کۊمیتەو مېیانو پەکەکەی: داوا مەکەرمې بە عالی قەرارەکې کۊنگرەو ١٢ـەمو پەکەکەی هۊرسەنگنایشا پەی کریۆ و سەرکۆتانە جابەجێ بکریا، سەرو هێڵۊو ئاپۆیی ۋێتا تازە بکەرڎېوە و پەی پرۆسەی تازەی ئامادې بیدې، بیدې بە میلیتانې بە بڕیار و دەورو ڕابەر ئاپۆیرە گلېرې بیدېوە.
ئینەو واری کە وەڵاش مکەرمېوە دەقی نویسیاو کۆمیتەو مېیانو پەکەکەیا کە پێشکەش بە کۆنگرەو ١٢ـەمینو پەکەکەیش کەرڎ:
"پەی کۆنگرەو ١٢ـەمینو پەکەکەی!
هەمڕایا ئێژای
سەرەتا بەنامۍ کۆنگرەکەیماوە، بە وەشەسیای و حەسرەتۆ سڵام جە سەرمەشقو ئازادی گەلەکەیما، ئەرەمەرزنەرو پەکەکەی، ڕابەرو گەلو کوردی و گەلا، هەمڕاو حەقەتینەو ژەنا، شۆڕشگێڵن و زانای گۊرەو کۆمەڵایەتی، خوڵقنەرو تیۆرییەو شارستانیەتی دیموکراتیکی ڕابەر ئاپۆی مکەرمۍ، کە ماوەو ٢٧ ساڵان جە ئیمراڵینە مڎرامانێوە تاریخیش وەڵێوست، یاونایمێش پی کۆنگرەیە، بی بە بناغەو کۆنگرەو ١٢ـەمینیما و حازرش کەرد. هیواو سەرکۊتەی پەی گرڎو ئا کەسا موازمۍ کە پەی ئازادی بەڎەنی ڕابەر ئاپۆی ئەوەکۊشا.
کۆنگرەکەیما جە مانگۊو گوڵانینە کە مانگۊو گەشمەرڎانە ئەنجام مڎەیمۍ. جە ئیساتێنە ڕای گرڎی جە جبەرو دلېیچەنە بە مەراقێوە گۊرۆ چەمەڕاو ئی کۆنگرەینە. هەرپاسە ئینایمۍ ٤٨ـەمین ساڵیاڎو گەشمەرڎەبیەو حەقی کارەرینە. ڕابەر ئاپۆ ئی گەشمەرڎە و شۆڕشگێڵنە گۊرەشە پېسە 'ڕوحی پەنهانو ۋێش' پێناسە کەردەن. ئاشکرا و ڕۊشنا تەڤگەرما سەرو کۊڵەکۍ ڕابەرایەتی وەش بیەن و پارتەکەما پارتو گەشمەرڎان. سەرو ئی بنەمایۍ گرڎو گەشمەرڎە قارەمانەکاما بە ڕێز، وەشەسیایی و پنەزانایۆ یاڎ مکەرمېوە، کە جە هەمڕا کارەرۆ دەس پنەمکەرۆ، تا بیاوۆ بە ئەرەمەرزنەرا پارتیما عەلی حەیدەر قەیتان (فواد)ی و ڕەزا ئاڵتوونی، هەرپاسە جە ساکینە جانسزۍ (سارا)، تا گەشمەرڎۍ دماینۍ مڎرامانو زاپی بەسێ تێکۆشینە، میترا کاتۆ و گابار بۆتان کە ژمارەشا مېیاوۆ ٤٥ هەزارۍ. واوەی قەول مڎەیمۍ بە شێوێوە ڕاس خاوەنداری جە یاڎ کەردەیۊیشا بکەرمۍ، بیمۍ شۊنکۊتێشا و ئامانجەکاشا بە سەرکۊتەی تاجدار بکەرمۍ. جە لېوەتەرۆ دۆس و هەڤاڵۍ ئێژاما سری سورەیا ئۆندەر کە پەی کۆنگرەو ١٢ـەمینیما ڕەنجێوە گۊرەش دا. ١٢ساڵۍ ڕێک بەشدارو کۊششەکا ڕابەر ئاپۆی بۍ، هامکاریێوە گۊرەش کەرد. کاتێ پەی 'بانگەوازو ئاشتی و گلېرگەی دیموکراتیک'ـی هەرمانە کەرۍ جە ٣ۍ ئایارینە عەمرەو خوڎایش کەردە. پی بۆنۆ بە ڕێز و پنەزانایۆ گەشمەرڎەو ئاشتی و دیموکراسی سری سورەیا ئۆندەری یاڎ مکەرمېوە.
هەمڕایا ئێژای!
پېسە مزانیۆ کاتێ عومەر ئۆجالان جە ٢٣ۍ تشرینو یووەمو ٢٠٢٤ دیدارش چنی ڕابەر ئاپۆی ئەنجام دا، ئی پرۆسە دەسشپنەکەرڎ کە جە ئیسەنە یاونایمېش بە کۆنگرەو ١٢ـەمیی. زەمینەو ئی چەمپنەکۊتەیچە پېوەس بۍ بە قسەکا سەرۆکو گرڎیی مەهەپەی دەوڵەت باخچەلییوە. چی چەمپنەکۊتەینە ڕابەر ئاپۆ بە ڕای گرڎیش وات، 'ئەر دەرفەت بڕەخسیۆ، ئانە متاوو پرسو کوردی جە زەمینەو جەنگیوە فاڕووە پەی سەرو زەمینەی یاسایی و سیاسەتو دیموکراتیکانەی. هێزی تیۆری و پراکتیکی و بەدیئاردەی ئانەیم هەن.' دماتەر شاندێوە دەم پارتی کە سری سورەیا ئۆندەریچش چنە بۍ لوا ئیمراڵی و دیدارشا چنی ڕابەر ئاپۆی ئەنجام دا. پی جۊرە ئی پرۆسەو ئیساتۍ دەسش پنەکەرڎ. ڕابەر ئاپۆ جە سەرەتانە پەی پارتە سیاسییەکا تورکیای و دماتەریچ پەی ئێمە نامەش کیاست. چا نامانە ڕابەر ئاپۆ ئینەش وات: ۋەروئانەی پەکەکە دەوری تاریخیانەو ۋێش تەمام کەردەن مشۊم دمایی پا هەرمانو کۊششا بارۆ کە چېرو نامۍ پەکەکەینە مەکریا و دمایی بە ڕێبازو ئەوەکۊشای چەکڎاری بارۊنە. ئێمەیچ کاتێ جوابو نامەکەو ڕابەر ئاپۆیما داوە ئینەما وات: ئێمە متاومې کۆنگرە بینمۍ، بەڵام پەی قەرارو دمایئاردەی بە هەرمان و چالاکی و چەکنیایرەی مشۊم بەشێوێوە جە شێوەکا ڕابەر ئاپۆ بەشدارو کۆنگرەی بۆ.
دماتەر ڕابەر ئاپۆ بە 'بانگەوازو ئاشتی و گلېرگەی دیموکراتیک'ی داواش ۋنەکەردیمۍ کۆنگرە بینمۍ، چا کۆنگرەنە قەرارو دمایئاردەی بە هەرمان و چالاکییەکاما و ئەوەکۊشای بە ڕێبازو چەکڎاری دمایی پنە بارمۍ. چا بانگەوازە تاریخیەنە دەسنیشانش کەرد گرڎ ۋەرپرسیاریۍ جە ئەستۆ گێرۆ. پی مەڵامەتۆ ئێمەیچ جە ١و ئادارینە ئەرەیاۋنێوەما وەڵا کەردۆ؛ پەی ئانە بتاومۍ هامکاری چی پرۆسەو ئیساتێنە بکەرمۍ، ڕا ڕووەو پرۆسەکەیرە بکەرمېوە، ئایېربەسی تاکلایەنەما ئەرەیاۋنا و پەی ڕای گرڎیما وەڵاکەرڎۆ. دماو ئەرەیاۋنای ئایێربەسەکەیما جە دلۍ و جبەرەنە گفتوگۆیی ۋەرفراوانش سەر وەش بی. پەی ئانەی فرە بەعالی پرۆسەکەی پەی گەلی و دۆساما ڕۊشن بکەرمېوە بە ویرکەردەیۆ و پەیلواو ۋێماوە بەشدارۍ ئا گفتوگۆیا بیەیمۍ. هەرپاسە یاداشت و تێبینی گلېرۊبیە و ڕانوماییەکا ڕاوەبەرو پەکەکەی و پاژکیما کیاست پەی تەمامو بەشەکا پارتەکەیما. هەروێش گرڎو ئەندام و نوێنەرا کۆنگرەکەیچ ئی حەقەتینیە مزانا.
ئینسان متاوۆ واچۆ جە ٢٧و شوباتیوە ئانە دووۍ مانگۍ و حەفتێوە تەماما جەنگێوە سیاسی و دەروونی گۊرە ڕاوەبەر مکریۆ. سەرەڕاو گرڎو فشارەکا کۆمارو تورکیای و دەسەڵاتو ئاکەپەی؛ جە هەڵوێسو ۋێما پاشەکشەما نەکەرد، تەئکیدما کەردۆ مشۊم ڕابەر ئاپۆ بە جۆرێ جە جۊرەکا بەشدارو کۆنگرەی بۆ. ۋێش دەرەنجام ئانەی ئشیۍ کریۍ هەر بە بەشداری ڕابەر ئاپۆی ئۍ ئاراوە، بەدەر چینەی ڕێوەتەرە نەبۍ. ۋەرو ئی مەڵامەتیە گفتوگۆی فرە سەرو ڕێبازەکەی کریا. جە دمادماینە ڕابەر ئاپۆ ئاگاداری و هۆشیاریش دا، کە فرە ۋێما بە ڕێباز و شێوازو بەشداریکەردەکەیۆ سەرقاڵ نەکەرمۍ. چی چوارچێوەنە ئاژەو ئیساتێما پەسینا. پېوەس بە کۆنگرەکەی پەیلوا و دیدگای پەنەوازو ڕابەر ئاپۆیما بە دەس یاوا. گرڎو بەشەکا کۆنگرەی ئینەی مزانا. کۆمیتەو ئامادەکاریچ جە لایەنو ڕاوەبەریماوە ئەرکدار کریا، ئی ڕێبازەشە بە گونجیا نیارە. جە ئاکامەنە بڕیاردریا سەرو داواکا ڕابەر ئاپۆی کۆنگرەو ١٢ـەمینی بینیۆ و قەرارەکاش بڎۆ.
