سلێمانیینە دژوو ئەرەگیرکارییەکاو دەوڵەتوو تورکی کۆنگرێوی ڕۆنامەوانیی کریا
شارو سلێمانیینە، کۆمەڵەو ناڕازیی شەقامی، دژوو ئەرەگیرکارییەکاو دەوڵەتوو تورکی کۆنگرێوی ڕۆنامەوانییشا کەرد.
بە دیمەن
وێرەگاو ئارۆی، باخی گشتیی شاروو سلێمانیینە، بە ئامادەبییەی ئەنداماو ڕێکوزیا مەدەنییەکا و چالاکا و بەشێوە جە میدیاکانە، کۆمەڵەو ناڕازیی شەقامی، دژوو هجووومەکاو دەوڵەتی ئەرەگیرکەروو تورکینە پەی دلێ خاکوو پانیشتوو کوردستانی، کۆنگرێوی ڕۆنامەوانیی کریا.
شنە عەلی خەیاتە، بەیاننامەو کۆمەڵەکەیش واناوە، بەیاننامەکەنە بەتندی ئیدانەو ئا هجووما کریا و ناڕازیبییەی خەڵکی ئەرەیاونیا و داواشا کەردە، کە لایەنە سیاسییەکێ هەڵوێستوو وێشا برمانا وەراوەروو ئەرەگیرکاریی خاکوو پانیشتوو کوردستانی.
دماو وانایوە بەیاننامەکەی، چالاکە پاکیزە حەمە ئەمینە واتش: "کوا ئا حوکمەتە کە واچێ مووچەی بێکەرامەت قبووڵ مەکەردێ و گەرەکتا نەبۆ، ئەی چی ئیساتێ ئەرەگیرکاری قبووڵ مکەرا و بێهەڵوێستێنێ، وەسێن بێهەڵوێستی، مشۆم گرد لایێ دژوو ئی هجووما هەڵوێستما بۆ."
