رڎار نه‌بۍ.