سەرو ئی بنەمایۍ پېسە بەرگنۆ جە بنەمانە کۆنگرە جە لایەنو ڕابەر ئاپۆیۆ ئامادە کریا. گوزارشتەو بنەڕەتی کۆنگرەی، هەرپاسە سیاونویس-قەرارو کۆنگرەی 'دیدگا و نامەکۍ ڕابەر ئاپۆینۍ'. بە کوڵی و پوختی ئا قەرارۍ کە هۊرشا گېرمۍ، مەڵامەت و دەرەنجامەکێش دلۍ (ماتریاڵ) دیدگاکاو ڕابەر ئاپۆینە هەنۍ. ماتریاڵەکۍ ئیساتۍ پەی یاواینە سېرکەرێنۍ. پۊکەی پەنەوازیێوە پا جۊرە نمەمەنۆ کە پەیلوا و سەرنجما بڎەیمۍ. هەرپاسە پەنەوازش بە واوەی کەردەیۆ نییا، ئا چێوۍ جە لایەنو ڕابەر ئاپۆیۆ باسکریێنۍ دیسانەوە باس بکریاوە. دماو ئانەی ئی ماتریاڵۍ یاوۍ کەش، گەرەکما بۍ دەربارەو پرۆسەو ئیساتۍ ڕۆو ئارۊیما زانیاری بڎەیمۍ سەرو ئانەی کە چی پرۆسەنە جە لایەنو ئێمۆ چېش کریان و نزیکایەتیێوە چنین گیریانە ۋەر. پۊکەی بە پوختی ئی چێوا وزمېنە ڕووە.
هەمڕایا ئێژا!
ئاشکران کە کۆنگرەو ١٢یما کۆنگرێوە چامنە نیا بتاومۍ باسو ئەوەکۊشای پراکتیکی بکەرمۍ، پرسەکاو ئەوەکۊشایما تاوتوێ بکەرمۍ و پەرە بە چارەسەری بڎەیمۍ و قەرار بڎەیمۍ. بەپێچەوانۆ ئامانجو ئی کۆنگرەیە ناستەی ڕێکوستەبیەو پەکەکەیا. واتا ئی کۆنگرە ڕا پەی سەردەمێوە تازەی مکەرۊوە. زانیان نامۍ پەکەکەی جە کۆنگرەی یووەمەنە جە ٢٦-٢٧و تشرینو دووەمو ١٩٧٨ی دیاریکریا. ئیساتۍ کۆنگرەو ١٢ی تەنیا ئی نامۍ نمەواڕۆ، واتە تەنیا نامۍ پەکەکەی نمەوارۊ، فاڕیای گرنگ جە تێگەو تەڤگەری ئاپۆیینە مەکەرۆ، کە بناغەو ئی تێگە و نزیکایەتییەکەش جە نەورۆزو ساڵۊو ١٩٧٣ هەنگامەش پەی نریا بۍ. ئیساتۍ پی کۆنگرەیە سەردەمەکەش دمایش مۍ، سەردەمێوە تازە دەس پنەمکەرۆ. ئی کۆنگرە جە ئەوەکۊشای ئازادی و گلېرگەی دیموکراتیکەنە ڕا پەی سەردەمێوە تاریخی مکەرۆوە. لەبەر ئەمەش پەنەوازا ئینسان ئی ٥٢ ساڵەیە جە گرڎ گۆشەنیگێوە هۊرسەنگنۆ و دەرەنجامە پەنەوازەکا جە ۋەنە دۆڵەمەڼەکاشۆ بە دەس بارۆ.
ڕابەر ئاپۆ ئی ٥٢ ساڵە، قۆناغ و تایبەتمەندی و ۋەنە پراکتیکییەکێش بە شێوێوە ۋەرفراوان، جە وەرگریننامەکاشەنە وستەن ڕووە. مشۊم ئی ماتریاڵا هەمیشە واوەی و یەرەبارە بوانمېوە پەی ئانەی بیمۍ خاوەنو ئی زانابیە بەقیمەتەیە. بەتایبەت پەکەکە جە کام هەلومەرجەنە بەرکۊت، هەرپاسە وەڵۍ بەرکۊتەو پەکەکەینە، جە کوردەسان، ۋەرکۊتوو مېیامینی و جەهانی ئاژە چنین بۍ، دلۍ ئەوەکۊشای ٥٢ ساڵەینە جە کوردەسان و جە جبەرو کوردەسانینە وەڵێکۊتە و فاڕیایۍ چنین بۍ ئینسان مشۊم بە دروسی و عال چا هەلومەرجەیە بیاوۆنە. پېسە ئەنجامی ئارۆ پەکەکە جە کۆنگرەو ۋێشەنە دمایش پا هەرمانا ئارڎ کە بەنامېشۆ مکریا؛ یانی بە مەڵامەتو هرووژم و داواو بڕۍ هێزیۆ ئینەی نمەکەرۆ. مشۊم وەڵۍ گرڎ چێوێنە ئی حەقەتینیە بە ڕۊشنی بوینمۍ، بە عالی چنەش بیاومېنە و حەجگیز جە یاڎش نەکەرمۍ. عال سەرنج دەیدۍ، پەکەکە، چا ڕوۆ کە سەرشهۊردا تا ئیساتۍ، نە دلېنەشیەن و نە شکسش ئارڎەن، سەرەڕاو ئانەی دژمنەکېش هەمیشە هەوڵو دلېنەبەردەی و تەسفیەکەردەیشا دان. پەکەکە دژو گرڎو هرووژمەکا مڎرامانش کەرڎ و سەرو پەیا ۋێشۆ مردان و سەرکۊتەی گۊرەی تاریخیش بەدەسئارڎەن.
جە لېوەتەرۆ، پا جۊرەی ئیساتۍ پەکەکە جە بڕۍ تێگە و ڕێبازی بنەڕەتینە فاڕیایش سەرەرە مۍ، حیچ کەسێ نمەتاوۆ ۋەرو تێگە و ئا ڕێبازا کە ٥٢ ساڵۍ چێوەڵی جابەجێ کریۍ، پەکەکەی تاوانبار بکەرۆ. هەلومەرجو ئا سەردەمەیە پاسە بۍ، هەلومەرجو ئا کاتەیە جە لایەنو پەکەکەیۆ وەش نەبی، بەپێچەوانۆ پەکەکە دلۍ ئا هەلومەرجانە بنیاڎنریا. هەرپۊکەی پەکەکەیچ سەرو ئا ڕێوە ڕاپیمایش کەرد، بەڵام پەکەکە ئارۆ بڕۍ چێوۍ بە غەڵەت موینۆ. هەرپۊکەی گەرەکشا فاڕیای بکەرۆ. بێگومان ئینە پا مەعنۍ نییا کە جە سەرەتاوە غەڵەت بیەن، پەکەکە سەرو بنەمێوە غەڵەتی پەرەش سانان و تێگەکەش غەڵەت بیەن.
بە پێچەوانۆ ٥٢ ساڵۍ چێوەڵی پەکەکە، جە کوردەسانەنە پېسە تەڤگەری، ئازادیوازتەرین بزاڤ، وڵاتپارێزن و شۆڕشگێڵن سەرشهۊردان و وەڵۍ کۊتەن. ڕابەر ئاپۆ پېسە ۋەرەتاوی جە کوردەسانەنە بەرئامان و وڵاتەکەماش ڕۊشن کەردۆ. سەرو ئی بنەمایە وەڵێکۊتەی گۊرە و ماناڎار جە کوردەسانەنە بەدیئامان. پی ئەوەکۊشا تاریخیە سەرجەنۆ سەرڕاسکریانۆ، دمایش بە تاریخو دلېنەشیەی ئارڎ و ڕاش ۋەردەمو تاریخو ئازادی بیەینە کەردۆ. ئەر ئارۆ پەکەکە چی ئاستەنە شۊنەو فاڕیایۍ ڕیشەیی کۊتەبۆ، ئینە خوڵقنەری، ئازایی پەکەکەی نیشانە مڎۆ، هەرپاسە ئانەی نیشانە مڎۆ کە چنە کراوەن پەی فاڕیای. ئارۆ پەکەکە گەرەکشا ئا ڕێبازەیە پۊڕنۆ، ئیتر دەوری تاریخی ۋێش تەمامنان. پۊکەی ئی شێوازۍ ئیتر خزمەت بە وەڵێکۊتەی و ئاژەی تازەی نمەکەرۆ. نمەتاوا ئا جۆرە ڕێبازەو ئەوەکۊشای و ڕێکوستەی دەرباز بکەرا، بەرەو فاڕیای ملا، نمەتاوا سەرهۊردای تازە بکەرا، ۋێشا تازە بکەراوە و ۋێشا جە دۆگماتیزمی ڕزگار بکەرا.
چی ٥٢ ساڵەنە ئا چێوۍ کە ڕابەر ئاپۆ و پەکەکە جە کوردەسانەنە پەی گەلو کوردی، ژەنا و گرڎو چېردەسا کەردشا نکۆڵیش چنە مەکریۆ، پېسە ڕابەر ئاپۆ واتش، تەنیا زاڵمەکۍ متاوا نکۆڵی چی حەقەتینیە بکەرا. ڕابەر ئاپۆ و پەکەکە، ڕاسی کورد و کوردەسانیشا وست ڕووە کە چېرو هرووژمی ئەرەگیر-قڕکەردەینە بۍ، پارچە پارچە کریابۍ، وڕا بۍ. ڕابەر ئاپۆ و پەکەکە بیۍ بە ڕۊشنایێوە گۊرە جە دەورو حەقیقەتی و پرسو کوردینە، ئی پرسەشا بە گرڎ کەسۍ ئشناسا و پاسشا کەرد بیاوانە. سەرو ئی بنەمایۍ ڕابەر ئاپۆ پەی کوردەسانی بیەن بە ۋەر، پەکەکەیچ بی بە تەڤگەرو ویر و زانا بیەی.
