ئەنڎامەو فەرماندەیی گرڎی یەپەژەی رۆهلات عەفرینە باسش چانەی کەرد کە گێرتەی ڕابەروو گەلوو کوردی بە مەعناو گێرتەی زۋان، کلتور و ئشناسنامەیا و واتش: "سیستموو قڕکەردەی بە پیلانگێڵنی قوڵتەربیۆ".

ئەندامەو فەرماندەی گرڎی یەکینەکاو پارێزنای گەلی (یەپەژە)ی رۆهلات عەفرینە پۍ ئاژانسوو هەواڵوو فوراتی (ANF)ی قسێش کەردۍ و ئانەش باسکەرد کە ماوەو ٢٥ ساڵان ڕابەروو گەلوو کوردی جە ڕوو جەسڎەییوە گیریان، بەڵام فکر و فەلسەکەش تەماموو دنیێرە وەڵابیەنۆ و واتش: "هجوم پۍ سەروو ڕابەرایەتی هجوما ۋەران ۋەر پا کەسا کە دڵشا ئینا چنی ڕابەر ئاپۆی و فەلسەکەشا گێرتەن وۍ، بە پارادایموو ڕابەر ئاپۆی ۋێشا بە ڕێکوستەی کەردەن، بەمەعنێوەتەر ئی هجومە هجوما جە دژوو مرۆڤایەتی. سیستموو سەرمایەداری و دەوڵەتا هەژموونوازی مەڵامەتێنۍ ۋەروو دەموو گەلانە کە بە کلتور، دەنگ و حورمەتوو ۋێشاوە بژیۋا. ئانەی ۋەران ۋەر پینەی کۊشیان فەلسەفەو ڕابەر ئاپۆیا".

'گەرەکشابۍ ڕا جە کۊشیای شوناسی گێڕا'

رۆهلات عەفرینە باسش چانەی کەرد کە جە هەمانوەختەنە هجوم جە دژوو ویستوو ئاشتیانەو گەلوو کوردی کریا و واتش: "پی پیلانگێڵنیە گەرەکشابۍ ڕا جە کۊشیای چاندی و زۋانوو گەلا کەرا و سستموو قڕکەردەیشا جابەجێکەرد. پیالانگێڵنی میان نەتەوەی پیلانگێڵنی بۍ پۍ تاۋنایۆ زۋانی، قڕکەردەی چاندی و نکوڵیکەردەی".

'ئاخێزوو ۋەرنیشتی ۋێش سپاران بە فەلسەفەو ڕابەرایەتی'

رۆهلات عەفرینە سەرنجش وست سەروو ناڕازاییەکا ۋەران ۋەر بە پیلانگێڵنی میان نەتەوەی و واتش: "گرڎوو ئانیشا کە نامۍ ڕابەر ئاپۆیشا ئەژنیە، پەی قەزیەو ڕابەر ئاپۊی کۊشیایشا کەرد، سەرهۊرداو گەلی، هاواروو ئەڎایا، ئانۍ کە ئێرشا جە جەسڎەو ۋێشا وەردا و جە جەهانەنە بیۍ بە دەنگێوە، گێرتەو ڕابەر ئاپۆیشا پێسە گێرتەو ۋێشا وینا. ئاخێزوو ۋەرنیشتی بە فەلسەفەو ڕابەر ئاپۆی یاوا پی ئاستیە. گەر ئارۆ متاومۍ ۋێما پارێزنمۍ، ۋێڕێکوستەیما بەقوەتتەر کەرمۍ ئانە جە سایەو گرنگی فەلسەفەو ڕابەر ئاپۆیا. کۊشیای ٢٠ ساڵەو ڕابەر ئاپۆی جە ۋەرنیشتەنە بە ڕێبازێوە بۍ ۋەران ۋەروو ستەمی و سیستمینە سەرەش نەنامنارە و سیستمش شیکەردۆ. ڕابەر ئاپۆ بنەماو ئاخێزێوە فرە حێقمش جە ۋەرنیشتەنە متەراوە. جە هەستی بەقوەتوو وڵاتپارێزییوە هەتا بە ڕێکوستەبیەی تەڤگەروو ژەنا، گرڎوو بەشەکا گلێرگەی بەپاو فەلسەفەو ئاپۆی هۊرسەنگنایش پۍ ۋێش کەرد".

'یەپەژە بە پارادیموو ڕابەرایەتی جەنگش کەرد و گەورەبی'

رۆهلات عەفرینە ئانەش دەسنیشانکەرد کە یەپەژە بە پارادیموو ڕابەروو گەلوو کوردی ۋێش بە رێکوستەی و جەنگش کەرد و واتش: "ئەگەر ئازاڎیی نەبۆ ژیۋای مەبۆ، ئەگەر ڕێکوستەی نەبۆ پارێزنای مەبۆ. چی چوارچێوەنە یەپەژە بە فەلسەفەو ڕابەر ئاپۆی پیمانەو کۊشیای و ژیۋای ۋێش دیاریکەرد. یەپەژە جە کۊشیای دژوو دەوڵەتوو تورکی و داعشینە، سەرچەمەو هێزوو ۋێش جە ڕابەر ئاپۆیۆ هۊرگێرۍ. گەر ئارۆ متاومۍ ۋێما پارێزنمۍ ئانە پەیوەندیش بە قوڵببیەیۆ بە پارادایموو ڕابەر ئاپۆیۆ هەن".

'بە پارێزنامەکاو ۋێش پیلانگێڵنیش ماڕا'

جە بەردەوامی قسەکاشەنە رۆهلات عەفرینە سەرنجش وست سەروو گۆشەگیری سەختوو سەروو ڕابەروو گەلوو کوردی عەبدوڵا ئۆجالانی و واتش" تەرسەو هێزە هەژموونواز و ئەرەگیرەکا تەرسینە جە وەڵابیەیۆ فەلسەفەو ڕابەر ئاپۆی. گۆشەگیری سەخت، تەرسینە ۋەران ۋەر بە وەڵابیەیۆ پارادایموو ڕابەر ئاپۆی. پۊکەی جە کەسایەتی ڕابەر ئاپۆینە، زۋان، چاند و شوناسوو گەلوو کوردی گۆشگیر کریۆ".

'گەل داواو ئاشتی و دیموکراسی کەرۆ'

ئەنڎامەو فەرماندەیی گرڎیی یەکینەکا پارێزناو گەلی (یەپەژە)ی رۆهلات عەفرینە ئاماژەش بەگرنگی هەڵمەتەو'ئازاڎیی پۍ عەبدوڵا ئۆجالانی، چارەسەری سیاسی پۍ پرسوو کورد'ی کەرد و ئەرەیاۋناش گەل ئازاڎیی و دیموکراسیش گەرەکا و واتش: "ژەنی سەرمەشقایەتی کەرۆ. ژەنی جە کەسایەتی ڕابەر ئاپۆینە یاوا بە ئازاڎیی ۋێش و ڕزگاری ۋێش ئێستۆ. پۍ ئازاڎیی ڕابەر ئاپۆی کۊشیایۍ سەرەمڕە ئەنجام مڎریۆ. نەک تەنیا گەلوو کوردی، بەڵکم گرڎوو ئانیشا کە ئینۍ چێروو چەوەسیای و ئەرەگیرینە، گرڎ دلۍ کۊشیای ڕابەر ئاپۆینە ۋێشا ویناوە، خاوەنداری جە ڕابەر ئاپۆی کەرا".