قەسەدە ئەرەیاۋناش جە جەنگو ٢٤ سەعاتی دماینە دژو چەتەکا دۆڵەتو تورکی ئەرەگیری ٢٣ چەتۍ کوشیێنۍ و ٧ی تەریچ زامڎارۍ کریێنۍ. هەرپاسە چڼین ترۊمبێلۍ زریپۆشۍ و سەروازیۍ چەتەکا دلێنەبریێنۍ.
مېیانو ئەرەیاۋنای و چاپەمەنی هێزەکاو سووریای دیموکراتیکی (قەسەدە)ی، بە وەڵاکەردەیۆ ئەرەیاۋنێوە دما زانیاری سەروازی و دەرەنجامو مڎرامانیش جە دژو هرووژمەکا دۊڵەتو تورکی و چەتەکاش سەرو دەگایەکا منبجی و کۆبانێ ئاشکرا کەرد.
جە ئەرەیاۋناکەینە ئامان: "هێزی جە تەپو سیریاتەلی و دەگایەکا دەوروبەرو پانیشتوو ۋەرکۊتوو منبجی، جەنگۍ قورس جە مابەینو جەنگەواناما و چەتەكا دۊڵەتو ئەرەگیرو توركینە ڕووەشدا."
ئاماژە پانەیچ کریان، چا جەنگەنە ٢٣ چەتۍ کوشیێنۍ و حۊتی تەریچ زامڎارۍ بیێنۍ زامو بڕێشا سەخت بیەن، هەرپاسە پەنج ترۊمبێلۍ و یەرۍ زریپۆشۍ چەتەكا دلێنە بریێنۍ.
ئانەیچ وزیان ڕووە، یەكینەكاو گەشمەرڎە هارونی بەچەكی قورس بنكێوە چەتەكاشا کەرڎەن ئامانج، جە ئاکامەنە چن چەتێوە کوشیێنۍ و زامڎارۍ بیێنۍ، بەڵام تا ئیساتۍ ژمارەی درووسو كوشیایا و زامڎارەکا نیا وەرو دەسینە.
جە بەردەوامینە ئامان: "سەرسەعبو ئارۊیچ دۊڵەتو ئەرەگیرو توركی بۊمبوارانو دەگایەکا"كەرەك"ی و "ئومراك"ی سەر بە شارو كۆبانێشا کەردەن، هامكات جە ڕاو فڕۆكە سەروازییەكاشاوە هرووژمی قورسشا کەرڎ سەرو دەگاکا مەغرەبتینی و سەبتی جە پانیشتوو كۆبانی، بێجگە جە بۊمبوارانكەردەی كارگەو چیمەنتۆی جە دەوروبەرو سرینی."
جەخت چانەیچ کریانۆ کە دۊڵەتو ئەرەگیرو توركی هەركاتێ هرووژمو چەتەكاش شكس بارۆنە، پەنا پەی بۊمبوارانکەردەی ناوچەكا ۋەرنیشتی جە ڕاو فڕۆكەی بێفڕۆكەوانیوە بەرۆ.
