سەبارەڎ بە حۊلەکا سوپاو عێراقی و ئا هێزا کە ئامېنۍ مەنتیقەکە و پەشتەو پەردەو ئا مژاریە یاگەگیرو وەرپەرسو مەڵبەندو قەرەچوخو یۊبیەی نیشتمانیی کورڎسان (یەنەکە) رەشاد گەڵاڵی کە مودېوە فرە جە مەنتیقەو مەخموری پېسە وەرپەرسو مەڵبەندو یەنەکەی هەرمانەش کەرڎېنە و جە نزیکۊ سەردای کەمپو پەنابەرا مەخموریش کەرڎەن، قسېش پۍ ئاژانس هەواڵی فورات (ANF)ی کەرڎ .  

 

 

'پەدەکە و تورکیا بەشێوە عێراقیاشا کەرڎەن بە هاودەمو ۋېشا و پیجۊرە نیازشا هەن کەمپەکەی چۊڵ کەرا

گەڵاڵی سەرەتا سەرنجش وست سەرو هامکاری پەدەکەی و تورکیای کە عێراقیچشا تێکەڵ پا پلانۍ کەرڎەن و ۋاتش، "دماو ئانەی بەشێوە جە لایەنە عێراقییەکا چنی پەدەکەی و تورکیای رێککۊتۍ، یۊ چا خاڵا کە سەرش رێککۊتېنۍ ئانەن کە کەمپەکەی نازا. لاو ئاڎیشاوە مەنەیۊ ئا کەمپەیە بە ماناو وەردەوامی ئاخېزیا جە سەرنیشتوو کورڎسانی. چی سەروبەنەنە عێراق بە پاو ئا رێککۊتەیە گەرەکشا دمایی پا کەمپەیە بارۊ. حکومەتو عێراقی بەش بیەن سەرو دوۋۍ بەشارە. بەشێوەشا ئینۍ چنی سەروازەکا، بەشێوە تەرشا ڕاگری چانەی مکەرا. پېسە چنی ڕاگریشا جە پەیمانەو ٩و تشرینی یوۋەمو بەینو پەدەکەی و عێراقی جەبارەو شەنگالیوە کەرڎەن، بەهەمان جۊر گەرەکشا ڕاگیری چانەیچ کەرا. بە پەیلواو من ئا قۊرتۍ و گرژیۍ وەردەوامۍ با، چونکی ٤ پێشنیارۍ جەبارەو کەمپەکەیوە وزیېنۍ ڕووە".

ئا داواکاریۍ جە وەران ۋەرو کەمپەکەینە ئینۍ ئارانە

گەڵاڵی پی جۆرە داواکارییەکېش وەران ۋەر بە کەمپەکەینە ڕیز کەرڎۍ: "یوۋەم: تەلبەن کریۊ، دوۋەم: نوقتۍ سەروازیش چنە بنریۊرە، یەرەم: تەنیا بەرېوە پۍ ئاماولوای جە کەمپەکەنە بۊ، چوۋارەم: بانگەشەو ئانەی مکەرا کە دلۍ کەمپەکەینە چەکش ئینا چنەو مشۊ رادەس کریۊ یاخوڎ یانەکا دلۍ کەمپەکەی وشکنا، ئانەیچ حیچ پەیوەندیېوەش بە راسی ئاژەکەیۊ نیا".

فیرقەو ١٤ ی جە وەزارەتو دلېنە و وەزارەتو وەرگیری پێکمۍ'

رەشاد گەڵاڵی جەبارەو هێزەکا عێراقی کە ئامېنۍ مەنتیقەکە ئی زانیاریېشە ئەرەیاۋنۍ: "ئا هێزەی ئامېنۍ هێزو فیرقەو ١٤و عێراقینۍ. جە دوۋۍ بەشا پێکمەیا: هەم وەزارەتو دلېنەو عێراقی  هەمیچ وەزارەتو وەرگیری چنەشەنە بەشڎارېنۍ. هەردوۋە بەشەکە ئامېنۍ پۍ ئانەی داواکارییەکا بە خەڵکو مەخموری یاۋنا. بەمەڵامەتو یۊگېرتەی خەڵکو کەمپەکەی حەتا ئیسە نەتاۋانشا بە ئامانجەکاشا بیاۋا. حەتا ئیسەیچ پا گیری سەرو ویستو ۋېشا مکەرا. بەمەڵامەتو هەڵۋێسو واڵە و براکاماوە و کناچا و کوڕا کەمپەکەیوە، ڕا بە فیرقەو ١٤ نەدریان بلا دلۍ کەمپو پەنابەراوە".

