جە میانەو بەشدارییکەرڎەیش پانێێوەنەو دیداروو یەرەموو هەورامانینە، خانمەی کۊڵیارە هەدیەعەلی-یە، بە نامونیشانوو ئەوەوانایۊیۍ ئەنسرۊپۊلجیی سیاچەمانەی، ئانەش بەروست، دلێنەو سیاچەمانەی پەڕا تەسویرۍ وەتەندۊسی و وەڵاتپارێزنی و هەستی نیشتمانپەروەری لاو تاکی هەورامیوە وەش کەرۊ، کۊڵیارەکۍ ئانەشە ئەوەخوای کەرڎۊ کە کاریگەریی وینای دیمەنی تراژیدی و یانەوێرانی و بەرکەرڎەی خەڵکی جە خاک و ئاوو وێش دلۍ سیاچەمانەینە ڕەنگش دانۊ و پەوکای هونەرمەندی سیاچەمانەواچ گڵویش بۊ بە هاواروو دەنگوو گەلی و جیای ئاڎیشایچ چڕۊ، خانمەکۍ جە نموونەو ئی لایەنینە ئی شیعرێشە بە نموونە وستە ڕووە:

با ژەرەژ وانۊ جە پاینوو دۊڵا

داخی داخانم هەورامان چۊڵا

کۊگاو غەمەکام ورگێروو بە کۊڵ

بەرووش هەوارگەی هەورامانی چۊڵ

جە درێژەو باسەکەیشەنە کٶڵیارە هەورامییەکۍ ئانەش ئەوەخوای کەرڎۊ، کە عەشقوو گلێرگەو هەورامانی پەی، سروشت، ئاژەڵ، ژیوگەدۊسی، عەشقێوە سەرمەدی و نەبڕیاوەن و هەورامییەکۍ پی عەشقیوە مژیوا و بەزموو ژیوگەدۊسی و ژیوگەپارێزنی بەزمی تایبەتش دلۍ گۊرانییۍ هەورامیێنە هەن، بە نموونەو بەزموو"کەڵۍ پەی کەڵا" و چند بەزمۍ تەرێچ، وەختۍ ماچۊ:

هەر وەختۍ مەرڎا وەسیەتم ئامان

قەبرەکێم بەرڎۍ قولەی ئەرسەلان

باقەبرم نەسەر ئا کڵاوە بۊ

با گۊشم پێقەو ئا کەڵاوە بۊ

 ئاماژەش پانەیە کەرد، کە ئینە یۊ جە دڵنشینتەرین و دڵلاونتەرین بەزمەکاو سیاچەمانەین و پەیوەندیی هەقەتینوو بەینوو هەورامییەکاو ژیوگەی بەر وزۊ، هەورامییەکۍ هەوەڵ بە شێعرەو دووەم بە گۊرانیۍ پێسە دەرڎەو دڵیشا جەنی ژیوگەی کەرا، یاگۍ واتەینە کۊڵیارەکۍ ئانەش وست ڕووە کە ئی باسەشە میانەو نامێوە ماستەری ئەکادیمینە پێشکەشوو زانکۊو سلێمانی کەرڎەن و بابەتێوە تەمام زانستی و یاگەدارا.