پەکەکە، جە ١٨و ئایارو ١٩٧٧ینە کاتێ حەقی قەرار تیرۆرکریا، جە دژو ئی هرووژمەیە پېسە حەقکەردەیۊیۍ شۆڕشگێڵنانەی وەڵێکۊت، بە مڎرامانو حیلوانی و سێوەرگی جە کوردەسانەنە دلۍ گەلینە ئەرەپڕایۍ تازەو ئازادیوازی دەسشپنەکەرد. هەرپاسە پەکەکە، جە دژو کودەتاو فاشیستی-سەروازی ١٢و ئەیلولی جە زینانەنە و جە جبەرۆ مڎرامانش ڕێکوست و ئەنجامش دا. مڎرامانی گۊرەو زینانەکا، بەتایبەتی ١٩٨٢ مڎرامانو ڕۊچۍ مەردەی گۊرەی، مڎرامانو ١٤و تەمموزی کە پېسە داستانێوەنۍ دلۍ گەلینە. کاریگەری ئی مڎرامانەیە سنوورەکۍ کوردەسانیش پۊڕنۍ، جە هەرێمەکە و جەهانەنە وەڵابیۆ. ئەر ئینسانێوە داراو ئاوەزێوە خراپی نەبۆ، بە نامووس بۆ، نمەتاوۆ دەربارەو ئی مڎرامانە فیداییە گۊرەیە چێوۍ نەرێنی واچۆ.
جە لېوەتەرۆ ئی مڎرامانە بە قەڵمبازی ١٥و ئابی جە کەشەنە پەرەش پنەدریا و بەردەوام بی. سەرەڕاو گرڎو کەموکوڕی و غەڵەتەکا و سەرەڕاو پراکتیکەکا جبەرو هێڵۍ هیچ هێزێوەتەر جە جەهانەنە نییا کە بتاوۆ پېسە گەریلاو ئازادی کوردەسانی سەرو هێڵۊو فیدای ئەوەکۊشای بکەرۆ. چی جەنگەنە ئینسان تەنیا بە ویر و باوەڕ، بە زانابیەی وڵاتپارێزنی، جە دژو ئی قڕکەردە دڕندەییە سەرو هێڵۊو فیدایی ئەوەکۊشای ئەنجام مڎۆ. نمەبۆ ئی قڕکەردەیە جە یاڎ بکەرمۍ کە جە هەمانکاتەنە ۋێش مسپارۆ بە سیستەمو سەرمایەداری. جگە چانەیچ قڕکەرو ئیساتۍ بە هیچ جۊرۍ دڎان بە یاسا و ڕێسای یاسایی و ئەخلاقیرە نمەنیۆ، بە ڕێباز و ئامرازگەلێوە کە ئینۍ جبەرو یاسا و ئەخلاقیۊ، جەنگ مکەرۆ. خاسا، کێ متاوۆ قسۍ نەرێنیۍ سەرو گەریلێوە پا جۊریە بکەرۆ؟ ئەر کەسێوە ئاوەزش جە دەس نەڎابۆ و نامووسش بۆ، نمەتاوۆ هیچ چێوۍ نەرێنی سەرو ئی گەریلایە واچۆ.
ڕۊشنا کە ئینۍ گرڎ جە لایەنو ڕابەر ئاپۆیۆ وەشکریێنۍ. ۋەرو ئینەیچ ڕابەر ئاپۆ، جە پەرەپنەدای مڎرامانی و گەریلاینە ویرکەرەوێوە گۊرەن. کەس باوەڕش پنە نەکەرۍ، واچێنۍ 'ئا چێوۍ شمە ماچدێشا جە کوردەسانەنە دروسێنۍ، بەڵام سەرەڕاو ئینەیچ ڕابەر ئاپۆ دیدگای بەهێزو ۋێش پەی بەدەسئاوردەی سەرکۊتەی گۊرش نیشانەو گرڎ لایۍ دا. سەرو ئی بنەمایۍ مڎرامانو حیلوان و سێوەرگی، هەرپاسە مڎرامانی گۊرەو زینانەکا و ١٥و ئابی، هەڵمەتۊو گەریلای، بی بە سەردەمو قارەمانی گەلو کوردی و کوردەسانی. ئا کاتە پەکەکە هەم تەڤگەرو ویر و زانابیەی بۍ، هەم ڕۊشنایی و هەم تەڤگەرو قارەمانی بۍ جە کوردەسانەنە. پی ئەوەکۊشایە قارەمانا شۆڕشو ژیۋای نەتەوەیی پەرەش سانا و شۆڕشو ئازادی ژەنا پەرەش سانا. بە ماڕای نکۆڵیکەردەی جە بیەو گەلو کوردی، گەلو کوردی سەلەمیا، پڕۆسەو بیەی و ئەنەیاوای و ۋێشناسای کوردی دەسش پنەکەرڎ و پرۆسەو ڕێکوستەی و ئەوەکۊشای پەی ئازادی جە کوردەنە پەرەش سانا.
حەرچڼە جە ما بەینو ساڵەکا ١٩٩٣-١٩٩٨ینە بڕۍ چێوۍ واوەی بیێوە، گەریلا جە دژو هرووژمو دلېنەبەردەی و تەسفیەکەردەی کۆمارو تورکیای مڎرامانێوە فرە گرنگش پەرەپنەدا. چا سەردەمەنە ئا دەسکەوتۍ بە دەسئامۍ بێنۍ، بە مڎرامانێوە چامنە پارێزیۍ. ڕابەر ئاپۆ جە ساڵۊو ٢٠٠٣ پارادایمش فاڕا. پۊکەی هەڵمەتۊو ٢٠٠٣ هەم جە تاریخو پەکەکەی و هەم پەی مرۆڤایەتی گرنگیێوە فرەش هەن. پەکەکە بە فاڕیایۍ پا جۊرە جە پارادایمو دەسەڵاتی و دۊڵەتی بڕیارە، پی جۊرە یاوا بە پارادایمو ئیکۆلۆژی، ئازادیوازی ژەنۍ و گلېرگەی دیموکراتیکی. جە حەقەتینەنە چێوۍ جە پراکتیکەنە ئارۊ گەرەکمانە ئەنجامش بڎەیمۍ ئینەنە. دماو فاڕای پارادایمی، ڕابەر ئاپۆ بی بە ڕابەرێوە جەهانی، جە ئەوەکۊشایۍ مرۆڤایەتینە گەلو کوردی، ژەنی و جوانۍ کوردی بیۍ بە هێزێوە سەرمەشق. چی ٢٠ ساڵەنە پەکەکە ئاستو فاڕیایش پېسە پەنەوازی جابەجێ نەکەردەن. ئینەیچ یۊن جە کەموکوڵییە سەرەکییەکا پەکەکەی. بێگومان پەی ڕاگیریکەردەی جە فاڕیایۍ پا جۊریە کۆمارو تورکیا و دەسەڵاتو ئاکەپەیچ هرووژمشا کەرڎ سەر. جە ۋەرا ۋەرو ئا هرووژمانە تەنیا بە مڎرامانی گۊرەو گەلی و گەریلای دەسکۊتەکۍ پارێزیۍ.
چی ئیساتۍ بە کوڵیی باسو ۋېیەردەی مکەرمۍ؟ چونکی کاتێ باسو کەموکوڵی و غەڵەتەکا ئا سەردەمەیە مەکریۆ مشۊم ۋەرو کەموکوڵی و غەڵەتەکا ئا کاتیە نزیکۍ ۋېیەردەی نەبیمېوە، نکۆڵی جە حەقەتینەکا نەکەرمۍ. مزانمۍ ئیساتۍ پېوەسێنمۍ بە ڕۆژەڤو ئا هەرمانا بەنامۍ پەکەکەیۆ مکریا دمایشا مۍ، بڕۍ کەسۍ گەرەکشانە ڕاسی ئیساتۍ پێچەوانە بکەراوە. ئانۍ هەر جە سەرەتاوە دژایەتی پەکەکەی کەرێنۍ، گەرەکشانە پی بۆنۆ نکۆڵی جە ڕاسی پەکەکەی بکەرا. مشۊم بزانا دژمنا قەسەم واردۍ ڕابەرایەتی و پەکەکەی ئینۍ دامەنە، هەرکات دەرفەتشا بۆ هرووژم مکەرا. مشۊم ئی حەقەتینیە عال بزانا تا بتاوا جە دژو هرووژمەکا بە هۆشیارییوە مامەڵە بکەرا و ئەوەکۊشایۍ کاریگەر ئەنجام بڎا. هەرپاسە ڕەخنە-ڕەخنەداین پەرەبسانۆ، مشۊم ئینە چنی هرووژمی تێکەڵ نەکریۆ، پەنەوازا جیاشا بکەراوە پەی ئانەی بتاوا جە دژو هرووژمەکا پی جۆرە ئەوەکۊشای بکەرا. جە لېوەتەرۆ پەنەوازا جە دژو نەتەوەپەرەسی کوردی و هرووژمەکا سیستەمو جەنگو تایبەتی تورکی هۆشیار و بە تەدبیرۍ بیمۍ.
هەمڕایا ئېژای
کاتێ پەکەکەی هۊرسنگنمۍ، موینمۍ لایەنە ئەرێنییەکێش فرە زیاتەرێنۍ. ئینە جە هیچ کاتێنە، بە هیچ جۊرۍ نکۆڵیش چنە نمەکریۆ. جە حەقەتینەنە گەلو کوردی و دۆساش بە تایبەت ژەنی و جوانۍ کوردی فرە عال ئی حەقەتینیە مزانا. پۊکەی پەنەواز نمەکەرۆ چێوە فرە باسش بکەرمۍ. ڕابەرایەتی و پەکەکە جە ٥٠ ساڵی ۋېیەردەنە مۆرەو ۋێش سەرو تاریخو کوردەسانی دان. بنەماو ئا کوردایەتییەی ڕزگارش بی، سەرو بناغەو ئازادی سەرجەنۆ زینەش کەردۆ. کورد چی سەردەمەنە یاوان بە زانابیەی، ڕێکوستەی و چالاکی. بەکوڵی پەکەکە، جە لایەنی تاریخی کوردیوە جە ئەڎابیەیۍ تازەن و جە کوردەسانەنە بی بە زانایی کوردبیەی ئازادی تازەی. سەرو ئی بنەمایە ژیۋای ئازاد و گلېرگەو نەتەوەی دیموکراتیکی جە کوردەسانەنە بەدیئامان.
