واتەواچەو پەیوەندییەکا  چبەرو کەنەکەی و ئەندامەو کۆنسەو ڕاوەبەری نیلۆفەر کۆچە سەرو داواکارییە تاریخییەکەو ڕابەر ئاپۆی پەی ئاژانسو هەواڵو فوراتی (ANF) قسێش کەردێ.

کۆچو ئاماژەش پانەیەدا دماو ١٠ ساڵا ویناو وێنەو ڕابەر ئاپۆی جۆش و مۆڕاڵێوە گۆرەش بەخشا و واتش: "بەڕاسی دەقێوە تاریخی بێ. ئی تابلۆ تااریخییە ئەنجامش هەنگامێوە تاریخی ڕابەر ئاپۆی بێ، بە ئیرادە و ئازای نریا.ئەوەکۆشاو ٢٦ساڵەو  ئیمراڵی پەیوەندیدارا بە ئیرادەو ڕابەر ئاپۆی و ئەوەکۆشاو گەریلایۆ. گەل و تەڤگەرو کوردی ٢٦ ساڵێ پێ مردای چنی ڕابەرەکەیشا مڏرامانشا کەرد. ئی وەڵکەوتەیە ئەنجامش ئینە بێ.

وەرو ئانەی گەلوو کوردی ١٠٠ ساڵێن حیچ چێوێ ئەرێنیش جە دۆڵەتی نەوینان. جگە جە ون متەی، تنوتیژی و تیرۆر چێوێ تەرش نەوینان. گەلوو کوردی جە سەردەمو عوسمانییەکاوە  تا ئیسە ڕووبەڕووو سیاسەتو قڕکەردەین، بەڵام ڕابەر ئاپۆ بە بڕواو گەلی و هەمڕێیاش هەنگامێوە گۆرێش نیا. ئەر مرۆڤ سەرنج وسۆنە سەر و نمونەکا کەتەلۆنیای، ئەفریقاو پانیشتی هەنگامەی پی جۆرە سیاسی مەوینمێ. حەر پۆکەی ئی هەنگامێ فرە گرنگەنە و جە تەمامو جەهانینە پێسەو هەنگامێوە تاریخیی هورسەنگیۆ.

لێوە تەرۆ فکر و پرسیارێ هەنێ. ئایا دۆڵەتو تورکی جوابێ چنینو ئی هەنگامێ دۆوە؟ سیاسەتو قڕکەردەی ١٠٠ ساڵەی بە جارێوە فاڕیۆنە؟ ئا هەنگامێ دۆڵەتو تورکی منیۆش دیاریش مکەرۆ، بەڵام مشۆم ئەوەکۆشای و مڏرامان بەردەوام بۆنە. حەر پۆکەی نزیک بییەیۆ بە گومان و ڕەخنەیی سروشتییا. تەماشە مکەرمێ دۆڵەت جوابێ چنین مڏۆوە".

'خاڵەی سەرەکییەما و ئامانجما ئازاد بییەو ڕابەر ئاپۆین'

نیلۆفەر کۆچو واتیشش: "یۆ جا پرسیارا کریۆنە ئانێنە جە وەراوەرو ئی هەنگامە گۆرێنە چێش وچیان؟ جوابو  ئینەیچ ئانەن کە ڕابەر ئاپۆ جە قسەکا دمایشەنە واتش، زەمینەو سیاسی و یاسایی. واتا تورکیایی دیموکراتیک. پەی گێڵایۆ و دیموکراتیکی داوا کریا، پەی ئانەی کورد و گەلا تەرێ تاوانە شناسنامەو وێشا بۆنە و بە کلتوور و زوانو وێشا بە شێوێ ئازاد بژیوا.

