ئەنداموو کۊمیتەی ناوەندیی پەکەکەی جەمال شەریک ئەرەیاوناش، کە پیلانگێڵنیی میاننەتەوەیی سەروو ڕابەروو گەلوو کوردی عەبدوڵڵا ئۊجالانی بە گۊشەگیری بەرڎەواما و واتش، "ڕابەرایەتی بە مدرامان ئیمراڵیینە ڕیزەکاو وەڵۍ وەڵێوە دژوو جینۊسایدی کۊشییۊ".
ئەنداموو کۊمیتەی ناوەندی پەکەکەی جەمال شەریک بارەو شێوەو تازەوەبییەی پیلانگێڵنیی میاننەتەوەیی قسێش پەی ئاژانسوو هەواڵوو فوراتی کەرڎۍ.
جەمال شەریک باسوو ئانەیش کەرد، کە بنەماو تازەکەرڎەیۊ پیلانگێڵنیی ئیمراڵی هەن و واتش، "گۊشەگیری شێوەی تازەکریاوەو پیلانگێڵنیین. جە قووڵکەرڎەیۊ گۊشەگیریی ڕەهاینە هێزەکاو مۊدێرنیتەی سەرمایەدارییچ بەشدارێنۍ، دەوڵەتە هەرێمییەکێچ بەشدارێنۍ، نۊکەرۍ و دارڎەسەکێچ هەنۍ. وەڵۍ وەڵێچۊ دەوڵەتوو تورکی هەن، گرد بەشدارێنۍ. هەیە. ئەگەر گۊشەگیریی ڕەها سەروو ڕابەرایەتیوە تا ئیساتۍ پێسە کریانۊ، بنچینەنە ئا هێزۍ هەنۍ، بارزانی هەن. وەروو ئانەیە گۊشەگیرکەرڎەی ڕابەرایەتی بۊ مایۍ ئانەیە کاریگەریی ئەندێشەکاو ڕابەرایەتی سەروو گەلوو کوردستانی و کۊشیای کەمۍ کریاوە ئانەیچ بە فرسەتۍ خاس مزانا. گۊشەگیریی ڕەها سەروو ڕابەرایەتییوە پێسە تاکە ڕاو بییەی وێش وینۊ، پەوکای بنەیانەو بارزانی زیاتەر جە گرد کەسی وازیارۍ گۊشەگیریی ڕەهاینۍ سەروو ڕابەرایەتییوە. نۊکەرۍ و دارڎەسەکۍ کوردستاننە وازیارۍ ئانەینۍ. گردیچ گەرەکشانە کە پیلانگێڵنیی میاننەتەوەیی بە گۊشەگیری ڕەها سەروو ڕابەرایەتییوە بەرڎەوام بۊ. تورکیا ئانەش گەرەکا، هێزە ئەورووپییەکۍ ئانەشا گەرەکا. پەوکای دۊخێوە بۍ ڕابەرایەتی سەروو پەکەکەیرە دا سەپنا. ژیواێوە بۍ پەکەکەی، بۍ ڕابەرایەتی ملوو گەلوو کوردیرە سەپنا. پێسە ئانەیە بە بۍ ڕابەرایەتی، بە بۍ پەکەکەی کێشەو کوردی چارەسەر کریۊ، هەوڵۍ مدا پاسە هومێدێوە خوڵقنا".
ئەنداموو کۊمیتەی ناوەندی پەکەکەی جەمال شەریک واتش، کە گەرەکشانە بە کۊمەڵایەتیبییەی گەلوو کوردستانی جە ڕاو سیستموو مۊدێرنیتەی سەرمایەداریوە، سەروو کۊمەڵایەتیبییەی مۊدێرنیتەی سەرمایەدارییوە کریۊ و واتش، " پەوکای کۊکوشیی گلێرگەی سەروو گلێرگەو کوردستانیوە کریۊ. گردوو ئینیشا بەرش وازا، کە پا سەروو جینۊسایدوو کورڎاوە گێرارە. وەروو ئانەیە ڕێبازوو چارەسەری چێشا؟ چارەسەروو ڕابەرایەتیین. ڕابەرایەتی چێش ماچۊ؟ ماچۊ مشۊم ئا کورڎۍ فشاری جینۊسایدی کولتوورییشا ئینا سەرۊ پارێزییا. ئانەیچ چارەسەروو نەتەوەی دیموکراتیکین. ئانەیچ چارەسەری شۊڕشگێڵنیی ئێمەن. ئی چارەسەروو نەتەوەی دیموکراتیکییە چارەسەرێوە شۊڕشگێڵنیین. چارەسەرێوەن کە بە ئەرەمەرزیای نەتەوەی دیموکراتیکی وەش بۊ. یانۍ پارێزنای بەکۊمەڵایەتیبییەی کورڎانە. یانۍ کۊمەڵایەتیییەی کە کۊشیای ئازادیی کوردیش خولقنان، سەرجەنۊ بونیادنیایۊ بەکۊمەڵایەتیبییەی کوردین. بێگومان ئانەیچ جە چارەسەرکرڎەی پەرسەو کوردینە مامەڵێوە بنەڕەتیین. وەلۍ ئانە نەک هەر بە بونیادنیای بەکۊمەڵایەتیبییەی کوردی، یانۍ تەنیا بە بونیادنیای نەتەوەی دیموکراتیکین سەروو کۊمەڵایەتیبییەی کوردیوە. ڕابەرایەتی ئانەی پێسە بونیادنیای پا نامێوە ورسەنگنۊ. یانۍ ماچۊ کە ئا ڕاسییەو بونیادنیایە، نەک حەر خودوو ڕاسیی بونیادنیای. پەی نموونەی بە فۊرموولوو دەوڵەتی و دیموکراسی ماچۊ لایەنەکۍ بە قبووڵکەرڎەی یۊترینی متاوا ئا کێشەیە چارەسەر کەرا".
