شنگالنە، بە بەشداریی ژمارێوە وەرەچەمی جە بنویس، ڕۊشنویر، سیاسەتمەدار و نوێنەروو پێكئاما ئاینییەكا جە پانیشتوو كورڎسانی و شارەكاو تەروو عێراقینە، کۊڕبەنڎوو "چارەسەركەرڎەی قۊرتەکاو عێراقی دلۍ سیستوو نەتەوەی دیموكرات"ینە دەسش پەنە كەرد.
جە چوارچووەو کۊشای دژوو گۊشەگیریی سەروو ڕابەروو گەلوو كوردی "عەبدوڵڵا ئۊجالان"ی و بەقووەتکەرڎەی كەمپەینوو "وەخت وەختوو ئازاڎیین"، كۊشای و زنجیرە چالاكییەكاو وێڕاوەبەریی شنگالی درێژەش هەن، چا چوارچووەنە ئارۊ کۊڕبەنڎێوە بە ناموونیشانوو" چارەسەركەرڎەی قۊرتەکاو عێراقی دلۍ سیستموو نەتەوەی دیموكرات"ینە، جە هۊڵوو ئازاڎی جە سەنتەروو شارۊچكەو شنگالینە دەسش پەنە كەرد.
کۊڕبەنڎەکەنە، كە لاو وێڕاوەبەریی شنگالیوە ڕێك وزیابۍ، ژمارێوە وەرچەمۍ جە بنویس، ڕۊشنویر، سیاسەتمەدار نوێنەروو پێكئاما ئاینییەكا، جە پانیشتوو كوردستانی و شارەكاو تەروو عێراقینە، بەشدارییشا كەرد، جگە چانەیچ ڕێكوزیا و ئەرەمەرزیایەکا شنگالیچ ئاماڎۍ کۊڕبەنڎەکەی بێنۍ.
ئەوەڵوو کۊڕبەنڎەکەینە "غەزەل ڕەشۊ" هامسەرۊكەو ڕاوەبەریی شنگالی ئەرەیاوناش، دڵوەشەنە كە دەرفەتێوە چانە ڕەخسییان، كە بەهامبەشی ئاماڎەبییاو کۊڕبەنڎەکەی بارەو ئا قۊرتاوە عێراق و مەنتێقەکەنە هەنۍ کووۍ باوە، حەرپاسە نەتەوەی دیموكرات گفتوگۊش بارەوە کریۊ.
لاو وێچشۊ "بولبول جەراح" بە نوێنەرایەتیی ئا شاندەیە جە بەغڎاوە ئامادەو کۊڕبەنڎەکەی بێنۍ واتش: فرە دڵوەشێنمۍ كە بەغڎاوە بەشداریی ئی کۊڕبەنڎەیما كەرڎەن، ئێمە سەروو ئی خاكیوە گرد چێوێما ئەزموون کەرڎەن، جە ململانۍ و جەنگیوە گێرەش تا کۊکوشی دییەنما، گەلوو ئی خاكی ڕووبەڕوو گرد چێوۍ بییەنۊ.
جەڕاح حەرپاسە پەشتیوانیی وێش پەی سیستموو نەتەوەی دیموكراتی شنگالنە بەر وست.
هاموەخت مامۊستا "كۊساری"، كە هەرێموو كوردستانیوە ئاماڎەو کۊڕبەنڎەکەی بۍ، جەختش جە گرنگیی وێڕاوەبەریی شنگالی و بەڕسمی ئشناسای قەوارەی پەی گلێرگەو ئێزدی كەرڎۊ.
لاو وێچشۊ "شێخ ئازاڎ" بە نامۍ "پارتوو ئازاڎی و دیموكراسیی ئێزدی" (پادێ)وە، سەرنجەش پەی كۊشای و داواكارییەكاو گلێرگەو ئێزدی کێشا و واتش: پێسە گەلێوە گرد وەختۍ پەی مافەکاما کۊشیێنمۍ و ئیسەیچ وەختوو ئانەین یەکڕیزۍ بیمۍ و دلۍ هێزەکاو عێراقینە بەدیموکراسییانە بژیومۍ، ئێمە یەكسانیما پەی تەماموو گەلا گەرەکا.
ڕێکوزیاو تەیارینە بەغڎا، شاندێوە پانیشتوو عێراقینە مافوو قسەکەرڎەیش ورگێرت و ئەرەیاوناش ، داوا جە حوكمەتوو عێراقی کەرمۍ، كە هاگاش مافەكاو پێكئاما نەتەوەیەكا بۊ و زووتەرین وەختنە قسۍ جیددیە سەروو قبووڵكەرڎەی وێڕاوەبەری کەرۊ، ئێمە هەمیشە پاڵپەشتۍ نەتەوەكەیما بیمۍ، ئێمە خەڵكوو ئی هەرێمەینمۍ و ژیوای یەكسانمان گەرەکا، چونكوم ئینە مافی ڕەواو ئێمەن.
حەرپاسە بە نامۍ هۊزە عەرەبییەكاوە، ئەبو سەدر، وەشحاڵیی وێش بە بەشداریکەرڎەیش کۊڕبەنڎەکەنە بەر وست و واتش: گرد وەخت پەی خەڵکوو ئی هەرێمی هەرێمە وەرگێریکەرڎەی جە وێشا خاڵێوە گرنگە بیێنە، چونكوم دایمە هجووم کریان سەرشا، هێزە جبەرییە هەژموونوازەكۍ حەرگیز هجووموو سەروو مەنتێقەکەیشا نەمردنان و دایمە سیاسەتێوە تایبەت سەروو ئی گلێرگەیۊ جابەجا کریان، حەر وەروو ئی سەبەبیچە نەتەوەی دیموكرات و جە وەختیچنە وێپارێزنای بییەن بە خاڵێوە سەرەکییە پەی ئا گەلا، جا كوردۍ با یا عەرەبۍ، یان ئێزدیۍ، پێویسا دەوڵەت سیاسەتوو ئیسەو وێش فاڕۊ و سەروو بنەماو نەتەوێوە دیموكراتی هەرمانە کەرۊ.
دماو پەیاموو مێمانەکا، ئێساتۍ کۊڕبەنڎەکە لاو "حەسۊ ئیبراهیم"ی هامسەرۊكوو دەسەو ڕاوەبەریی شنگالی، "حسێن حاجی" هامسەرۊكوو پادۍ و "سهام دەخیل"ە ئەنڎامەو ڕاوەبەریی تاژێ-وە بریۊ ڕاوە.
قۊرتەکاو عێراقی و چارەسەركەرڎەیشا جە ڕاو سیستموو نەتەوەی دیموكراتی-وە، ئشناسای وێڕاوەبەری، ئامانجی سەرەكیی کۊڕبەنڎەکەینۍ و چا چوارچووەنە، سیمینارۍ سەروو گرنگی و دەوروو وێڕاوەبەری، نەتەوەی دیموكراتی، ژەنا و گەنجاو ئێزدی و وەرودماو فەرمانی و گرنگیی پارێزنای گلێرگەی ملۊ ڕاوە.
س.ز
