جە چوارچێوەو هەوڵە بەردەوامەكا پەی جابەجێکەردەی مەرجەکا ڕێككەوتەی ١٠و ئازاری، كە جە ما بەینو سەركردایەتی هێزەكاو سووریای دیموكراتی و دەسەڵاتدارا دیمەشقینە ئیمزا کریابۍ، كەمێ چێوەڵی شاندێوە ئیدارەو ۋێڕاوەبەری بەرەو دیمەشق کۊتۍ ڕا، قەرارا چنی ۋەرپەرسا وەرپەرسی جە جابەجێكەردەی مەرجەكا ڕێككەوتەكەی گلېرۍ باوە.

بەپاو زانیاییەكا شاندەكە پێكئامان جە ئەنداماو ئا لوجنەی، كە جە ١٢و نیسانی پێكئامان چانیشایچ: فەوزە یوسف، عەبدول حەمید مەهباش، ئەحمەد یوسف، سەنحەریب بەرسووم و سوزدار حاجیە، هەرپاسە واتەواچا لوجنەکەی جە مەریەم ئیبراهیمۍ و یاسر سلێمانی پێکئامان.

ئی سەردایە دما بەدماو یەرۍ گلېرۊبیا هەماهەنگی مۍ، كە جە سەرنیشت و ۋەرکۊتوو سووریای لواڕاوە- یووەمشا جە ١٩و ئازاری، دووەمشا جە ١٢و نیسانی و دمایی حەفتەی ۋېیەردەی- جە كاتێنە لایەنەكۍ هەوڵمڎا گفتوگۆكا بەهێزتەر بكەرا و سەقامگیری جە ناوچەكەنە بە جابەجێكەردەی بڕگەكا ڕێككەوتەی ١٠ـو ئازاری بەدەسبارا.

قەرارا وێرەگاو ئارۊی شاندو ئیدارەو ۋێڕاوەبەری چنی دەسەڵاتدارا دیمەشقی گلېرۊبیەی و دۆسیەکا بەینیشا تاوتوێ بكەرا.