جەمال شەریک ئاماژەش پانەیە کەرد، سەروو ئا بنەمێوە کورڎۍ پێسە نەتەوێوە دیموکراتیکی درێژە بە بونیادنیای وێشا بدا و واتش: "پێویسا بتاودۍ سەروو بنەمای دینامیکییەو وێشا، وێشا بونیاد بنیا. ئانە یۊن جە لایەنەکاو چارەسەروو نەتەوەی دیموکراتیکی. وەلۍ سەرەڕاو ئانەیچە نەتەوەی دیموکراتیک تەنیا بە یەک ئیتنیک پێناسە مەکریۊ، ڕابەرایەتی ئاماژە پانەیە کەرۊ، کە ئیتنیکە جیاوازەکۍ متاوا پێوە پێسە شۊناسێوە باڵای دلۍ نەتەوەی دیموکراتیکینە یاگۍ گێرا، ئانەیچە ڕاێوەنە پەی چارەسەروو نەتەوەی دیموکراتیکی، جگە ئانەیچە ڕابەرایەتی ماچۊ ئا گلێرگۍ شناسنامەی یەکسان و هامشێوەشا هەن، مشۊم ڕێکوستەی دیموکراتیکیی وێشا بونیاد بنیا، ئانە ماناش چێشەنە؟ دلۍ کورڎانە حەرپارچێوە بە پاو وێڕاوەبەریی وێشا، بتاوا وێشا ڕێکۍ وزا، دلۍ پارچەکایچەنە هەرێمە جیاوازەکۍ متاوا وێشا ڕێکۍ وزا. کۊکەدەیۊ ئینیشایچ بۊ بە وێڕاوەبەریی دیموکراتیک. یانۍ وێڕاوەبەری دیموکراتیک بە فۊرمولەو دەوڵەتی و دیموکراسی هەم بنەما و زەمینەو چارەسەروو نەتەوەی دیموکراتیکین، هەم فرەڕەنگیی کوردستانیچ گێرۊ وێش. یانۍ بڕۍ یاگێنە بە زازاکی و بڕۍ یاگێچ بە کرمانجی قسۍ کریا. و بڕۍ یاگێچ بە سۊرانی. ئینجا بڕۍ یاگێچ کە ئاینۍ جیاجیێش چەنەنۍ. ئا یاگێچە هەنۍ کە کولتوورشا جیاوازا. گردوو ئینیشا پێوەرە متاوا جیاوازییەکاشا پارێزنا و وێشا بەرا ڕاوە، تەمامکەرۍ یۊی با و پەیوەندیێوە یۊگێرتەی پتەو وەشکەرا. ئانە نامێش چێشا؟ وێڕاوەبەر، وەلۍ پێوە کۊنفیدراڵ".