ڕاسی و تایبەتمەندی سەرەکی پەکەکەی ئینەنە، بەڵام ئینە پا مەعنۍ نییا کە پەکەکە گرڎ چێوێش بێ کەموکوڵی کەردەن. بێگومان فرەو چێویچ هەن نەکەردەنش، غەڵەت و کەموکوڵیچش هەن. بێگومان ئینۍ گرڎ پەی ئێمە مژارۍ ڕەخنە و ڕەخنەداینینۍ. ئەر سەرەتا ئینەی شڕۆڤە بکەرمۍ غەڵەت نمەبۆ: ئا پراکتیکۍ بەنامۍ پەکەکەیۆ ئەنجام دریێنۍ بەپاو هێڵۊو ئاپۆی کەم و لاواز مەنێنێوە. بە مانا پراکتیکەکە بە پاو هێڵەکۍ لاواز بیەن. جارجارە پراکتیکەکۍ جبەرو هێڵەکێچۆ وەشۍ بێنۍ. ڕابەر ئاپۆ ئی ئاژەشە پی جۊرە بەربڕی: 'تەنیا متاوو سەڎەنە پەنجو ویرۆکەکام وزونە بوارو پراکتیکیوە'.
کاتێ سەرو پراکتیکی وەڵینی هەڵوێسە مکەرمۍ، موینمۍ مڎرامانو سێوەرگی جە ۋەرا ۋەرو هێڵەکێنە غەڵەتا، هەرپاسە کاتێ ڕووەما کەردە کەشی، گەرەکما بۍ جە چالاکی تاکەکەسیوە دەربازۍ گەریلایەتی بیمۍ، غەڵەت و سەختی جدی وەش بی. زانیان کە سەرو بنەماو قەڵمبازی ١٥و ئابی جە دژو گەریلای نزیکایەتی وەرتەسک، زینانی کەردەی سەپیا. هەرپاسە جە سەرەتاو ساڵۊو ١٩٩٠ینە ئشیۍ گەریلا بە هرووژمېوە ستراتیجی سەرکۊتەیۍ سەروازی بەدەس بارۆ. ئی مژارە پرسێوە گرنگا کە مشۊم هۊرسەنگنایش پەی بکریۆ. بێگومان هەڵوێسو تەڤگەرو شۆڕشگێڵنی تورکیای و هێزە سۆسیالیستییەکا جەهانیچ جە دەرەنجامەکا ئیساتێنە دەورێوە دیارشا بۍ، بەڵام چۍ کەموکوڵیەکۍ گەریلایچ کاریگەریێوە گۊرەشا سەرو ئەنجامەکا وەشکەردەن. بەمەڵامەتو غەڵەتی و کەموکوڵیەکاوە، گەریلا نەتاواس بۆ بە هێزو چارەسەری. جە ساڵۊو ١٩٩٠ ی گەریلا نەتاواش سەرکۊتەی سەروازی بەدەس بارۆ، هەم نەتاواش ڕا پەی چارەسەری سیاسی بکەرۊوە. بەرکۊت پەکەکە بە پارادایمو دەوڵەت-نەتەوەی نمەتاوۆ بە ئەنجامێ بیاوۆ. پی مەڵامەتۆ فاریایۍ تیۆری-ئایدیۆلۆژی کۊت ڕۆژەڤۆ. بێگومان پېوەس پی ڕۆژەڤەیۆ فاڕیای ستراتیژی سەپنۊنە، بەڵام پا جۊرەی فاریایۍ چامنە وەش نەبی، ڕابەر ئاپۆ ئی ئاژەیە بە مەڵامەتو چەقبەستەیی ئیساتۍ نامۍ بەرۆ. بە مەڵامەتو ئی پراکتیزەی وەڵۍ گنۆ ئاژێوە پېسە 'واوەی بیەیۆی زیاڎیە' پێناسە مکەرۆ و ماچۆ ' ئەشیۍ پەکەکە چا سەردەمەنە فاڕیایش جە ڕێکوستەی و و ستراتیجی ۋێشەن کەردەبیۍ'.
ۋەرو ئینەیچ، پەکەکە نەتاواش ۋەر بە پیلانگێڵنی مېیاننەتەوەیی و پیلانگێڵنیی ١٥و شوباتی گێرۆ. پەکەکە جە ۋینای، ئەنەیاوای و ئەوەکۊشای جە دژو پیلانگێڵنیی مېیاننەتەوەینە کەموکوڵی و غەڵەتی فرە جدیش کەرد. پی مەڵامەتۆ پیلانگێڵنی ١٥و شوباتی کۊت پراکتیکۆ و سیستەو ئەشکەنجەدای، گۆشەگیری و قڕکەردەی ئیمراڵی پەرەش سانا. هەرپاسە جە ئەوەکۊشای دماو پیلانگێڵنینە غەڵەت و کەموکوڵی جدی ڕووەشدا. بە مەڵامەتو ئی ئاژەیۆ تەسفیەکەردەی ساڵۊو ٢٠٠٢-٢٠٠٤ چا کاتەنە نەوینیا و ڕاش ۋنە نەگیریا. ڕابەر ئاپۆ، ئی ئاژەشە بە فارای پارادایم و تازەکەردەیۆ پێكئاماو پەکەکەی، تەسفیەگەراش تەسفیە کەردۍ.
٢٠ ساڵۍ سەرو بنەماو پارادایمو شارستانیەتی دیموکراتیکی پراکتیک لواڕاوە. چی پرۆسەیە نە هەم چێوگەلۍ نەکریێنۍ هەنۍ. مشۊم ئی لاوازیا بە عالی بوینمۍ. چونکی وەنەکۍ ئی پرۆسەیە ماناڎارتەر و گرنگتەرێنۍ پەی ئارۊی و ئایندەی. پەی ئینەیچ، بە تایبەت ئەنداماو ڕاوەبەری مشۊم گرڎو کادرەکا پارتی بە شێوێوە یۊگێرتە و قوڵ نزیکۍ ئی پڕۆسەیە باوە، ڕەخنە و ڕەخنەدایۍ ئەنجامگیرش سەر بکەرا، جە وەڵۍ کۊتەی پراکیتیک یان پراکتیکی وەنەی ڕاس و سېرکەر بە دەستبۍ کە بتاوۆ سەرو ئی بنەمایۍ ۋێش پەروەردە و تازە بکەرۊوە. پەی چێشی؟ چونکی بەشدارا پڕۆسەکەو ۋەردەمیما و سەرکۊتەی پڕۆسەکەی سەرو ئی بنەمایە بە دی مۍ. هەرپاسە ئا ئاژەی ئارۊنە سەرو بناغەو پارادایمی تازەی وەڵۍ گنۆ، بەهەمان شێوە جە ساڵۊو ١٩٩٠ینە سەرو بناغەو پارادیمی کۆنی وەڵێکۊت. واتا ئا پراکتیکەی سەرو بناغەو پارادایمی تازەی وەڵۍ گنۆ پاسە سەرکەوتە نیا. ئەر ئا پراکتیکە سەرکەوتە بیۍ، ئیساتۍ ڕووبەڕوو پڕۆسێوە چامنەی نەبێنمېوە. پی جۊرە فرەو وەختی ئی حەقەتینەما بە وشەی 'نەلایمۍ دلۍ پارادایمی تازەی' بەربڕمۍ.
کاتێ لایێجە لە ٢٠ ساڵی ۋېیەردەی مکەرمېوە، ئینۍ مونمێشا: ئشیۍ پارادایمی تازە زیاتەر جە گلېرگەی نزیکما بکەرۊوە، بەڵام چی پرۆسەنە سەرەڕاو ئانەی کە تەڤگەرەکەما جە ڕوو جەماوەرییوە گۊرەبیەن، کادرەکۍ فرەتەر چی پڕۆسەنە جە گەلی بڕیێبێنێرە. پەیوەندیشا چنی خەڵکی پڕچیان. هەرپاسە ئەشیۍ چی پڕۆسەنە گلېرگەیی بیەی، ژیۋای و ڕێکوستەبیەی کۆمیناڵی فرەتەرین پەرەش پنە بڎەیمۍ، بەڵام بە پێچەوانۆ چی قۆناغەنە ماددە پەرسی پەرەش سانان. عال سەرنج دەیدۍ، ئا ئەوەکۊشایە ئایدیۆلۆژیۍ سەرو بنەماو مۆدێرنیتەی دیموکراتیکی وەڵۍ گنا، هوشیاری و ژیۋایۍ پاسە کاریگەر پەرە پنە نمەڎا، بەشداریێوە ئاڼنە بەهێز جە شۆڕشەنە نمەکەرا. کەسایەتیێوە گلېرگەیی بەرهەم نمارا. لیبرالیزمو مۆدێرنیتەی سەرمایەداری بەشێوێوە بەهێز سەرهۊرمڎۆ، کۊشش جە دژو ئاوەزیەتو پیا سالاری و ژیۋای ئازادی کە سەرو بنەماو ئازادیی ژەنۍ پەرەمسانۆ، فرە لاواز مەنەنۆ. بەپوختی ئایدۆلۆژیا نمەبۆ بە یانەو گلېرگەی، پېوەس پی ئاژەیۆ پەروەردە و ڕێکوستەی گلېرگەی وەڵۍ نمەگنۆ، هەرپۊکەی لاوازیێوە جدی جە سەرمەشقینە هەن.
ڕۊشنا کە جە پۊڕنای کۊششەکا جەماوەرینە نمەتاومۍ پاسە بە شێوێوە ڕاس پەروەردە و ڕێکوستەبیەو گلېرگەی دیموکراتیکی بەرەو وەڵۍ بەرمۍ، پۊکەی نمەتاومۍ کۊششەکا بنیاڎنیای بەهێزتەر بکەرمۍ. گرڎ چێوۍ پېسە ئەرەمەرزیێوە بیرۆکراتی بیەیش هەن، بەڵام نەواخنشا هاڵیا یان بە ئاراسەو دۆڵەتی و دەسەڵاتیرە ملۆ. تێگەکا پارادایمی تازەی بەکار بەرمۍ، بەڵام کاریگەری تایبەتمەندییەکا پارادایمی کۆنی ئینا وەڵتەرۆ. جە سیاسەت و دیپلۆماسینە بە شێوێوە بە هێز نمەتاومۍ هێڵۊو گلېرگەیی بەرەو وەڵۍ بەرمۍ، چی مژارەنە بە لاوازی مەنمېوە. یان نمەتاومۍ ئی کۊششەیە بکەرمۍ یان نمەتاومۍ سنوورو دۊڵەتی و دەسەڵاتی پۊڕنمۍ. هەرپاسە نەتاواما دلۍ گەلینە پېوەس بە مېڎانی سەروازی پەروەردە و ڕێکوستەبیەی پارېزنای جەوهەری وەڵۍ وزمۍ، جە کەشیچەنە جە گلېرگەی بڕیۍ و بە تەمامی تەوقەدریۍ؛ ئی ئاژە هەم جە دەسداکاماش زیاتەر کەرد هەم کاریگەری سیاسی جەنگیماش لاواز کەرد، هەرپاسە کاریگەری پڕوپاگەندەو جەنگو ئێمەش کەمکەردۆ. تاوەکو لوۍ مېڎانو جەنگی ۋەرتەسکتەر بێوە. ئیتر جەنگەکە بە تەنیا جە چوارچێوەو ئی سنوورە ۋەرتەسکەینە متاویۆ بە شێوێوە کاریگەر بلۊڕاوە.
