پرۆفیسۆر فرانکۆ کاڤالی ئەرەیاوناش، کە مۆدێلو وەرنیشتی پەی گرڏیما نمونێوە ناوازەن و ئانەش وست ڕووە کە کوردەکێ ئینێ دۆخێوە فرە دژوارەنە تاوانشا سیستمێوە دیموکراتیک بنیادبنیا و پەی سەران سەرو جەهانی با بە نمونە. پرۆفیسۆر فرانکۆ کاڤالی ئانەیشش وست ڕووە کە ئاڏێ بەمەڵامەتوو نیازەکا ئەردۆغانی پەی قڕکەردەی نیگەرانێنێ و واتش، "جەهان و دیموکراتیکی مشۆم زیاتەر جە ئیسەنە پەی پارێزناو وەرنیشتی ئەوەکۆشۆنە".

دمابەدماو وڕناو رژێمو بەعسی سوریانە و ئامای سەرو هەرمانەو بەرەو تەحریرو شامی (هەتەشە)، تورکیا و چەتەکێش هرووژمەکێشا پەی سەرو سەرنیشتوو وەرکەوتوو سوریای چڕکەردەنۆ و زیاتەر جە مانگێوەن جەنگاوەرا قەسەدەی جە بەنداو تشرینی و سردەو قەرەقۆزاقی وەرەنگارو ئا پەلامارا بیێنێ. زانای سویسری و چالاکوانو مافەکا مرۆڤی و سیاسەتمەدارو پرۆفیسۆر فرانکۆ کاڤالی جە قسەکاشەنە پەی ئاژانسو هەواڵو فوراتی (ANF) هۆرسەنگنایش پەی پێشئاماکا جە سوریانە کەرد.

'بڕوام بە زوانو نەرمو جیهادیستەکان نییا'

پرۆفیسۆر کاڤالی جەسەرەتاو قسەکاشەنە ئاماژەش پانەیە کەرد کە ئا رژێمە تازە جە سوریانە دروس بییەن جە تورکیایۆ نزیکا و وەڵێ مانگێ جاوەڵتەر هامشێوەو داعشی بە تیرۆریست نریێرە، بەڵام ئارۆ ئاڏێ زوانێوە نەرم بەکارمارانە، بەڵام من بڕوام پنەشا نییا. مەترسیدارترین چيو ئانەنە کە ئا دۆخە کاریگەری ئیسلامییەکاش نزیک جە داعشی زیاتەر کەردەن. رووەداکی ئی دماییا سوریانە هێزو ئەردۆغانیش زیاتەر کەردەن کە بەردەوام واچۆ، گرڏ چێوێ جە وەرنیشتەنە مشۆم دلێنەبریۆ".

'رەنگە ئەردۆغان داواو قڕکەردەو کوردا بکەرۆ'

پرۆفیسۆر کاڤالی سەرنجش کێشا پەی سەرو تەرسەکا پەی سەرو لایەنگرا دیموکراسی جە سوریا و کوردەکێ و جەختش چانەیەکەردۆ کە حەجگیز باوەڕش پانەیە نییا کە رژێمو تازەو سوریای دیموکرتیک بۆنە، مافەکاو ژەنا یان کەمەینەکا پارێزنۆنە. پرۆفیسۆر کاڤالی جە درێژەنە واتش، "وەرو ئانەی فرە نیگەرانەنا. بە درێژایی ١٠ ساڵێ ویەردەی حەجگیز ئنە بێتاقەت نەبییەنا. بەتایبەتی تەرسەو دۆخەکەی ئینا چانەنە کە ئەردۆغان نیەت و نیازو وێش وەڵتەرێ بە ئاشکرا ئەرەیاونابێ. رەنگە گەرەکش  بۆ چنین وەڵێ ١٠٠ ساڵا چێوەڵتەر ئەرمەنیەکێشا جینۆساید کەردێ، ئارۆ کوردەکا قڕ بکەرانە".

'سەرەکیترین چيو پەی وڵاتا وەرنیشتی بەرژەوەندییەکێشانێ'

پرۆفیسۆر کاڤالی ئاماژەش پانەیە کەرد کە وڵاتا وەرنیشتی پەی پارێزناو هێزو وێشا جە وەرکەوتوو دلێڕاسەینە پەنا پەی گرڏ رێبازێوە بەرانە، ئەگەر تەنانەت پەنەواز بکەرۆ قڕکەر و کۆلۆنیالیستەکایش پارێزنۆنە و واتش، "جەهانو وەرنیشتی پێسەو ئانەی کە ویرش کەردەبۆ کە ئا رژێمەی ئینا سوریانە کێن، ماچۆ گرڏ چێوێ ئەرێنیین. ئانەی لاو وڵاتا وەرنیشتیۆ سەرەکیین و ئینا وەڵێوە، بەرژەوەندییەکێشانێ".

تاکە نمونەو حەقەتینەو دیموکراسی ئینا وەرکەوتوو دلێڕاسەینە

پرۆفیسۆر فرانکۆ کاڤالی جە دماینو  قسەکاشەنە ئاماژەش پانەیە کەرد وەرنیشت کە جەئیسەنە ئینا چێرو هرووژمەکا و پەلامارو دۆڵەتو تورکی و چەتەکاشەنە، تاکە نمونەو حەقەتینەو دیموکراسیین جە وەرکەوتوو دلێڕاسەینە و مشۆم گرڏما ئا مۆدێلەیە پارێزنمێ و واتش: "تاکە دیموکراسی حەقەتینە جە وەرکەوتوو دلێڕاسەینە ئینا وەرنیشتەنە. چاکە  گرڏما، گرڏو کەمینەکا، ژەنی، پیا خاوەن مافی یەکسانێنێ. بە بڕواو من مۆدێلەکەو وەرنیشتی متاوۆنە بۆ بە مۆدێل پەی گرڏیما.کوردەکێ دلێ بارودۆخێوە فرە دژوارەنە سیستمێوە دیموکراتیکشا ئەرەمەزنا کە پەی جەهانی بییە  نمونە، گرڏو هێزە دیموکراتیکەکا جە جەهانەنە پەی رزگارکەردەو ئەزمونو دیموکراتیکی جە وەرنیشتەنە مشۆم خاستەر و زیاتەر هەوڵەکاشا وسا گەڕ. وەرنیشت تاکە ئەزمونو دیموکراتیکن جە وەرکەوتوو دلێڕاسەینە. مۆدێلو وەرنیشتی تاکە مۆدێلا یاگێ هیواین. نمونەی تەر بییەیش نییا. دیارا کە تیرۆریسێ پەی دلێنە بەردەی ئا ئەزمونەی زیاتەر هەوڵ مرانە، هەرپۆکەی جەهانو  دیموکراتیکی پەی پارێزناو وەرنیشتی مشۆم جە ئیسە بەولاوە زیاتەر ئەوەکۆشانە