پێویسا قسەوباسوو ئاشتی سەروو بنەماو چارەسەروو نەتەوەی دیموکراتیکی بۊ
جەمال شەریک دەسنیشانش کەرد، کە چێگەنە کۊنفیدرالیزمی دیموکراتیک، وێڕاوەبەریی دیموکراتیک مشۊم بۊ بە بەشێوە جە چارەسەروو نەتەوەی دیموکراتیکی و واتش، "ئینە هەم چارەسەریێوەن دلۍ خودوو وێڕاوەبەرینە و هەم چارەسەریێوە گردگیرا. پەوکای ڕابەرایەتی دلۍ بارودۊخی هەرە قورسوو جەنگینە چارەسەری شۊرشگێڵنیی وزۊ ڕووە، ئەی چا یاگانە کە چارەسەری شۊڕشگێڵنی گنۊ وەڵۍ چێش ڕووە مدۊ؟ چارەسەری هامبەش ڕەت مەکریۊوە. واوەی جا یاگانە، کە چارەسەری هامبەش هەن، دەسبەرڎاروو شناسنامەی نەتەوەیی وێشا مەبا. دەسبەرڎارۍ بییەی نەتەوەیی، وێڕاوەبەری نەتەوەیی و دەسبەرڎاروو وێش مەبۊ. یانۍ چێوۍ چانە نییا. بڕۍ کەسۍ باسوو چارەسەری نەتەوەیی دیمۊکراتیکی، باسوو واتەواچوو ئاشتیی کەرا. وەلۍ تا گفتوگۊکاو ئاشتی کریا، مشۊم زەمینێوە خوڵقییۊ و ئا زەمینەیچە ناچارا، کە سەروو بنەماو چارەسەروو نەتەوەی دیموکراتیکی بۊ. ئەگەر چارەسەروو نەتەوەی دیموکراتیکی نەبۊ، یانۍ ئەگەر لایەنەکۍ با و وێڕاوەبەریی یۊترینی قبووڵ نەکەرا، یان ئەگەر بە ئیرادەو وێشا نەبۊ، حیچ چارەسەریێوە نمۍ ئاراوە. جە گفتۊگۊکاو ئاشتیینە باسوو بییەی ئادیشا کەرا. یانۍ گفتوگۊکاو ئاشتی سەروو بنەماو نیایرەی چەکی نییەنۍ.
کۊشیای چەکداری متاوییۊ فاڕیۊ پەی کۊشیایێوە جیاوازتەری. وەلۍ ئانە نییا، کە واز جە شناسنامەی نەتەوەیی وێش بارۊ، یان بەتەمامەتی دلۍ سیستموو مۊدێرنیتەی سەرمایەداریینە تاویۊوە و گوم بۊ. چی سەرڎەمەنە وەختۍ باسوو گێڵای شۊنەو چارەسەریرە کریۊ، ڕەفتارێوە پاسنە نیشانە مدا، پێسە واچی ئەگەر ئاشتی بۍ وەرۊ تۊ بەشداروو دلۍ سیستموو مۊدێرنیتەی سەرمایەداریی بی، سەرەڕاو ئانەیچە، هەوڵۍ مدا، کە یاواینەێوە چینە وەش کەرا، ئینجا بڕۍ یۊترینویایۍ هەنۍ کە سەپییا، هەوڵۍ مدا، کە پەکەکەی وزا دلۍ سیستموو مۊدێرنیتەی سەرمایەداریوە. ئینێە ڕەفتارۍ چارەسەریی نییەنۍ. پێسە وەختۍ کە پەرسەو کوردی سەرەش ورڎا، مۊدێرنیتەی سەرمایەداری هەوڵێش دۍ سەروو بنەماو قڕکاری ڕا وەنەو سەرەورڎای کێشەو کوردی گێرۊ، ئا وەختە تاکتیکوو پژگنەی و زاڵ بەی سەرشارە کریابۍ بە بنەما. ئیسەیچ هەمان چێو. ئینەیچش پەی زیاد بییەن، بەرەش و پێسە وێتش پەنە کەرە، ئینەیچ چارەسەرین بە وینای وێشا.
ڕاو شۊڕشوو کوردستانی ئاستی سەرەتایی ئا خەتێشە ئاشکرا کەرڎەن. چارەسەروو نەتەوەی دیموکراتیکی و پارێزنای ئا کورڎانە، کە وەروو قڕکاری کەوتێنۍ، ئاستوومۊدێلوو چارەسەری نیشانە مدۊ، ڕابەرایەتی پا مدرامانەیە کە ئیمرالینە کەرۊش جە ڕیزەکاو وەڵۍ وەڵۍ کۊشیایۊ مرڎان دژوو جینۊسایدی، پی مدرامانەیە سڵام وەنەو گەلوو کوردستانی، وەرکەوتوو دلێڕاسەی و ڕابەرایەتی پەی تەماموو ئینسانیەتی کەرۊ. پەوکای چێگەوە سڵاموو وێم کیانوو پەی ئا مدرامانە تاریخییەو ڕابەر ئاپۊیە، کە دلۍ خاچوو ئیمرالییینە نیشانەش دا، بە ڕێزۊ یادوو گردوو ئا هامڕایا کەرووە، کە دلۍ ئی کۊشیاینە گەشمەرڎۍ بیێ".