حەرچێوۍ واچمۍ، ئینۍ گرڎ ئانەما نیشانە مڎا کە جە لایەنو هۆشیاری و شێوازو پارادایمی تازەیما بە بنەما نەگرتەن، دەربازو ژیۋایما نەکەردەن. ۋەرو ئینەیچ سەرچەمەو سەختییەکا ئارۊی پی حەقەتینیۆ لکە دریێنۍ. هەڵمەتەکۍ ڕابەر ئاپۆیچ پېوەس پی ئاژەیۆ و مشۊم پی جۊرە هۊرش سەنگنمۍ. سەرو ئی بنەمایە مشۊم بە ڕەخنەداینێوە حەقەتین و سېرکەر ۋێما سەرڕاس بکەرمېوە و تازە بکەرمېوە کە بتاومۍ پەی پڕۆسەی تازەی ئاماڎۍ بیمۍ. مشۊم گرڎو هەڤاڵا بزانا کە ئێمە سەرو ئی بنەمایۍ ئینایمۍ پرۆسەو ڕەخنەداینە. کاتێ ڕابەر ئاپۆ ماچۆ 'کۆنگرە چن مانگۍ بەردەواما، مشۊم ۋێما تازە بکەرمېوە'، مەبەسوە ئاڎیی ئی حەقەتینەنە. جە بنەڕەتەنە مشۊم هەڵوێسو ڕابەرایەتی کە وەڵێکۊت پېسە دەسوەردایۍ هۊرسەنگنمۍ، سەرو بنەماو ڕاسپاردەی تازەی ۋێما بە ڕەخنە و ڕەخنەدای بە هێز پۊڕنمۍ. دماو ئی ساتەیۆ سەرو ئی بنەمایۍ متاومۍ چنی ڕابەرایەتی ڕاپیمای بکەرمۍ و پەنەوازیەکا پڕۆسەکەیچ جابەجێ بکەرمۍ.
هەمڕایا ئېژای!
بێگومان چی پرۆسەنە جە ڕوو ئەنەیاوای و جابەجێکەردەی پارادایمو مۆدێرنیتەی دیموکراتییوە کێشە وەش بی، بەڵام ئی پرسۍ، غەڵەت و کەموکوڵیۍ، ئانەی نمەیاونا کە چی پرۆسەنە ئەوەکۊشایۍ شۆڕشگێڵنانە ئەنجام نەدریان. نمەبۆ پی جۊرە یەک لایەنە و بە زوانو نکۆڵیکەردەی تەماشە بکریا. ئینە ڕاس نییا. پێچەوانەن، چی ٢٠ ساڵەو دماینە سەرو بنەماو پارادایمی تازەی کۊششی فرە گرنگ ئەنجام دریان و ئەوەکۊشای فرە گۊرە کریان. بەتایبەت چی ئەوەکۊشاینە هرووژمەکۍ پیلانگێڵنی مېیاننەتەوەیی مەڕیۍ و ڕا جە سەرکەوتەو پیلانگێڵنییەکەی گیریا. پی جۊرە پیلانگێڵنییەکە پوچ کریاوە. هەرپاسە چی پرۆسەنە پارتەکەما گۊرەتەر بی، دلۍ گلېرگەینە زیاتەر وەڵا بیۆ. بەتایبەتی شۆڕشو ئازادی ژەنۍ دەسکەوتێوە فرە گۊرەش بەدەسئارڎ. ئەوەکۊشای ئازادی دلۍ هەر چوار بەشو کوردەسانیرە وەڵا بیۆ، کاریگەریچش سەرو گرڎو ۋەرکۊتوو مېیامینی و جەهانیرە وەڵا بیۆ. مڎرامانەکەو داعشیش ماڕا پەی گرڎو مرۆڤایەتی بی بە هیوا و جۆش و خرۆشێوە تازە.
چی ٢٠ ساڵەنە ١٠ساڵی یووەم جە ئەوەکۊشایۍ گۊرەنە بە تاکتیکی فرەلایەن ۋېیەرد. هەرپاسە ١٠ ساڵی ۋېیەردە بە مڎرامانو جمېیەرەکەیما، گەلەکەیما و دۆساما جە دژو هرووژمە فاشیستیە-کۆمکوژییەکا، کە دژمن گەرەکش بۍ سەرو بنەماو 'پلانەو چۆکدایرەی' تەڤگەرو ئازادیما دلېنە بەرۆ، ئەوەکۊشای پەرەش پنە دریا. چی پڕۆسەنە گەریلا سەرەتا جە زاپ و هەرێمەکا پارېزنای میدیای و سەرانسەرو کوردەسانینە مڎرامانێوە فیداییانەش ڕاوەبەر کەرڎ. جە ئاکامەنە گەریلا بە جەنگو ۋێشا هرووژمە فاشیستیە-کۆمکوژییەکېشا ماڕۍ و پلانەو ئەرەگیراشا پوچە کەرڎۆ. جەنگ هەرپاسە جە مەڕاکانە پەرەش ئەسا، سەرەتا جە زاپ و هەرێمەکاو پارېزنای میدیاینە، کاریگەرییەکێش یاوۍ بە قولەپۊپە. گرڎو ئا هرووژما کە بە پاڵپەشتی ناتۆی ئەنجامدریۍ، بە جەنگو تیمی و مەڕەکاوە شکسشا ئارڎ. گەریلا بە هێزو جەوهەری ۋێش بە تەکنیکو ۋێش جە دژو هەواڵگری و تەکنەلۊجیاو دژمنی پەرەش بە ۋێش دا و سەرو ئا بنەمایە 'پلانەو تەسلیمبیەیشا' پووچە کەردۆ. بە سەرمەشقایەتی مڎرامانو گەریلای قارەمانی، جمېیەرەکا ژەنا و جواناما، گەل و دۆساما سەرەمڕە ئەوەکۊشایشا کەرڎ. جە ١٠و نۊۋەمبەرو ٢٠٢٣ێنە، هەڵمەتۊو ئازادیی جەهانی دەسش پنەکەرڎ، بە مەعنێوەتەر، هەم ئەوەکۊشای ئیساتۍ و هەم پەرەئەسای هەڵمەتۊو ئازادیی جەهانی، هرووژمەکۍ دژمنیشا ماڕۍ. جە ئاکامەنە دژمن ناچار بی سەرەمڕە گنۆ ۋەرو پەیا ڕابەر ئاپۆی. بێگومان هەم کۆنگرەو ئیساتۍ و هەم پرۆسەی تازەو پېوەس پی ئەوەکۊشای و هەڵمەتېوە گەشەش کەرد. بێگومان ئی ئەوەکۊشایە نەتاواش دەسەڵاتو ئیساتۍ وڕنۆ و بەرەو سەرکۊتەیما بەرۆ. بەڵام جە ڕاو ئی ئەوەکۊشا گۊرەیۆ، سیاسەتی فاشیستو، ئەرەگیری و کۆمکوژییەکۍ دژمنی هۊرشێویێوە و قەیران و گرژییەکۍ دەسەڵاتیش قووڵتەرۍ کەردێوە، پۊکەی دەسەڵاتو تورکیای ناچار بی چنی ڕابەر ئاپۆی گنۆ گفتوگۆ. پۊکەی ئەنجام و وەڵێکۊتەیەکۍ ئیساتۍ نەک گولانۍ نیەنۍ بەڵکم دەسکەوتێوە گۊرەش شۊنەو ۋێشەرە ئارڎ و زەمینەش پەی پرۆسېوە چامنەی ئامادە کەردەن.
جە لېوەتەرۆ، ۋەروئانەی جەنگی جەهانی یەرەم جە ۋەرکۊتوو مېیامینینە بە خێرایی پەرەش ئەسا، ئاژەکە بە جۆرێوە بۍ کە جە ٧و نۊۋەمبەرو ٢٠٢٣ێنە جەنگو غەززەی دەسش پنەکەرڎ، حەماس و حیزبوڵا بە مەڵامەتو هرووژمەکا ئیسرائیلیوە گورزەی قورسەشا ۋەرکۊتە، ڕژێمو بەعسی جە سوریانە وڕا و شەپۆلەو فاڕیایەکا یاوا ۋەرو بەرەو ئێرانی و تورکیای، زەمینەش پەی پرۆسێوە پی جۊرەو ئیساتۍ ڕەخسنا. پا مەڵامەتۆ تەرسی مەنەیۆ دۊڵەتو تورکیای کۊت ڕۆژەڤو دەسەڵاتداراوە. واتە کاتێ جمېیەرەکەما و گەلا تورکیای جە دلېینەنە فشارەکېشا پەی دیموکراسی زیاڎ کەردۍ و سیستەمو سەرمایەداریی مېیاننەتەوەیی جە جبەرۆ داواو فاڕیایش جە تورکیای کەرد، دەوڵەت باخچەلی مەجبوور بی هەنگامە بنیۆ. پۊکەی چا چوارچێوەنە بانگەوازش کەرد.
یانی پڕۆسەو ئیساتۍ بە مەڵامەتو ئی ڕووەدایە سیاسی و سەروازییاوە پەرەش ئەسا. ڕابەر ئاپۆیچ هەم بەمەڵامەتو کاریگەریی مڎرامانو گەلی و گەریلای و هەم بەمەڵامەتو کاریگەرییەکا جەنگو جەهانی یەرەمیوە جوابو بانگەوازییەکا دەوڵەت باخچەلیش داوە. بەپوختی قۆناغەو ئیساتۍ هەم جە ڕوو ئایدیۆلۆژی، جە ڕوو ڕێکوزیایۆ و هەم جە ڕوو ستراتیجیوە گرنگیێوە فرەش هەن و سەرو وەڵۍ ئامایە سەروازی و سیاسییەکا ڕووەشدان. هەرپاسە ئی حەقەتینە بە شێوێوە ۋەرفراوان جە لایەنو ڕابەر ئاپۆی و جمېیەرەکەیماوە هۊرسەنگنایش پەی کریان. پۊکەی ئاژەو ئیساتۍ جە لایەنو گرڎو هەڤاڵاوە مزانیۆ. بەڵام چی پرۆسەنە مشۊم ئی حەقەتینۍ جە یاڎ نەکریا و سەرو ئی بنەمایە شۊنیرەلوای پەی وەڵێئامای و فاڕیایەکا کە سات بە سات ڕووەمڎا، بکریۆ.
