سەبای جە بیارۍ داۋاکاریەکۍ خەڵکو هەورامانی ئاشکرۍ کریانۍ
دەستەو پاڵپەشتی جە مافەکۍ خەڵکو هەورامانی ئەرەیاۋنانش: سەبای جە بیارۍ دەستەکەشان بە کۆنگرێۋی رۊچنامەۋانیی داۋاکاریەکۍ خەڵکو هەرێمو هەورامانی پەی دەسەڵاتی و رای گردیی ئاشکرۍ بکەرۆنە.
دمابەدمای ئانەی ژمارێۋ کەسایەتیۍ و چالاکۋانۍ خەڵكو هەرێمو هەورامانی جەکۆنیشتێۋەنە یاۋێ هەنتری و پێۋەرە باسشان جە کێشۍ، گیروگرفتەکا و نەبییەی خزمەتگوزارییەکانشان جە شارێ و دەگایەکانو هەرێمەکەیشان کەرد و هەرپاسە خەمسەردی حکومەتو هەرێمو کوردستانیشان ۋەرانۋەر بە هەورامانی هۆرسەنگنا، بڕیارشاندا؛ ”دەستەو پاڵپەشتی جە مافەکۍ خەڵکو هەورامانی“ دروست بکەرانۍ.
جە ئی جارەۋە دەستەکە ئەرەیاۋنایێۋش دا و ئاشکراش کەردەن: ۊدیارو دمانیمەڕۊو سەبای (شەممە ٢۵/٠٢/٢٠٢٣)ی، جە شارو بیارۍ دەستەکەشان کۆنگرێۋی رۊچنامەۋانیی ڕێکبۋزۆنە. جە کۆنگرە رۊچنامەۋانیەکەنە داۋاکاریەکۍ خەڵکو هەرێمو هەورامانی و هەرپاسە بەرنامەو ۋێنیشاندای و مانگێرتەی و ناڕەزایەتییەکان، پەی هەورامییەکان، دەسەڵاتو هەرێمی و رای گردیی ئاشکرۍ بکریانۍ
”دەستەو پاڵپەشتی جە مافەکۍ خەڵکو هەورامانی“ بانگەۋازیش جە خەڵکو شارۍ و دەگایەکانو هەورامانی و دەستگاکۍ یاۋنەری (میدیای) کەردەن: تا سەبای شەممە چوون ئەرکێۋی نیشتمانیی و ئەخلاقیی ئاماڎۍ کۆنگرە رۊچنامەۋانیەکەی ببانۍ کە دلێڕاسی بازارو بیارێنە ئەنجام مڎریۆن.