لێوە تەرۆ هورشێونایۆ پەکەکەی و نیارەو چەکەکا چێوێ ڕاستەوخۆ نییا ئەنجام دریۆنە. پەی ئی هەنگامێ مشۆم متمانە و گرەنتی بۆنە. پەکەکە تەڤگەرێوەن مۆرەو وێش ٥٠ ساڵێن جە تاریخو کوردسانی دان. ڕابەر ئاپۆ داواش جە پەکەکەی کەرد کۆنگرێوە بەسۆنە. پەکەکە و هێزەکاشا، جە چوارچێوەو دلینەینە ئی پڕۆسەیە هورسەنگنانە.

وەڵتەر موراد قەرەیلان واتەبێش؛ داواکاری بە دیمەنو ڕابەر ئاپۆی وەسێ نییا. جە کۆنگرەو پەکەکەینە ڕابەر ئاپۆ هەمیشە ڕاپۆرتەی سیاسی پێشکەش کەرێ و ڕوانگێوە دێ. پەی ئانەی ئیسە پڕۆسەکە بە خێرای بەرەو وەڵێ بلۆنە پەنەوازا ڕابەر ئاپۆ دلێ هەلومەرجی ئازادینە داواکاریی وێس ئاشکرا ئەرەیاونۆنە.

جە چوارچێوەو ئی هەنگامێنە واتما، ڕاو ئاشتیی چنی ئازاد کەردەو  رابەر ئاپۆی بۆنە. جە داواکارییەکەیما جەخت مکەرمێوە. چی بابەتەنە داواکاری پەکەکە چێشا نمەزانو، بەڵام پێسەو ئانیشا چبەرو وڵاتی ئازادی ڕابەر ئاپۆی پەی ئێمە خاڵێ سەرەکییا".

'مشۆم دۆڵەت و دەسەڵاتداری زوانو وێش فاڕۆنە'

جە بەردەوامی قسەکاشەنە نیلۆفەر کۆچە سەرنجش وست سەرو گرنگی فاڕیاو زوانی و واتش: ڕابەر ئاپۆ چی بابەتەنە دڵسۆزی وێس نیشاندان. ڕیسکێوە گۆرەش وەرچەمو وێشەنە کەردەنۆ. حەر پۆکەی مشۆم دۆڵەتیش چی بابەتەنە هەنگامەی جدییە بنیۆنە. مشۆم جە ئاستی بەرزەنە دەس پنە کەرۆنە  و ئی زوانەیە  فاڕۆنە".

'تەرسی هەنە کۆمکووژی هامشێوەو پاریسی ڕووەدۆنە'

سەبارەت بە مەترسی سەرو پڕۆسەکەی نیلۆفەر کۆچە واتش: "گەرەکما پڕۆسەو ٢٠١٣ پێسەو نمونەی بارووە. دیدار جە مانگەو کانوونو یوەمینە ڕەسمی بی. ٩و کانوونو دووەمی ٢٠١٣ ساکینە جانسزە، فیدان دۆغان و لەیلا شایلمەز گەشمەرڏێ کریێ. هرووژمێ فرە سەخت بێ، یوە جە ئەرەمەزنێرەکا پەکەکەی ساکینە جانسزە بێ کریا ئامانج. ڕابەر ئاپۆ دماتەی واتش؛ 'ئینە جە وەراوەرو من بێ. ها ساکینە، ها من'."

ڕووەدێ چی جۆرە گرڏ کاتێ ئەگەر و ڕووەدایشا هەن. تورکیا و وەرکەوتوو مییامینینە نمەزانریۆ ڕووەدێکێ چنین ڕووەمڏا. ئیسە ئینایمێ دەستپێکو پڕۆسەکەینە. حەر پۆکەی پەنەوازا مرۆڤ ئاگادار بۆنە. کۆمکووژی پاریسی ئاکاتە پەیامێوە گرنگ بێ وەراوەرما. حەر پۆکەی ڕابەر ئاپۆ ئاماژەش پانەیە کەرد پەنەوازا بە خێرای جوڵییەیمێ.