'پارتە سیاسیەکۍ ئەرەیاۋنانشا کە دژوو گرژینۍ و ئینۍ چنی چارەسەری'

گەڵاڵی جەبارەو هەڵۋێسو پارتە سیاسیەکا مەنتیقەو مەخموریوە ۋاتش، مەنتیقەکەنە ژمارېوە پارتۍ سیاسیۍ هەنۍ پېسە "یەنەکە، پەدەکە، گۆڕان، کۆمەڵ و یەکگرتوو، حزبی زەحمەتکێشان و حزبی شیوعی". یەنەکە و زەحمەتکێشان و شیوعی سەرو ئاستو کۊمیتەکاشا جە مەخمور پەیامێوەشا ۋەڵاکەرڎۊ و ئەرەیاۋناشا کە دژوو ئاڵۊزی و پشېوینۍ و ئینۍ چنی چارەسەری بە ڕاو گفتوگۊی. خەڵکو کەمپەکەی چنی هێزە نەتەۋەییەکا دژو داعشی جەنگشا کەرڎ و هامکاریشا کەرڎۍ جە پارېزنای نەتەوەی و شکۊو نەتەوەیی. گەشمەرڎە دەنیز پەی پارېزناو شکۊ و کەرامەتی دژوو داعشی گیانو ۋېش بەخشا.

'خەڵکو کەمپەکەی و مەنتیقەکەی شان بە شانو یۊی مرڎېنۍ، پەرسە و زەماۋنەشا ئینا پېوەرە'

گەلاڵی سەبارەڎ بە خەڵکو کەمپو مەخموری و مەنتیقەکەی ۋاتش، "خەڵکو کەمپەکەی و ئەرەنیشتۍ مەنتیقەکەی تەمامکەرۍ یۊترینېنۍ، حیچ هێزێوە نییا تاۋۊ ئاڎیشا جە یۊترینی بڕۊرە. جە وەشی و نا وەشینە ئینۍ پېۋەرە. پېسە پەنابەری تەماشەو ئاڎیشا مەکەرمۍ، ئاڎۍ خەڵکو مەنتیقەکەینۍ. زیاڎ جە ٢٥ ساڵان مەنتیقەکەنە پېۋەرە مژیۋا. پەرسە و زەماۋنەشا ئینا پېوەرە و جە قۊناغە قورسەکانە پېۋەرە                   بېنۍ"                                                     

مشۊ مافو پەنابەرا جە چوۋارچێوەو یاسا میان نەتەوەییەکانە پارێزیۊ'

رەشاد گەڵاڵی باسش جە مافەکا پەنابەرا کەرڎ و دەسنیشانش کەرڎ کە مشۊ مافو پەنابەرا جە چوۋارچێوەو یاسا میان نەتەوەییەکانە پارێزیا بۊ و ۋاتش، "ماف و ئازاڎیی خەڵکو مەخموری مشۊ پارێزیا بۊ و جە چوۋارچێوە و بەرنامەو نەتەوە یۊگېرتەکانە بۊ. مشۊ پېۋیسیەکۍ ژیایشا پۍ حاصڵ کریا. خزمەتگوزارییەکۍ پېسە کارەبای و وەشکەرڎەو ۋەننگەیشا پۍ حاصڵ کریۊ. حەرپاسە پېۋیسیە تەندروستیەکېشا پۍ حاصڵ کریا. بە هەزاران کەسۍ دلۍ کەمپەکەینە مژیۋا، مشۊ پېۋیسیەکېشا پۍ حاصڵ کریا، بە پەیلواو من ڕۊ دماو ڕۊی ئاژەکە دژوارتەر بۊ".

'پەدەکە وەردەوام نیازش بیەن کەمپەکەی کۊنتڕۊڵ کەرۊ، گرڎو دامودەزگاکا ۋېش چا مەرزنېنېرە، خەڵکو کەمپەکەی حەجگیز ئانەش قەبوڵ نەکەرڎەن'

گەڵاڵی جەبارەو هەڵۋێسو نەتەوە یۊگېرتەکاوە ۋاتش، "نەتەوەیۊگېرتەکۍ جە ساڵەو ٢٠١٤یوە مەخمورنە کیشیېنۍ. پەدەکە فرە حۊلشدا کە ئا کەمپەیە کۊنتڕۆڵ کەرۊ. جە بەینو ئیدارەو مەخموری و ئاسایشو مەخموری و شارەوانی کەمپەکەینە دوۋۍ داواکاریۍ دژ بە یۊی بېنۍ. پەدەکە گەرەکش بۍ بە تەمامی کەمپەکەی کۊنتڕۊڵ کەرۊ، حیچ کەسێوە حیج ۋنەپەرسایۍ جەبارەو کەمپەکەیوە نەکەرۊ و دامودەزگاکا حکومەتو هەرێمی چا مەزنۊرە. خەڵکو کەمپەکەی ئانەش قەبوڵ نەکەرڎ. وەرو ئانەی زانېنۍ کە پەدەکە پلانەش هەنە کە چنی ئەردۊغانی رێکگنۊ. وەرو ئانەی حەجگیز ڕاشا نەڎا پەدەکە بەیا دلۍ کەمەپەکەی و چنەشەنە یاگە گیربۊ. ئاڎۍ حەر جە سەرەتاوە زاناشا ئانە حۊلو پەدەکەی و ئەردۊغانین. پلانەو چۊڵ کەرڎةو کەمپەکەی و گېڵنایشاوە پۍ تورکیای. وەرو ئانەی ئا داواکارییەو پەدەکەی حیچ جۊرە ئەنجامېوەش نەبۍ".

