پەی ئانەی کۆمکووژی دژو ئێزدییەکا بە کۆمکوژیی بشناسیۆ پێشنیازێوە پێشکەش بە پەرلەمانو ئیتاڵیای کریا. جە پێشنیازەکەنە ئاماژە پانەی کریان کە ئێزدییەکۍ قوربانی داعشینۍ ئارۊیچ جە لایەنو دۊڵەتو تورکیوە بە ئامانج مگیریا.
پەرلەمانتارەو پارتو دیموکراتی لاورا بۆڵدرینە پەی ئا کۆمکووژییا کە داعش جە ئابو ٢٠١٤ینە جە کاتو هرووژمەکاشەنە پەی سەرو شەنگالی دژو ئێزدییەکا ئەنجامش دا، پېسە کۆمکووژی جە لایەنو حکومەتو ئیتاڵیایۆ بشناسیۆ پێشنیازێوەش پێشکەش بە پەرلەمانی کەرد. پەرلەمانتار بۆڵدرینە جە ئەرەنیشتەی پەرلەمانی ٢١و شوباتینە پەی پارېزنای پێشنیازەکەیش مافو قسەکەردەیش هۊرگېرت و ئاماژەش پانەی دا کە مشۊم جە چوارچێوەی یاسایی مېیاننەتەوەیینە تاوانەکۍ جە دژو ئێزدییەکا دەمودەس پېسە کۆمکووژی قبوڵ بکریۆ.
بۆڵدرینە یاڎش ئارڎۆ کە وڵاتا پېسە ئەڵمانیا، هۆڵندا، بەلجیکا، دۊڵەتە یۊگێرتەکا ئەمریکای، بەریتانیا، کەندا، پرتوگال، ئەرمەنستان، فەرەنسا و ئوستورالیا تاوانەکۍ داعشیشا جە دژو ئێزدییەکا پېسە کۆمکووژی ئشناسان و ئاماژەش پانەی کەرڎ مشۊم ئیتاڵیا چی مژارەنە هەڵوێسێوە ئاشکرا ڕاوەبەری بکەرۆ.
هېزی داعش ئارۆ دۊڵەتو تورکی
بۆڵدرینە سەرنجش وست سەرو تاریخو ئێزدییەکا و ئا سیستەمەی جە شەنگالەنە ئەرەمەرزیان و واتش: "ئێزدی گلېرگێوەنۍ کە داراو تاریخێوە قەڎیمی و باوەڕی ۋێشانۍ، بەڵام ئی باوەڕییە جە لایەنو گلېرگەو ئیسلامیوە کریا مەرام".
بۆڵدرینە یاڎش ئاوردۆ کە ساڵۊو ٢٠١٤ داعش شەنگالش ئەرەگیر کەرڎ و زیاڎ جە ٥٠٠٠ هەزار کەساش کۆمکووژۍ کەرڎۍ، زیاتەر جە ٦٠٠٠ ژەنۍ و زاوڵێش بڕفانۍ و ئاماژەش پانەیچ کەرڎ ئارۊیچ بە هەزاران ئێزدیۍ بانۍ بە مەرامو هرووژمە ئاسمانییەکا دۊڵەتو تورکی.
بەبۍ پارېزنای جیا مەنۍ
بۆڵدرینە ئانەیچش یاڎ ئاوردۆ کە ئێزدیەکۍ دژو داعشی بێ پارېزنای جیا مەنۍ و واتش: "کاتێ کۆمکووژی ئەنجام دریا، ئێزدییەکۍ جە لایەنو سوپاو ئێراقی و هێزەکاو پێشمەرگەو هەرێمیوە بەبێ پارېزنای جیا ئازیۍ. گەلوو ئێزدی ناچار بی جە دژو تنوتیژی داعشی مڎرامانېوە بە ئیراڎە ڕاوەبەری بکەرۆ".
ئشناسای کۆمکووژی پەنەوازش بە دادپەروەری هەن
بۆڵدرینە ئاماژەش پانەیە کەرد کە گلێرگەو مییاننەتەوەیی جە ساڵو ٢٠١٤نە جە وەراوەرو کۆمکووژی سەرو ئێزدییەکا بێدەنگ بیی و ئەرەیاوناش کە شناساو ئی تاوانێ پەنەوازییێ دادپەروەرییا.
واتیش: "کۆمیسیۆنو چبەرو ئەنجوومەنی جە ٢٦و ئادارو ٢٠١٩نە قەرارێش دا کە حکومەتی هاندۆنە گلێرگەو مییاننەتەوەی هۆشیار بکەرۆ، پەی شناساو کۆمکووژیی ڕای گونجیێ هورسەنگنۆنە و گێرۆنە، بەڵام حیچ حکومەتێوە چا کاتۆ تا ئیسە ئا قەرارەشە جابەجێ نەکەردەن. حەر پۆکەی پەنەوازا ئارۆ ئەنجوومەن چا بابەتەنە هەڵوێسوە ڕۆشن دۆنە".
بۆڵدرین ئانەیش باسکەرد کە ڕاو گرڏی جەهانی سەرنجش وست سەرو جەنگو غەززەی و ئۆکرانیای، بەڵام چنین جەنگێ جە ویر کرێێ بەردەواما و واتش: "گەلوو ئێزدی جە دژو داعشی ئەوەکۆشا و ڕووبەروو قڕکەردەی بییۆ".
جە دماینە بۆڵدرینە داواش جە پەرلەمانی کەرد دڎان بە کۆمکووژی کەردەی ئێزدییەکارە بنیۆنە.