هەمڕایا ئێژای
ئارۆ ڕێک دماو کۆنگرەو ١١و پەکەکەی، ١٢ ساڵۍ ۋېیەرد و کۆنگرەو ١٢و پەکەکەی ملۊڕاوە. بەپاو بنەما سەرەکیەکا دلێینەی، ئەشیۍ چی ١٢ساڵەنە ٢کۆنگرۍ تەرۍ بینیێنۍ. حەرچڼە بەین بەین کۆمیتەو ئامادەکاریما پەی کۆنگرەی ئەرکدار کەرێنمۍ، بەڵام کۆنگرە نەبینیا. پەی ئینەیچ دوۍ مەڵامەتۍ هەنۍ: "یۆشا پەیوەندیش بە ئەمنیەتیوە بۍ. بەڵام ئینە مەڵامەتی سەرەکی نییا. مەڵامەتی سەرەکی ۋۍ بە ڕێکوستەکەردەی نەبۍ سەرو ئاستو کۆنگرەی."
پېسە مزانیۆ کۆنگرەو ١١ی بە ئەرکو ڕابەر ئاپۆی وەڵێکۊت. ئەشیۍ کۆنگرەی تازە پەی ئانەی ئی ئەرکە تاریخیا بەدی بارۆ کەوتەبیۍ ڕۆژەڤۆ. بەڵام جە پرۆسەی ۋېیەردەنە نەتاواما بە تەمامی ئی سەرکۊتەیە بەدەس بارمۍ. بە مەعنێوەتەر نەتاواما زەمینەو کۆنگرەی تازەی پەی ڕابەر ئاپۆی ڕاخسنمۍ. پۊکەی جە ئاستو کۆنگرەینە نەتاواما بیاومۍ بە قەراری تازەی. ئێمە بەین بەین قەرار و پلانۍ پەی کۆنگرەی نیێنمێرە، بەڵام جە ئاکامەنە نەتاواما جابەجێش بکەرمۍ. پەی پەرەپنەدای ئەوەکۊشای سەرو بنەماو ستراتیجی جەنگو شۆڕشگێڵنیی گەلی، پەنەوازما بە گلېرۊبیەو کۆمیتەو مېیانی و هەرپاسە کۆمیتەو ڕاوەبەریچ بۍ. بێگومان ئێمە چا چوارچێوەنە هەتا پەنەواز بۍ گلېرۊبیەو کۆمیتەو مېیانی و کۆمیتەو ڕاوەبەری ئەنجامدریا. پی جۊرە قەراری پەنەواز چا گلېرۊبیانە پەی مڎرامانی تاریخی دەس نیشان کریا. جە ڕاو ئا گلېرۊبیاوە ئانڼەی کە پەنەواز بۍ، هەم ئەوەکۊشای و هەم ڕێکوستەیما جە ئاستێوە بەرزەنە ۋەرچەم گێرێنمۍ. بێگومان ئاژەو ئیساتۍ پەی ئێمە مەبۆ بە مژارو ڕەخنە و ڕەخنەدای. چی مژارەنە کەموکوڵی و لاوازی هەن. هەرپاسە سەرو ئی بنەمایە جە پرۆسەکەی نزیکۍ بیمېوە. پەنەوازا سەرو بنەماو کەموکوڵی و غەڵەتەکاما هۊرسەنگنای بکەرمۍ، هەرپاسە مەڵامەتو کەموکوڵییەکا و غەڵەتەکا ئاشکرا بکەرمۍ پەی ئانەی بتاومۍ جە بوارو پراکتیکی ئیساتێنە جە ئاستێوە عالەنە ئەوەکۊشای بەرز بکەرمېوە.
ئیساتۍ دماوا ١٢ساڵ هەلومەرجو کۆنگرەو ١٢و پەکەکەی وەش بیەن. ڕابەر ئاپۆ سەرجەنۆ کۊتەنۆ ڕۆژەڤ و زەمینەو کۆنگرەیش ئامادە کەردەن. سەرو ئی بنەمایۍ مشۊم عال بزانمۍ چنی یاوایمۍ بە کۆنگرەو ١٢هەمی و بە شێوێوە عال جە مانا تاریخیەکېش بیاومېنە. ئیساتۍ کۆنگرەو ١٢ی دماو، ٤٧ ساڵا، ئنەو کۆنگرەو یوەمیما گرنگ و تاریخیا. بێگومان ئی کۆنگرە سەرو بنەماو ئەوەکۊشای ٤٧ساڵەو پەکەکەی بەرهەم ئامان. پۊکەی جە کۆنگرەو یووەمی فراوانتەر و مانادارتەرا. بە کۆنگرەی یووەمی، حیزب بە فەرمی ئەرەمەرزیا و دەسوەردایۍ تاریخی بنەڕەتی جە دژو دلېنەبەردەی نەتەوەیی دەسشپنەکەرڎ، سەرەتاو تاریخێوە تازەو ئازادی بۍ. هەرپاسە کۆنگرەو ١٢دمایی پی قۆناغۍ مارۆ کە سەرو ئا نامۍ و ڕێکاراوە لوواڕاوە و سەردەمێوە تازە جە تاریخو ئازادینە دەس پنەمکەرۆ. کۆنگرە ڕاش پەی گەلو کوردی ڕۊشنە کەردۆ، ئیساتۍ کۆنگرەو ١٢ی هەم پەی گەلو کوردی و هەم پەی گرڎو گەلا چېردەسەی، بەتایبەتی ژەنا و جوانا و گرڎو مرۆڤایەتی پەیام و بانگەوازیش هەن. ئی کۆنگرە ڕا پەی ئەوەکۊشایۍ تازەی پەی ئازادی گرڎو گەلی و گەلا چېردەسەو جەهانی مکەرۊوە. هامکات پی کۆنگرەیە پەکەکە دمایی بە کار و کۊششیش مارۆ، گرڎو ئا چالاکییا کە بەنامۍ پەکەکەیۆ ئەنجام مڎریا مردانە و ئەوەکۊشای چەکڎاری پېسە ستراتیجی بنەڕەتی دمایش پنە مۍ. بە ستراتیج و ڕێکوزیای تازە، جە گرڎ بوارێنە ڕاو ئازادیی کوردی مەکریۆوە، ڕاو ئەوەکۊشاو گلېرگەو دیموکراتیکی مەکریۆوە. ئەر بە وردی تەماشە بکریۆ پەیما بەرگنۆ کە پەکەکە تەنانەت پېسە نامێچ جە ڕوو بناغەو کۆمەڵایەتی و پرەنسیپە ئایدۆلۆژییەکاو پارادایمو مۆدێرنیتەی دیموکراتیکیوە جوابدەر نییا. سەرو ئی بنەمایۍ، ئێمە جە چوارچێوەو فاڕیای پەنەوازینە، فاڕیای فکریی و تازەبیەیۆ ڕێکوزیایما بە عالی پەرەش پنەنەدریان؛ پۊکەی ئیساتۍ ڕابەر ئاپۆ دەسوەردای چی ئازەنە مکەرۆ و جە ڕاو کۆنگرەیۆ، دمایی بە پەکەکەی مارۆ و کۆتایی بە ئەوەکۊشای چەکڎاری مارۆ. ڕابەر ئاپۆ پی هەڵوێسە ڕادیکاڵانا ڕا پەی گفاڕیای و تازەبیەیۆ مەکەرۆوە. ڕابەر ئاپۆ تەنانەت ۋێش فاڕان، سەرو ئی بنەمایۍ ئیسە گەرەکشا پەکەکە و ئێمەیچ فاریەیمۍ؛ پی فاڕیایە گەرەکشا گلېرگە و سیستەمیچ فاڕیۆ. پەنەوازا پېسە ۋێش جە گرڎو ئی حەقەتینا بیاومېنە، هەرپاسە جە هەقەتینەکا کۆنگرەو ١٢ ی بیاومېنە و سەرو فاڕیایەکارە سەرۍ گنمۍ هەتا بتاومۍ بە شێوێوە بەهێز دەس بە پرۆسەی تازەی بکەرمۍ.
هەمڕایا ئێژای
فرە ڕۊشنا کە دمایی ئاردەی بە پەکەکەی دمایی بە جمېیەرو ئازادی شۆڕشگێڵنانەی نمارۆ، بەپێچەوانۆ بۆ بە سەرەتێوە تازە. جمېیەرو ئاپۆیی دمایی پا سەردەمەیە مارۆ کە بەنامۍ پەکەکەیۆ تا ئیساتۍ لووان ڕاوە، پەکەکەی جە یاگۍ تاریخیەو ۋێشەنە منیۆرە و پی جۊرە سەردەمێوەتازەو ئەوەکۊشای مکەرۆوە. سەرەتا مشۊم گرڎما فرە عال ئی حەقەتینیە بوینمۍ و سەرو بنەمێوە ڕاسی بە دروسی چنەش بیاومێنە. بێگومان پەنەوازا سەرو ئی بنەمایۍ ۋێما تازە بکەرمېوە پەی ئانەی بتاومۍ ۋێما پەی پرۆسەی تازەو جمېیەری ئاپۆیی ئامادە بکەرمۍ.
