بە سەرمەشقایەتی ڕێکوزیاکا زوان و کوردی، دەم پارتی، دەبەپە و تەژەئا، جە ناوچەو بازیدو ئاگری هەتا سەر گڵکۆو ئەحمەدی خانی ڕاپیمێوە جەماوەری لواڕاوە. وینیشاندەرەکه داواو پێگەو ڕەسمی و پەروەڕدەیی زوان و کوردیشا کەرد.
هاموڵاتیا وانی و ئاگری، قەرس، موش، ئەرزرۆم و بتلیس، ئیدر، ئەردەخان و فرە و شارەکا کوردەسانی بەشداری ڕاپیماکەی بیێ و بە دروشمو "زوانی ئازاد بە گلێرگێوە ئازاد وەش بۆنە" و "پێگە و کوردی، پەروەردەی کوردی" ڕاپیمایشا کەرد. جەماوەر و گەلی بە هەلهەلە و چەپڵێ پەشتگیریشا جە ڕاپیماکەینە کەرد.
ڕاپیماکەی جە کۆشکو ئیشاق پاشای هەتا گڵکۆو ئەحمەد خانی بەردەوام بێ. هەڤاڵ دڵبەهار، هامواتەواچوو کۆمیسیۆنو زوان و کلتوورو دەم پارتی، سەر و گڵکۆو ئەحمەدی خانی قسێش کەردێ و سەرنجش پەی مڏرامانی تاریخی زوانو کوردی کێشا و واتش: "سیاسەتەکێ دلێنە بەردە و زوانی کوردی تیکێ شیێنێ."
هەرپاسە هەڤاڵ دڵبەهار سەرنجش وست سەر و پەیامو ئاشتی و زوان و ئەڏیا و ڕابەر ئاپۆی و داواو دمای ئاردەی بە سیاسەتو گۆشەگیریش کەرد.
داواکارییەکێ
هەڤاڵ دڵبەهار ئەرەیاوناش: "خاوەنداری کەردەی جە زوانی واتە خاوەندارێتی کەردەی جە گرڏ و ئینسانیەتی. ئەر باسو ئاشتی کریۆنە، مشۆم گرڏ و سیاسەتەکا گۆشەگیری سەر و ئێژا ئۆجالانی و گەلوو کوردی دمایشا پنە بێنە."
هەڤاڵ دڵبەهار داواکارییەکێش پەی زوان و کوردی پی جۆرەنە ئەرەیاوناش:
- زوانی کوردی مشۆم پێسە و زوانی ڕەسمی نشناسریۆ.
- مشۆم زوان و ئەڏێ جە پەروەردەو سەرەتاییۆ هەتا زانکۆ پێسە و زوانی پەروەردە جێگیر کریۆنە.
- مشۆم ڕاگیری جە ناوەندە کوردییەکا نەگیریۆ.
-مشۆم زوان، جوگرافیا و کلتوری کوردی جە دەسور و وڵاتینە دانەش پۆرە نریۆنە.
مشۆم هەر یانێوە بۆنە وانینگێوە
جە بەیاننامەکەنە ئی بانگەوازیێ ئاراسە و گەلوو کوردی کریێ: "بانگەوازو ئێمە پەی گرڏ و گەل و ئەرەمەزیا کوردییەکا ئانەن کە خەباتو وێشا سەر و زوان و ئەڏێ پەرە پنەدانە، پەنەوازا گەلوو کوردی سەبارەت بە زوان و ئەڏێ یۆگیریە بۆنە، ئەر زوانی کوردی نەمەنۆنە، گەلوو کوردیش مەمەنۆ. پۆکەی مشۆم هەر یانێوە کریۆنە وانینگە."
چالاکییەکە بە واتەیۆ دروشموو "بژیوۆنە زوانی کوردی" دمایش ئاما.
