جە چوارچێوەو هەوڵەکانە پەی گەشەپنەدای گفتوگۆ و جابەجێکەردەی ڕێککەوتەی ١٠و ئادارو بەینو مەزڵووم عەبدی فەرماندەو گرڎیی هێزەکاو سووریای دیموکراتیکی (قەسەدە) و ئەحمەد شەرعی، سەرۆکو کاتی دەسەڵاتو دیمەشقی، ئارۊ شاندێوە جە ئیدارەو ۋێڕاوەبەری دیموکراتیکی هەرێمو سەرنیشت و ۋەرکۊتوو سووریای چنی شاندێوە دەسەڵاتو دیمەشقی گلېربیۆ.

شاندەکەو سەرنیشت و ۋەرکۊتوو سووریای کە جە ١٢و نیسانی بنیاڎ نریا بۍ جە فۆزا یوسفە، ئەندامۊو دەسەو ڕاوەبەری پەیەدەی، عەبدولحامد هەمباش هامسەرۆکو پارتو سووریای دما ڕۊی سەنحاریب بەرسوم هامسەرۆکو پارتو یۊبیەی سریانی، ئەحمەد یوسف هامسەرۆکو دەسەو دارایی جە ئیدارەو ۋێڕاوەبەری، سۆزدار حاجیە، ئەندامۊو کۆنسەو ڕاوەبەری (یەپەژە)ی، مریەم ئیبراهیمە هامسەرۆکۊو دەسەو کاروباری کۆمەڵایەتی و کرێکارا جە ئیدارەو ۋێڕاوەبەری، یاسر سلێمان یاگەگیرو هامسەرۆکایەتی ئەنجوومەنو گەلا دیموکراتی جە سەرنیشت و ۋەرکۊتوو سووریای، پێکئامابۍ.

نوێنەرایەتی دیمەشقی پێکئاما بۍ جە محەمەد قەناتری یاگەگیرو نووسینگەو ئەمریکای جە وەزارەتو جبەرو سووریای، عەبدولغەنی محەمەد ڕاوەبەرو ئاسایشو پارێزگاو حەلەبی، مەسعود بەتاڵ ۋەرپەرسو دۆسییەو عەفرینی جە ڕاوەبەری ئاسایشو دلېینەی، زیاد فەواز عایش یاگەگیرو وەزیرو دلېینەی پەی کاروباری مەدەنی.

بەپاو قسۍ واتەواچو شاندەکەو سەرنیشت و ۋەرکۊتوو سووریای، هەردووە لایەن یۊشا ئشناسا، هەرپاسە بەرنامەو هەرمانۍ هامبەشۍ پەی درێژەدای بە گفتوگۆکا و متەیرەو میکانیزمەکا جابەجێکەردەی بڕگەکا ڕێککەوتەی ١٠ـو ئادارو ٢٠٢٥ گفتوگۆشا جە بارۆ کریا.

هەردووە لا جەختشا سەرو ئانەی کەرڎۆ کە هەرمانە بکەرا پەی چەسپنای سەقامگیریی و لوای وەڵێوەو بەندەکا ڕێککەوتنامەکەی.