ئێمە گرڎما عال مزانمۍ پەی چێشی فاڕیایۍ پاسە بنەڕەتی پەنەوازا. ئێمە جە ئیساتێوە ٢٠- ٣٠ ساڵێن ئینایمۍ دلېڕاسەو فاڕیایۍ پا جۊرەینە. ڕابەر ئاپۆ گەرەکش بۍ بە ئایێربەسەکەو ١٧و ئادارو ١٩٩٣ فاڕیایۍ ستراتیجی پا جۊرە ئەنجام بڎۆ، بەڵام بە بڕۍ مەڵامەتۍ نەتاواما ئینەی بەدەس بارمۍ. ڕابەر ئاپۆ، جە ساڵەکا ١٩٩٠ینە، گەرەکش بۍ بە هۊرسەنگنایەکاش سەبارەت بە سۆسیالیزمی جە ڕوو ئایدۆلۆژیی و ڕێکوستەیۆ فاڕیای بکەرۆ و زەمینەو فاڕیایۍ پا جۊریە دەسپنە بکەرۆ. هەرپاسە گەرەکش بۍ قەیرانەو ڕێکوستەی- فیکریی کە بەمەڵامەتو سۆسیالیزمی پێکئامایوە پەرەش سانابۍ پۊڕنۆنە. هەرپاسە دماو پیلانگێڵنی ١٥و شوباتی، چېرو سیستەمو گۆشەگیریی، ئەشکەنجەی و قڕکەردەو ئیمرالینە، هەرمانەش پەی پۊڕنای ئا قەیراناو ئیساتۍ کەرد، پۊکەی سەرو ئا بنەمایۍ ۋەنایۆ و شۊنیرەلوایەکێش قووڵتەرۍ کەردێوە. جە ساڵۊو ٢٠٠١ ی ڕابەر ئاپۆ بە پارێزنامەو جە دۊڵەتو کا‌هێنی سۆمەرییوە پەی شارستانیەتی دیموکراتیک' ی داواو فاڕای نامې پەکەکەیش کەرد. جە سەرەتاو مانگۊو نیسانو ٢٠٠٢ بە بینای کۆنگرەو ٨ نامەکێش فاڕیا پەی 'کادەکی' و کۊت ڕۆژەڤۆ.
ڕابەر ئاپۆ قەیرانەو ئایدیۆلۆژی و ڕێکوزیایی بە قووڵبیەیۆکاش جە پرۆسەو ٢٠٠٣ -٢٠٠٤ و بە فاڕای پارادایمی، ۋېیەرنۊنە. سەرو ئا بنەمایۍ پەکەکەس سەر جە نۆ پێناسە کەردۆ و جە گرڎی گرنگتەر تازەبیەیۆ پەکەکەی پېسە ڕاوجایۍ جە جئەوەکۊشای دژ بە هۊرشێونایۆ وست ڕۆژەڤۆ. جە پارێزنامەکەیشەنە بە نامۍ "پارېزنای گەلی"، بنەما سەرەکییەکۍ ۋێش بە وردی جە "مانیفێستو گلېرگەی دێموکرات"ینە بە پارادایمو ئیکۆلۆژی، ئازادی ژەنۍ و گلېرگەو دیموکراتیکی ڕۊشنکەردۆ. جە حەقەتینەنە ئەشیۍ جە ماوەو ئی ٢٠ساڵەینە جە ڕوو ئایدۆلۆژی، ستراتیژی و ڕێکوستەی و فاڕیای بە پاو پەنەوازی پارادایمی دەسش پنە کەردەبیۍ و ۋێما تازە کەردەبیێوە. ۋەروئانەی نەتاواما ئی هەرمانۍ بە تەمامی ئەنجام بڎەیمۍ، ئی ئاژە پېسە فاڕیایۍ بنەڕەتی جە کۆنگرەو ١و٢ێنە وزیا رۆژەڤۆ.
هەرپاسە ئا فاڕییایەی کە نەتاواما جە رو هۆشیاری و ڕێکوزیایۆ بکەرمێش، جارێوەتەر بە ڕۊشنی جە مۊچیاریەکا ڕابەر ئاپۆی کە پەی کۆنگرەو ١٢هەمی کیاستەنش پێشکەش مکریۆ. پۊکەی پەنەوازا بەعالی جە گرڎو ئا چېوا بیاومێنە کە جە مۊچیاریەکەنە باس کریان. ئێمە پېسە ڕاوەبەری چنی ئینیشا گرڎ کۆکېنمۍ و سەرو ئی بنەمایە فاڕیای پەی ۋێما بەبنەما موینمۍ. ئێمە پېسە کادرا ئاپۆیی مشۊم بە عالی جە گرڎو ئا چێوا بیاومېنە و سەرو ئی بنەمایۍ شۆڕشێوە دەروونی، ویژدانی و شۆڕشێوە کەسایەتی ئەنجام بڎەیمۍ.
ڕابەر ئاپۆ بەشێوێوە ڕۊشن ئا قەرارا وزۊ ڕووە کە پەنەوازا کۆنگرەو ١٢ ی سەرش بلۆ. هەرپاسە بە ئاشکرا مەڵامەتەکایچش وزۆ ڕووە. ڕابەر ئاپۆ جە ڕۊشنکەردەیۊیێنە کە چی ئاژەو ئیساتۍ جە ڕوو تیۆری سۆسیالیستی و شێوازو ئەوەکۊشایۆ پەنەوازا، دیسان ئەرەیاۋنۆش کە سۆسیالیزمی دەوڵەتپەرس و جەنگکەر بە پراکتیکو سۆسیالیزمو پێکئامای کۊتەن چێرو کاریگەرییوە، پۊکەی گلېرگێوە سۆسیالیستی دیموکراتیک مشۊم سەرو بنەماو سیاسەتو دیموکراتیکی بنیاڎ بنریۆ. چا چوارچێوەنە زیاتەر سەرنجش سەرو گرنگی ئەوەکۊشای سۆسیالیستی و ڕێکوستەی ئینتەرناسیۆنالیستیا.بێگومان ئی ئاژە چنی کاریگەری سەرو پەکەکەی و کوردەسانی مکەرۆ سەرش مردۆ، هەرپاسە ئا ئاژەی کە جە کوردەسانەنە بە ئەوەکۊشای پەکەکەیۆ سەرش هۊردان بە وردی ڕۊشن مکەرۊوە. ماچۆ، ئیساتۍ بیەو گەلو کوردی بە مڎرامانو پەکەکەی کۊت ڕۆژەڤو گرڎو جەهانیوە. پۊکەی ئیساتۍ پەکەکە دەوری تاریخی ۋێش بەئەنجام یاونان. ئیساتۍ ئیتر چارەسەرو کێشەو ئازادی ئینا ۋەردەممانە. ئینەیچ سەرو بنەماو سیاسەت و ئەوەکۊشای دیموکراتیکی چارەسەر مەکریۆ.
ئا چێوۍ کە ڕابەر ئاپۆ سەبارەت بە پرسو کوردی و کوردەسانی باسشا مکەرۆ فرە ڕۊسنۍ و کراوێنۍ، پۊکەی پەنەوازا زیاتەر سەرنج سەرو ئی مژارا بۆ و عالتەر چنەش بیاومېنە. ڕابەر ئاپۆ بە دڵنیاییوە دژو ئایدۆلۆژی دەوڵەت نەتەوەیا. پۊکەی بە دڵنیاییوە ئا چارەسەرا قبوڵ نمەکەرۆ کە سەرو بنەماو دەوڵەت نەتەوەی پەرەشا پنە بڎریۆ. ۋەروئانەی جەنگو ئازادیی نەتەوەیی چارەسەری دەوڵەت نەتەوەی مکەرۆ بە بنەماو ۋێش، پۊکەی بەتەمامی دژایەتیش مکەرۆ. پۊکەی جە پرسو کوردینە، یاگۍ چارەسەری دەوڵەت نەتەوەینە، چارەسەرو نەتەوەی دیموکراتیکی بەبنەما گێرۆ. سەرو ئی بنەمایە، جیای ستراتیجو جەنگو ڕزگاریوازی نەتەوەیی، ستراتیجو ئەوەکۊشای سیاسەتو دیموکراتیکی پێشکەش مکەرۆ. پەنەوازا وچیۆ کە هەلومەرجو ئەرەمەرزنای پەکەکەی و سەردەمو ئیساتێما پېسە یۊی نییا، دیسان ۋەروئانەی ڕابەر ئاپۆ پارادایمش فاڕان، فاریای جە بەرنامە و ستراتیجی سەرەکینە وەش بی.
ڕابەر ئاپۆ جە کۆنگرەو ١٢هەمینە گەرەکشا بڕۍ قەرارۍ پەسینیا. هەرپاسە مەڵامەتو هۊرگېرتەی ئی قەرارایچە وزۆڕووە. ئینسان متاوۆ بە وردی ئی مەڵامەتا باس بکەرۆ. ئی مەڵامەتۍ بە شێوێوە ڕۊشن، جە سەرنج و نامەو ڕابەرینە ئامان. پۊکەی پەنەواز نمەکەرۆ ئی مەڵامەتۍ واوەی بکریاوە. پەنەوازا جە گرڎو ئی ویرۆکە ڕاسا بیاومېنە و وزمێش ڕووە. ئەر بتاومۍ ئینەی بکەرمۍ، ئانە متاومۍ بە عالی جە حەقەتینەکا ڕابەر ئاپۆی بیاومېنە و بە شێوێوە دروس هۊرشگێرمۍ و بە سەرکۊتەیی جابەجێش بکەرمۍ. ئەر بتاومۍ بیاومۍ ئی ئاستە، ئانە بە تەمامی جە مەرامو ڕابەر ئاپۆی مېیاومېنە. مەڵامەتو وەڵێکۊتەیەکا ئی سەردەمیە موینمۍ، هەرپاسە وردتەر و قووڵتەر جە پرۆسەکەی بیاومېنە؛ ئەر ئینە ڕووەبڎۆ، ئێمە تا دما نەفەس دلۍ جۊش و خرۆشو ئی پرۆسەینە بەردەوامۍ بیمۍ و مژیومۍ.
هەمڕایا ئێژا
پەکەکە نامیەتەرین دەنگدایۆ تاریخیش جە کوردەسانەنە خوڵقنان. پەکەکە بییەن بە نامێ قارەمانا کوردی، نامێ ئازایەتی، فیداکارا کوردی. سەر و بنەماو ئازادی ژەنی نوێنەرایەتی بییەی و ژیوای ئازادی مکەرۆ. حەقیقەتو کوردی سەر و بنەماو هێڵە و ئاپۆیی سەر جەنۆ خوڵقنۆوە. جە کوردەسانەنە بە بییە و پەکەکەی، ئازایەتی، فیداکاری، پاڵپشتی و هاببەشی سەر و هێڵە و کەرامەتیو شکۆمەندی پەیوەس بییەن و فیداکاریی دیسان ماناو وێشا بەدەس ئاردۆ. جمیەرە و ئاپۆیی، بەنامێ پەکەکەی، گرڏ و ئا چێوێشە خوڵقنێنێ و ئیسە بە کۆنگرەو ١٢هەمی بە حەرفە و ئاڵتونی سەر و تاریخو کوردەسانی ئی حەقیقەتا منوسۆوە کە ئینێ گرڏ بە ئیرادە و قەرار و وێشۆ مکەرۆش، پەی ئانەی تاوۆنە جە ژیوای ئازاد و گلێرگەی دیموکراتیکەنە زیاتەر بەرەو وەڵێ بلۆنە. پەکەکە هەمیشە جە تاریخەنە یاڏش بەرز ڕاگیریۆ و جە تاریخو کوردەسانینە پێسە و قارەمانێوە حەقەتینەی و جمیەرەی ئازادی پەی گرڏ کاتێ مەنۆوە.
