جە شارێ و ناوچەکێ پانیشتو کوردستانی چوون، هەڵەبجە، کۆیە، کەلار، چەمچەماڵ، کەرکوک و سلێمانیێ، بەبۆنەو ٢٥و نۆڤەمبەری ڕۆو جیهانی بەرەنگاربییەی تونڎوتیژی دژ بە ژەنێ، زنجیرێ چالاکیێ جۆربەجۆرێ ئەنجامێ دریێ.

هەڵەبجە

بە دروشمو “جیهانی پرتەقاڵیی بکەردێ”، ژەنە چالاکونێ هەڵەبجەی جە باخی گشتیی شارەکەیەنە کۆبیێوە و سەبارەت بە توندوتیژی دژ بە ژەنا، کۆنگرەی ڕۆچنامەڤانیشان ئەنجامدا.
جە کۆنگرەکەنە باس جە هۆرکێشیای توندوژی دژ بە ژەنێ جە کوردستان و جیهانەنە کریا بەتایبەتی جە سەردەمو کۆرۆنا ڤایرۆسیەنە و کە جە ئاکامشەنە ژمارێوی فرێ ژەنێ مەبانێ قوربانیێ. هەرپاسە باس جە ڕۆوانە کۆشتەی ژەنا و ئەوەشاری توندوتیژیەکان دژ بە ژەنێ جە پانیشتو کوردستانی کریا.
ژەنێ هەڵەبجەی داواشان جە دەسەڵاتی کەرد، تا ڕاوەبەری بەرەنگاربیەو توندوتیژی دژ بە ژەنێ بکرانێوە تا  جە ڕاشەوە ئامارو توندوتیژی دژ بە ژەنێ بزانیۆن. هامکات دەسەڵات یااەو دادڵدەدای ژەنێ جە پارێزگاکەنە بکەرۆنەوە و دەرفەتێ هەرمانێ پەی ژەنا، فەراهەمێ بکەرۆن.

کەلار

جە کەلار، ڕێکوزیاو گزنگ-ی بەهەمان بۆنەوە مەراسیمێوش ڕێکوست و جەمیانشەنە هەیفا مەجید، وەرپەرسەو ڕێکوزیاکە و پۆڵا تاڵابانی، وەرپەرسو مەڵبەندو ۱۱و گەرمیان-و یەنەکە-ی و فریاد هیدایەت، قسەکەرو ڕاوەبەری بەرنگاربییەو توندوتیژی دژ بە ژەنێ قسێشان کەردێ و باسشان جە نەهامەتیەکێ ژەنێ و ڕۆڵ و جایگاو ژەنێ جە بوارە جیا جیا کانە.
شۆنیەرە فیلمێو سەبارەت بە توندوتیژیی و کوشتەی ژنا نیشانە دریا.
دماتەر ئاواز نەجم و شنۆ محەمەد، چەنڎ پارچە شعرێشان پەیوەست بە مژارەکەی وانێوە. جە کۆتاییەنە گروهو هونەری و میوزکی سەر بە ڕێکوزیاو گزنگی و هونەرمەندە شیلان عوسمان چەنڎ گۆرانێشان چڕیێ و پێشکەشێ کەردێ.

چەمچەماڵ

جە چالاکیێوی هامبەشەنە، ڕێکوزیاکێ ژنا و قایمقام و وەرپەرسە ئیدارەیەکێ چەمچەماڵ-ی، مەزارێ دوێ واڵێ کوشیێکێ شارەکەیشان کەرد و تاجەگوڵینێشان سەرۆ نیێرە.

ئا دوە واڵێ هێلین-ـە تەمەن ١٩ ساڵانە و ئاوارە تەمەن ١٧ ساڵانە، ٦ڕوێ دمای دیارنەمەنیشان، جە دەگاو ئیبراهیم ئاغای سەر بە شوانی جە ڕێکەوتو  ٩ ئەیلولی ئێساڵی تەرمەکێشان ئێزیێبێنوە و بە تۆمەتو کوشتەیشان ماموێشان دەستگیر کریان. بەڵام تا ئیستە تۆمەتباریسەرەکی کە تاتەشانە دەستگیر نەکریان.

کۆیە

ڕێکوزیاکێ ژەنێ شارو کۆیەی، بە دروشمو "بە یەکڕیزی ژەنان، دژ بە؟نادادپەروەریی مەکۆشمێنە" چالاکیشان ئەنجامدا و بەیاننامەی هامبەشان واناوە و جە میانشەنە داوا کریا، سەروەریی یاسای بپارێزیۆنە و توندوتیژکارێ دژ بە ژەنێ سزێ بدریانێ.

کەرکوک

جە کەرکوک، ڤێستیڤاڵو بەرەنگاربییە دژ بە توندوتیژیی ژەنا ڕێکوزیا و جە میانشەنەبە ئەرەنیانی تاجەگوڵینان، یاد جە ئا ٤٤ ژنەیە کریاوە کە ١١ مانگێ ویەردێنە کوشیێنێ.
 فێستڤاڵەکەجەچوارچوە و هەڵمەتێویەنە ڕێکوزیان کە کۆمەڵەو هیوای ئێراقی ڕێک وستەن و هەڵمەتەکە ١٦ ڕوێ بەردەوامەن.

سلێمانیە

چەنڎین ڕوێن جە شارو سلێمانی، ڕێکوزیاکێ ژەنا، بەبۆنەو ٢٥و نۆڤەمبەری ڕۆو جیهانی بەرەنگاربییەی تونڎوتیژی دژ بە ژەنێ، زنجیرێ چالاکیێ ئەنجامێ مڎانێ و ئارۆچ جە ئا چوارچێوەنە چەندین چالاکیێ و سیمینارێ و گلێرۆبیێ ئەنجامێ دریێ و ە هامۆاری نەتەوەیوگێرتەکان هەڵمەتی نو دژ بە توندوتیژی ئاشکرا کریا.
هەڵمەتەکە جە باخچەو ٢٥ نۆڤەمبەربەی دلێ  پارکو هەواری شاری جە گۆنگرێوی ڕۆچنامەوانیەنە ئاشکرا کریا و جە ئی بارەوە بەهار مونزیر، سەرۆکو ڕێکوزیاوخەڵکی پەی گەشەپنەدای pdo واتارێوش پێشکەش کەردە و ئەرەیاوناش: هەڵمەتەکە نوکە ١٦ ڕوێ درێژەن هەن و سەرکۆنەو ئاستەنگیەکان و ئا سوکایەتی و بێڕێزیاشە کەرد کە جە پانیشتو کوردستانیەنە بە ژەنێ مەکریانێ و واتش: سەرەڕاو ئانەیە کۆڵ جە کۆشایی نمەدانێ و جە خەباتی یەکسانیوازی بەردەوامێ مەبانێ و وازیارە بییە ژەنی کارا تەر جە جارانی بەشدارێ کۆشای ببانێ.