سکاڵانامەو نویسگەو داواکاریی گرڎینوو ئەنقەرەی جە دژوو "دیرەن یورتسەڤەر"ی سەرنویسەروو ئاژانسوو میزۊپۊتامیای و ڕۊنامەوانۍ و پەیامکیانۍ "بێریڤان ئاڵتان، جەیلان شاهینلی، دەنیز نازلم، سەلمان گوزەل یوز، ئەمروڵا ئاجار و پەیامکیاناو ژن نیوزی، حەبیبە ئەرەن و ئۊزگور دەگەر" کە ئیساتۍ ئینۍ جە زینڎاننە و پەیامکیانوو ئاژانسوو هەواڵوو میزۊپۊتامیای (MA) "زەمۊ ئاگگۊز و محەمەڎ گیونهان" کە پەی ماوێوە پەی ڕائارڎەی جە ئۊفیسوو ئەنقەرەو ئاژانسوو هەواڵوو میزۊپۊتامیای هەرمانە کەرۍ، پەسەنڎ کریا.

کۊمیتەو داکۊکی و وەرگێری جە ڕۊنامەنویسا بە وەڵاوکریایۊێش، کاردایۊش وەراوەروو تۊمەتبارکەرڎەی ڕۊنامەنویسا بە "ئەنداماو ڕێکوزیاو تیرۊریسی" نیشانە دا و ئا تۊمەتبارکەرڎەیۊشە ڕەت کەرڎۊ.

کارلۊس مارتینێز دۍ لا سێرنا، ڕاوەبەروو بەرنامەکاو "سی پی جەی" جە نیویۊرکنە واتش: "مشۊم دەسەڵاتدارۍ ئا تۊمەتا ور شاناوە، گرڎوو ئا ڕۊنامەنویسا، کە بۊنەو هەرمانەکاشاوە گیریێنۍ زینڎاننە ئازاڎۍ کریا و ڕۊنامەگەری بە تیرۊر تۊمەتبار نەکەرا".

سی پی جەی ئەرەیاونانش، پەی ورگێرتەی سەبەب و لەیەکدایۊ، بارەو دۊخەکەیۊ جە ڕاو ئیمێڵیوە، نامێوەشا پەی داواکاریی گرڎینوو ئەنقەرەی و وەزارەتوو داڎوو تورکیای کیانان، وەلۍ حیچ جوابۍ نامەکەیشا نەڎریانۊ.

س.ز