هامسەرۆکایەتی کۆنسەو ڕاوەبەری کەجەکەی ئەرەیاۋناش سەڤیم بەللیەی نوویسەرە هامکاریێوە گۊرەش بە ئەوەکۊشای سۆسیالیزمی کەردەن و واتش: "پەی یاڎکەردەیۆ کەسایەتیێوە سەرمەشقەی پی جۆرە، ۋەرپەرسێنمۍ جە زیڼە ڕاگێرتەی ئەوەکۊشایەکاش و بەدیئامای مەرامەکاش."
هامسەرۆکایەتی کۆنسەو ڕاوەبەری کەجەکەی بۆنەو کۆچی هەمیشەیی ژەنە نوویسەرە و هۊرگێڵنەی سۆسیالیستیۍ سەڤیم بەللیۍ کە هێزی عەمرەو خوڎایش کەرڎە پەیامێوە سەرساغیش وەڵا کەرڎۆ.
پەیامەکەو کەجەکەی پی جۊرەنە:
"بە خەمێوە فرۆ هەواڵو کۆچی هەمیشەیی سەڤیم بەللیۍ یووە جە سەرمەشقەکا جمېیەرو سۆسیالیستی تورکیای و ئەوەکۊشای دیموکراتیکی شۆرشگێڵنێما ئەژنی. سەڤیم بەللیە شۆڕشگێڵنێوە گۊرۍ، سۆسیالیستە، کۊششکارە، دۆسە و هامکارەو گەلوو کوردی. بە حورمەتۆ سەڤیم بەللیۍ یاڎە مکەرمێوە. سەرساغی ۋێما پەی بنەیانەی، کەسوکار و تەڤگەرو سۆسیالیستی دیموکراتیکی تورکیای بەربڕمۍ.
سەڤیم بەللیە جە وەڵێکۊتەی تەڤگەرو سۆسیالیستی و ئەوەکۊشای تورکیاینە خاوەن پێگێوە گرنگەنە. هامکاریێوە گۊرەش بە ئەوەکۊشای سۆسیالیستی کەرڎ و سەرمەشقایەتی تەڤگەری و ئەوەکۊشایش کەرد. ڕەنج و قوربانیێوە فرەش دا. جە جوانیشەونە بەشداری ئەوەکۊشای سۆسیالیزمی مکەرۆ و تا دما نەفەسو ژیوایش بەردەوامە بۍ. جگە جە ئەوەکۊشای سیاسی، جە کۊششی ڕۆشنۋیریینە یاگێش گێرتە و سەرمەشقایەتی ئا بوارەیشە کەرد. پېسە ژەنێوە بەشداربیەیش جە ئەوەکۊشای سیاسی و خەباتو فیکرینە وەش بی. هەرپاسە پەی وەڵێکۊتەی ئیرادە و ئشناسنامەو ژەنۍ، زەمینەش پەی ڕەخسنای دەورێوە گرنگی گېڵنا. چی بوارەنە بیە بە کەسایەتیێوە سەرمەشقە.
جە لېوەتەرۆ سەڤیم بەللیە هامشێوەو مهری بەللی هامسەریش گۊرەتەرین نموونەو پاڵپشتیکەردەیشا جە گەلوو کوردی و تەڤگەرو ئازادی کوردەسانی نیشانەدا. چنی ڕابەر ئاپۆی پەیوەندی هەمڕایی و هەڤاڵیەتیشا بۍ. جە هەڵوێسەکاشانە فرە هامپەشتۍ و بێتەرسۍ بێڼې. پەی ماڕای شۆفینزمی جە تورکیانە و پەرە پنە دای هامدەنگی و پەیوەندی بە ئەوەکۊشای ئازدی کوردەسانی دلۍ تەڤگەرو سۆسیالیستی تورکیاینە هامکاریێوە گرنگش کەرد. جە وەڵێکۊتەی بەرەو ئەوەکۊشای هامبەشە بەینو تەڤگەری سۆسیالیستی تورکیای و گەلوو کوردینە دەورێوە گرنگش گێڵنا. سەڤیم بەللیە جە هامکاریکەردەی تەڤگەرو ژەنا کوردینە سەرمەشقە بۍ. ئامانجمانە گرڎ کاتێ یاڎو کەسایەتیێوە پی جۆرەیە بکەرمېوە، ئەوەکۊشایش زیڼە ڕاگێرمۍ و مەرامەکاش بەدی بارمۍ."
