مانگەو سورو کورڎسانی ھێزی جە ئەرەیاۋنێۋەنە باسش چانەی کەرڎ کە جە مەرزو پېشخابوریۊ جە مابەینو ۋەرنېشتوو پانېشتوو کورڎسانی جە دیمو پانېشتیۊ ڕا مەڎریۊ کە ھامکاریە مرۊیی و مېان نەتەۋەییەکۍ بلانە مەنتېقەکەو بیاوا بە دەسو ۋنەقۊمېایا بومەلەرزەکەو سوریای.

ئەرەیاۋناکەو مانگەو سوری پی جۊرەنە:

بە مەڵامەتو بومەلەرزەکەو ٦و شوباتېۊ کارەساتێۋی گۊرەی مرۊیی ئامانە ئاراۋە و زەرەرۍ گۊرە ۋەرو خەڵکو ھەرێمەکەی کۊت. گلێرگەی ھەرێمی و مېان نەتەۋەیی پۍ پێشکەش کەرڎەو ھامکاری ماڎی و مرۊیی بە ۋنەقۊمیایا بومەلەرزەکەی ھۊڵی فرەش وستەن گەڕ. ۋەرو ئانەی متمانەشا بە مانگەو سورو کورڎسانی ھەن، گەرەکشا بۍ چا ڕێۋە بیاوۊ بە ۋنەقۊمېیایا بومەلەرزەکەی چا ھەرێمانە.

بۍ ئانەی مەڵامەتەکەی بزانمۍ، ئاستەنگی فرە گۊرەما پۍ ۋەش کریان، پۍ نمونەی ڕۊو ٢١و مانگۍ قافڵەو ھامکاریە مرۊییەکاو پانېشتوو کورڎسانی جە پېشخابورۊ ڕاو پڕایۊیش پنە نەدریا پۍ ۋەرنېشتو کورڎسانی.

مانگەو سورو کورڎسانی ئی جۊرە قەرارا قبوڵ مەکەرۊو جە ھەمان ۋەختەنە بەبۍ واتایچش مزانۊ مافو ۋێشانە کە ئا ھامکاریەی جە لایەنو ئا گلێرگاۋە کە متمانەشا پنەشانە و کیاناش و مېاوناش پا مەنتېقا کە پێشا دیاری کریان.

ئا لایەنۍ کە ڕاگېری جە پڕایۊ ھامکاریەکا مکەرا ئەشۊ بلاوە وێشارە و پۍ یاۋناو ھامکاریەکا گرڎو ڕا مەرزیەکا کەراۋە.

ھ.ش