فرە ئاشکران کە تاریخ و پەکەکەی میراتێوە فرە گۆرە و بەهێز پەی گەلوو کوردی و جمیەرە و ئازادی شۆنە و وێشەرە جیامازۆنە. ئیسە ئی میراتە چی سەردەمە تازەنە وسیۆنە بوارو جابەجێ کەردەیۆ و هەمیشە ژیوایێ ئازاد و گلێرگێوە دیموکراتیک جە کوردەسانەنە بەرە و وەڵێ بەرۆنە. ئەر پەکەکە بە شێوێوە ڕاس نوێنەرایەتی کریۆنە و میراتەکەش بە شێوێ دروس بەکار بارۆنە، وەڵکەوتەی دیموکراتیک و ئازادیوازەکا جە ئایندەنە زیاتەر سەر هورمرانە.
خاسا ئینێ چنین وەشێ بانە؟ بێگومان هیچ چێوێ جە وێشۆ ڕووەمەرۆ، پۆکەی ئینێچ نەوێش دروس مەبۆنە. بێگومان گرڏ چێوێ بە سەرمەشقایەتی ژەنا و جوانا بە هێزی جەوهەری گەل و ئیرادەو وێشا بەدی مێ. بەڵام هەڵای ڕۆڵو کادرا سەرمەشقی، کە تاوۆنە نوێنەرایەتی ڕاس و چالاکی بکەرۆ، یەکلاکەرەوە بۆنە. بە واتێوە تەر ڕۆڵ و ئەرکو شۆڕشگێڵە فیداییە چنەئاماکا دمایش نمێ، بە پێچەوانە ئەرکە گۆرە و جەوهەرییەکە جە ئیسە بە دماوە دەس پنە مکەرۆ. جا کاتەنە مشۆم گرڏ سەر و ئی بنەمێ وێشا پەروەردە بکەرا و جە ڕاو ڕەخنەدای وێشا تازە بکەراوە و سەرو ئی بنەمێ پرۆسەی تازە دەس پنە بکەرا. پەی ئینەیچ مشۆم بەشێوێ بەهێز و وریایی سەر و پارادایمو ئاپۆیی مدرمێ. هەرپاسە هەڵوێستێوە ئایدیۆلۆژی و ڕێکوزتەی فرە بەهێز پەنەوازا. ئینسان مشۆم تاوۆنە بە ستراتژ و تاکتیکی جیاواز هێزو ئەوەکۆشای و خوڵقنای بەهێز نیشانە دۆنە. بەتایبەت جە پڕۆسەی تازەنە، بەبێ هیچ ڕێکوزتێوە و ڕاوەبەردێوە فەرمی، مشۆم ئینسان تاوۆنە ڕاوەبەری هزر و ئایدۆلۆژی سەر و ڕێکوزتەی مدرنۆنە و سەرکەوتەی بەدەس بارۆنە. پەی گرڏ و ئینشا پەنەواز سەر و بنەماو ویر و بڕوێ بەشداربییە و وێما گۆرە تەر بکەرمێ.
هەمڕایا ئێژا
پەنەوازا ئێمە جە تاریخی حەقەتینەو ۋێما بیاومېنە و چی مژارەنە بە ویستو ۋێما نزیکۍ نەبیمېوە، ۋێما هۊرنەخەڵەتنمۍ. کاتێ تەماشەو تاریخو ۋێما مکەرمۍ، موینمۍ کە سەرەتا ئاپۆچی بیەی بۍ. ئاپۆچی بیەی، هۆشیاری، شێوازو ژیۋای، ئایدۆلۆژی، ڕێکوستەی و هێڵۊو چالاکیما بۍ. ڕابەر ئاپۆ کاتێ واتش: "نامۍ ۋێمم دێنە پی جمېیەرەیە". مەبەسو ئاڎیی ئینە بۍ. جمېیەری ئاپۆیی سەرەتا ۋێش بە "جمېیەری شۆڕشگێڵنی کوردەسانی" ئشناسا، دماتەر بە "یۊبیەی جوانا شۆڕشگێڵنو کوردەسانی" و دماجاریچ پارتو کرێکارا کوردەسانی- پەکەکەی و دەسش بە ئەوەکۊشای کەرد. ڕێکوزیا و سیستەمی جۆراوجۆرش جە بوارە جیاجیاکانە پەی پراکتیزەکەردەی هێڵۊو ئاپۆیی بنیاڎ نیا. سەرو ئی بنەمایۍ، پېسە ڕابەر ئاپۆ واتش: "جە چوارچێوەو "تۆڕەو بەڕێکوستە بیەینە" ، گلېرگەو کوردینە بە هەزار و یەک لکە جە چوار بەشو کوردەسانی و جبەرو وڵاتینە ڕێکوزیێوە بەهێز چی ئاستەنە وەڵۍ کۊت. بێگومان ئیساتۍ چنی دمایی ئاردەی بە پەکەکەی گەلو کوردەسانی بێ ڕێکوستەی نمەمەنۊوە. ئەر چێوۍ چامنە ڕووە بڎۆ کورد نمەمەنۆ و ڕووبەڕوو دلېنەشیەی بۊوە. پەنەوازا بزاندۍ کە گلېرگەی کوردی خاوەنو ڕێکوستەی و چالاکی ۋێش بۆ. چی چوارچێوەنە بە دڵنیاییوە نمەبۆ بە غەڵەت بیاودێنە، نمەبۆ هرووژمەکۍ و جەنگی تایبەت کاریگەریتا سەر بنیۊرە و پەنەوازا بەردەوامۍ بیدۍ جە ئەوەکۊشای وێتا پەی ئاشتی و بنیاڎنیای گلېرگەی دیموکراتیکی کە پەی ئازاڎیی بەڎەنی ڕابەر ئاپۆی ئەوەکۊشۆ. بێگومان ئیتر کار و چالاکی بەنامۍ پەکەکەیۆ نمەکریۆ، بەڵکم ڕێکوزیا سیاسییەکۍ گلېرگەو کوردی بەردەوامۍ با، بەهێزتەر و ۋەرفراوانتەر ئەوەکۊشای ۋێشا ڕاوەبەر مکەرا. هەرپاسە ئەر هەلومەرجی عال وەش بۆ، ڕێکوزیاکۍ ئەوەکۊشای چەکڎاری، چەک منیارە و دمایی بە ئەوەکۊشای چەکڎاری مێنە. هەرپاسە هەوڵە کۆمەڵایەتی، سیاسی و ئایدۆلۆژییەکۍ دلۍ گلېرگەی بە ڕێکوستە بیەی دیموکراتیکی ۋێشا بەردەوامۍ با. هەتا ئا ڕێکوزیای کە هەن گۊرەتەر بۆ، بەپاو ئامانجو ڕێکوزیایما سەر جە نۆ ئەرەمەرزیۆراوە.
ئێمە کەسانێوە ئاپۆینمۍ. ئینە کە ڕۊشنا. ئەر بتاومۍ بیمۍ بە ئاپۆیێوە حەقەتینە و دروس، واتە ئەر بتاومۍ بە باوەڕ و ئەنەیاوای حەقەتینە پېسە حەقی و کەمالی، پېسە مەزڵومی و خەیریەکا، پېسە قەرەسونگوری و عەگیدەکا، پېسە هەڵمەتی، فوئادی و ڕەزاکا، پېسە سارا، بێریتان و زیلانەکا، پېسە نوودا، ڤیانۍ، شیرینۍ و شیلانەکا، پېسە دەلال، چیچەکۍ و لەیلاکا، بەشدارۍ ڕاسی ڕابەر ئاپۆی بیمۍ، ئا کاتە متاومۍ سەرو گرڎو سەختی و ۋەربەسەکارە سەرۍ گنمۍ و بە تەمامی چا پرۆسە تازەی کە ئینا ۋەرمانە سەرێگنمۍ. پۊکەی پەنەوازا گرڎما بە دڵ و گیان باوەڕما پی پرۆسەیە بۆ و پێگەو ژیۋایۍ پا جۆریە پەی ۋێما بەبنەما گێرمۍ و هەتا دما نەفەس بەردەوامۍ بیمۍ.
سەرو ئی بنەمایە هیواو سەرکۊتەی پەی کۆنگرەو ١٢هەمیما موازمۍ و دڵنیێنمۍ کە سەرۍ گنمۍ. هەرپاسە داوا جە گرڎو هەڤاڵا، سەرەتا نوێنەرا کۆنگرەی، هەڤالا ژەنۍ و پیای بە شێوێوە دروس و ڕاس جە بڕیارەکا کۆنگرەو ١٢ بیاوانە و بە سەرکۊتەیی وزا بوارو جابەجێکەردەیۆ، ۋێشا جە هێڵۊو ئاپۆیینە تازە بکەراوە، سەرو ئی بنەمایە ۋێشا پەی پرۆسەی تازەی ئامادە بکەرا، بانۍ بە ملیتانی بەبڕیارو هێڵۊو ئاپۆیی، سەرو ئی بنەمایۍ مشۊم بە ویر و باوەڕی ڕاس بەشدارۍ هێڵۊو ئاپۆیی با، هەرپاسە بەشیوێوە بەهێزتەر جە دەورو ڕابەر ئاپۆی ۋێشا ڕێکوزا!
پەکەکە کە ئازادی کوردی و سۆسیالیزمو گلېرگەی دیموکراتیکیش خوڵقنا، سەرەمڕە پەی هەمیشەی مژیۋۆ و یاڎش کریۊوە!
سەرو هێڵۊو ئاپۆیی کە هەمیشە ۋێش تازە مکەرۊوە، وەڵۍ گندۍ، سەرو هێڵۊو ئاپۆیی کە هەمیشە بەرەو سەرکۊتەی ملۆ، وەڵۍ گندۍ!
گەشمەرڎۍ نمەمرا!
بژیۋۆ ڕابەر ئاپۆ!
٤و ئایارو ٢٠٢٥
کۆمیتەو مېیانی پەکەکەی."