بەمەڵامەتو ئا وشیارییە و پارېزناو دلېینەو ۋېشا وەرشا بە هجومەکا تیرۊریستا داعشی گېرت'

رەشاد گەڵاڵی مەترسییەکۍ داعشی و مدرامانو خەڵکو مەخموریش جە رزگارکەرڎەو مەنتیقەکەی ۋیرئارڎۊو ۋاتش: "چنی ئاماو چەتەکا داعشی پۍ مەنتیقەکەی و دماتەر رزگارکەرڎەیش مەسعود بارزانی ئاما پەی مەنتیقەو بازارگەی و چنی بڕۍ جە خەڵکو مەخموری کۊبیۊ. ۋېش جە ۋېشەنە پۍ مودېوە فرەی مەترسییەکۍ ئا گروپە تیرۊریستیا داعشی سەرو مەنتیقەکەی بېنۍ و هەڵایچ وەردەوامېنۍ. فرەو وەختی حۊلشادا بلانە دلۍ کەمپەکەی و زەرەر بە کەمپەکەی بیاۋنا. بەمەڵامەتو وشیاری و وریاییۊ گرڎو پلانەکاشا شکسش ئارڎ. جارێوەیچ تیرۊریستەکۍ داعشی جە ڕاو خەندەقیوە حۊلشا دا بلانۍ دلۍ کەمپەکەی و ۋېشا تەقناوە. ئا پلانېچە شکسش پنەئاما. ئشیۍ چا ئاژەنە حکومەتو عێراقی و حکومەتو هەرێمی پېسە ئەرکو ۋېشا ئاڎېشا پارېزنېنۍ. ئا ئەرکەشا جابەجۍ نەکەرڎ. ئاڎۍ ناچارۍ بیۍ ۋیشا پارېزنا. کەرامەت و شکۆو ۋېشا و ژەن و زارۊڵەکاشا پارېزنا".

'مەخمور بیەن بە هێماو نەتەوەیی مەنتیقەکەی'

گەڵاڵی ۋاتش، "پەیامو من پەیامێوە نیشتمانی و نەتەوەیین. ئەرکو دڵسۊزا و نیشتمانپەروەرا چی قۊناغەنە ئانەن کە هامکارۍ با. بیەو کامپەکەی پۍ مەنتیقەکەی فرە گرنگا. خەڵکو کامپەکەی بیېنۍ بە ئشناسنامەو نەتەوەیی مەنتیقەکەی".

'پەدەکە مشۊ دەس جە مەسڵەحەتە سیاسیەکا ۋېش هوگېرۊ، گېڵۊوە سەرو خەتەو نەتەوەیی، خۊتانکەرڎەی جە مەخموری کەرۊ، نەک ئانەی رادەسو تورکیایش کەرۊ'

گەڵاڵی ئەرەیاۋناش پەدەکە مشۊ واز جە مەسڵەحەتە سیاسیەکاش بارۊ، مشۊ گېڵۊوە سەرو خەتەی نەتەۋەیی. چنی یەنەکەی و پارتەکا تەری خۊتانکەرڎەی جە خەڵکو کەمپو مەخموری کەرا. ئانەی حکومەت دەسشەنەمۍ پۍ ئاڎیشاش کەرۊ، ئانەیچش کە مەتاۋۊ کەرۊش جە ڕاو حکومەتو عێراقیوە داواش کەرۊ. دمایی پا گرژییە بارۊ کە جە ماوەی ۋیەرڎەنە مەنتیقەکەنە وەشش کەرڎېنۍ. پەدەکە جە ڕاو حۊلەکا عێراقیوە گەرەکشا خەڵکو مەخموری بێچەک کەرۊ جە وەختېنە ئاڎۍ پۍ پارېزناو ۋېشا بەکارش مارا و چی ڕېوە گەرەکشا بە تەمامی کەمپەکەی رادەسو داعشی کەرۊ و زەرەر بە واڵە و براکاما بیاۋنۊ. ئینۍ گرڎ ئینۍ مەسڵەحەتو تورکیاینە.

هومېڎەوارەنا کە هەم حکومەتو هەرێمو کورڎسانی و هەمیچ پەرلەمانو هەرێمی چنی ڕاوەبەرا پلەباڵای کۆباوەو بە پەیامێوە داوا جە نەتەوەیۊگېرتەکا و دامودەزگا میان نەتەوەییەکا کەرا کە وەڵۍ پانەی گېرا کە گەرەکشانە زەرەر بە واڵە و براکاما بیاۋنا. ئێمە پېسە یەنەکەی سەرو رێبازو مام جەلالی حەتا دمایی ئینایمۍ چنی ئاڎیشا و دلۍ حۊل و چالاکینە بیمۍ. جە کام پارچەو کورڎسانینە واڵە و براکېما پەنەوازشا بە یەنەکەی بۊ ئێمە چنیشا بیمۍ".

هـ . ش