دەگاو خەڵەفوو سەر بە شەنگالینە، بە سەرمەشقایەتیی دەسەو وێڕاوەبەریی شنگالی پەی پەشتگیری و هامسۊزی چەنی مدرامانوو گەلوو وەرنیشتی دژوو هجوومەکاو دەوڵەتی ئەرەگیروو تورکی پەی سەروو سەرنیشت و وەرکەوتوو سوریای چالاکیێوە دەسش پەنە کەرد، چالاکییەکە پەی ماوەو دووۍ ڕوا بەرڎەوام  بۊ.

خێمەکێنە پەیاموو پەشتیوانی پەی مدرامانوو  گەلوو سەرنیشتی و وەرکەوتوو سووریای بەروزیا.  

هامسەرۊکوو دەسەو ڕاوبەریی شەنگالی، خودیدا ئیلیاس واتش: "هجوومەکاو دەوڵەتوو تورکی ئەرەگیری پەی  سەروو وەرنیشتی سەرمڕێنۍ. تا خەڵک یاگۍ وێش جیا بازۊ و چۊڵش کەرۊ، سەرچەمە گرنگەکاو ژیوای کەرا ئامانج. گردوو ئی هجووما وەرەچەماو دنیێوە کریا و وەلی گرد لێوە چی زوڵمەو دەوڵەتوو تورکی بێدەنگێنۍ."

ئیلیاس ئاماژەش پانەیە دا، کە حەر یاگێوە خەڵک وێش بەرۊشراوە تورک هجومس کەرۊ سەر و واتیچش، کە گەلوو شەنگالی بە گردیشاوە ئینۍ پەشتەو مدرامانوو وەرنیشتیوە .هەرپاسە داواش وەنەو ڕێکوزیایەکاو مافوو ئینسانی کەرڎە، کە بە هەرمانەو وێشا وربێزا و وەراوەروو ئینەینە بێدەنگۍ نەبا.

 نەفیە مێشووە، بە نامۍ تەڤگەریوو ئازادیی ژەناو ئێزیدی (تاژێ)وە قسێش کەرڎۍ و واتش: ئێمە چێگەوە دەسما پی چالاکییە کەرد تا پەشتیوانیی وێما پەی وەرنیشتی بەروزمۍ، ئێمە قەرزارۍ گەلوو وەرنیشتینمۍ، ڕاوەبەراو وەرنیشتی و گەلوو وەرنیشتی دایمە هامبەشیکەرڎەی گردوو سەرچەمەکاشانە هامدەنگۍ بیێنۍ چەنی گەلە ئازادیوازا. گەلوو وەرنیشتی گەرەکشانە بەئازادی سەروو خاکوو وێشاوە بژیوا. حیچ تەرسیشا پەی سەروو کەسی وەشە نەکەرڎێنە. ئێمە پەشتیوانی جە گەلوو وەرنیشتی  کەرمۍ و پەنەشا ماچمۍ، کە شمە بەتەنیێۍ نییەندۍ، تا ئێمە مەنێبیمۍ بەتەنیا جیاتا مازمۍ، شنگال و وەرنیشت دەس وزا دلۍ دەسوو یۊی و سەرۍ گنا.  

خدر ساڵح، بە نوێنەرایەتیی ئەنجوومەنوو پێکئاما عەرەبەکاوە شەنگالنە، ئاماژەش پانەیە دا، کە دەوڵەتوو تورکی ئانیشا کەرۊ ئامانج کە وەرگێری جە ئینسانیەتی کەرا دژوو چەتەکاو داعشی. خدر ساڵح واتش: ئانۍ کریۍ ئامانج و گەشمەرڎۍ کریۍ، پەی پارێزنای گەلوو سەرنیشتی و وەرکەوتوو سوریای ڕەنجێوە فرەشا دا. ئێمە چا بێدەنگییە کە وەراوەروو ئی هجوومە قڕکارییەیوە هەن، میاومێنە، چونکوم ئی هجوومۍ  بە هامبەشی کریا. پێسە چەنی عێراق وەراوەروو هجوومەکاو سەروو شەنگالیوە بێدەنگا، حکومەتی شامیچ وەراوەروو هجوومەکاو سەروو وەرنیشتیوە بێدەنگا. "مەبەس چاهجووما دلینەبەرڎەی براڵەیی گەلان کە بنیاد نریان".

چالاکییەکە بە سەرڎایەکاو گەلی گردوو مەنتێقەکاو شەنگالیوە بەرڎەواما.