پارێزنەر زاروهی هۆڤهانیسیانە باسوو ئانەیش کەرد نمەبۆ، کە ئی دۆخە قبووڵ بکریۆ، کە ڕابەروو گەلوو کوردی عەبدوڵا ئۆجالانش چەنەن و بانگەوازش وەنەو گردوو پارێزنەرا کەرد، پەی چەمپەنەکەوتەی چەنی ڕابەروو گەلوو کوردی بەشدارێ کامپینەکەی بانە.
ماوەو ٢٥ ساڵان ڕابەروو گەلوو کوردی عەبدوڵا ئۆجالان، ئینا گۆشەگیری ئیمراڵییەنە. ٤٠ مانگێن هیچ زانیاریێوەش بارەوە نییەن. پارێزنەرێ کوردستانەنە، تورکیا و چندین وەڵاتای تەریوە داواکارییشا پەی دیداری پێشکەش کەردەن. یۆ چا پارێزنەرا کە داواو چەمپەنەکەوتەیشا تۆمار کەردەن، پارێزنەرەی ئەرمەنییە زاروهی هۆڤهانیسیانەنە. پێوەس پی داواکارییا پارێزنەرە زاروهی هۆڤهانیسیانە پەی ئاژانسوو هەواڵوو فورات (ANF) قسێش کەردێ.
پارێزنەر زاروهی هۆڤهانیسیانە ئاماژەش پانەیە دا، کە پێسەو پارێزنەرێ بە هەرمانەو وێش زاناش، کە بەشدارێ کامپینەکەی بانە پەی لوای ئیمرالی و واتش: "باوڕم پانەیەنە ئی کامپینە و هەڵمەتەو ئازادیی جەستەیی ئۆجالانی میاوۆ بە ئامانجوو وێش. ئی کامپینە کاریگەریی وێش سەروو یاسێوە وەش مکەرۆ و گۆشەگیری و ئەشکەنجە سەروو ئۆجالانیوە لا مبەرۆ. پەنەوازا گردوو پارێزنەرا بەشدارێ بانە و کاریگەری وەش بکەرا تا چەمپەنەکەوتەی چەنی عەبدوڵا ئۆجالانی فەراهەم بۆ."
فکر و فەلسەفەو ئۆجالانی جیهانەنە وەڵا بییەنۆ
پارێزنەر زاروهی هۆڤهانیسیانە باسوو ئانەیش کەرد، ڕابەروو گەلوو کوردی عەبدوڵا ئۆجالان داراو فکر و فەلسەفێوی ئازادین و واتش: "ئارۆنە فکر و فەلسەفەو ئۆجالانی جیهانەنە وەڵا بییەنۆ. کە بەروزوو ئانەیەنە فکروو ئۆجالانی پەی گرد ئینسانیوە گرنگەن. پەی گلێرگێوی یەکسان و ئازادی کاریگەرییش سەروو گرد کەسێوە وەش مکەرۆ. ئارۆنە جیهان پێویسییش بە فکر و فەلسەفەو عەبدوڵا ئۆجالانییا، چونکوم زامنوو ژیواێوی ئازاد و یەکسانی و سەقامگیرین."
'گۆشەگیری پاشێلکەردەی مافەکاو ئینسانین'
پارێزەر زاروهی هۆڤهانیسیانە دەربارەو گۆشەگیریی ئیمراڵی قسێش کەردێ و واتش: "ئا گۆشەگیرییە ئارۆنە سەروو ئۆجالانی و هامڕاکاشۆ سەپییان، بەروو گردوو یاسایەکاو دلێ و میاننەتەوەییەکانە و پاشێلکەردەی مافەکاو ئینسانین. وەختێو ماچا مافوو ئینسانی، باس جە یاسێوی مکەرمێ، کە مافوو چەمپەنەکەوتەی و مافە سەرەتاییەکێش چەنەنێ تا زیندانیێ ئیسفادەش چەنە بکەرا. وەلێ موینمێ دەوڵەتوو تورکی بە کەردەی گۆشەگیری یاسا میاننەتەوەییەکا پاشێلێ مکەرۆ. ئۆجالانشا زینداننە وستەن چێروو گۆشەگیری و فشارێوی دژواریوە. بڕێ ئەوەکۆڵیایم دەربارەو دۆخوو ئۆجالانی زیندانەنە کەردەن.پەیم بەرکەوت ئۆجالان چندین ساڵێن بە تەنیا ژوورێوەنە زیندانیی کریان و جە گرد مافێوی زیندانیی بێبەش کریان. نمەبۆ بە هیچ جۆرێوە ئی دۆخەو ئیساتێ سەروو ئۆجالانی قبووڵ بکریۆ."
