سیاسەتمەدارا تاراوگەی پاڵپەشتی ۋێشا پەی بانگەوازەکەو ڕابەر ئاپۆی و قەرارەکا پەکەکەی بەربڕی و واتشا: "پێشئامایەکۍ ۋەرکۊتوو مېیامینی زیاتەر یۊبیەی گەلو کوردیش کەردەن بە پەنەواز و ڕاش پەی دیدگاکا چارەسەری دیموکراتیکی کەردۆ."
سیاسەتمەدارا تاراوگەی جە ڕاو ئاژانسیماوە بانگەوازە تاریخیەکەو ڕابەر ئاپۆی و قەرارەکۍ کۆنگرەو ١٢ـەمینو پەکەکەیشا هۊرسەنگنۍ و جەختشا چانەی کەرڎۆ کە گرنگتەرین دەوری کاریگەر چی پرۆسەنە کە هامکاتا چنی پێشئامایەکا ۋەرکۊتوو مېیامینی دەوری سیاسیانەو ڕابەر ئاپۆیا.
'قەرارەکۍ پەکەکەی پەی ڕەخسنای ئاشتییا'
ئەندامو کۆنگرەو نەتەوەیی کوردەسانی (کەنەکە) د. مەجید حەسۆ ئاماژەش بە گرنگی بانگەوازییە تاریخیەکەو ڕابەر ئاپۆی پەی چارەسەری پرسە ڕیشەییەکا هەرێمەکەی کەرڎ و واتش: "کورد حەجگیز پاڵنەرو جەنگی نەبیەن. ویستو کوردا ژیۋایۍ ئاشتیانەن و پېسە نەتەوەکا تەری داراو مافە بنەڕەتییەکا ۋێشا با و بە زوان و شناسنامەو ۋێشاوە بژیوا. کورد هەمیشە بیەن بە قۊچەو قوربانی سیاسەتە مېیاننەتەوەییەکا. وڵاتاو هەرێمەکەی هەمیشە هەوڵشا دان ڕا جە هامپەیمانی و یەکڕیزی کوردا بگێرا. پەی نموونەی بە ئەرەمەرزنای دووە ئیدارەیی دەسەڵاتی جە پانیشتوو کوردەسانینە هەمیشە مەرامو ڕاگێرتەی جە یەکڕیزی کورداشا بیەن."
د. مەجید حەسۆ ئاماژەش بە کاریگەری سیاسەتی مېیاننەتەوەیی وڵاتە هەژموونگەراکا کەرڎ سەرو دۊڵەتا ناوچەکەی و جەختش چانەی کەرڎۆ ئا دۊڵەتۍ هەمیشە گەلو کوردیشا کەرڎەن بە ئامارازو بەرژەوەندییەکاشا و پېوەس بە دەورو ڕابەر ئاپۆی ئینەش وات: "بانگەوازەکەو ئېژا ئۆجالانی وەڵێوینایۍ گۊرەن پەی ئایندەو ناوچەکەی. ئی وەڵۍ وینایە هینو کەسێوە خاوەن ۋەرپرسیارین. نە ئۆجالان کوڵ ویر مکەرۆوە و نە پەکەکەیچ ئینا سەختینە. بەڵام جە ئیساتێنە گەلو کوردی پەنەوازش بە ئاشتی هەن. کۊششو پەکەکەی پەی رەخسنای ئاشتی بیەن. پۊکەی ئی بانگەوازییە دەرفەتێوە گۊرە پێشکەش مکەرۆ. ۋەرپرسیاری گرڎیمانە ئی دەرفەتەیە پېسە دەرفەتو گەلەکەیما هۊرسەنگنمۍ."
'پەیامە تاریخیەکە پەی تەمامو گەلو کوردین'
ئەندامۊو کەنەکەی ئەسرین قادریە کە ئەرەنیشتۍ ئەمریکاینە جەختش سەرو گرنگی بانگەوازییەکەو ڕابەر ئاپۆی کەرڎۆ و ئاماژەش پانەی کەڕڎ پېسە ژەنێوە بە گرڎ جۊرۍ ئینا چنی پەیامەکەی چونکی پەیامێوەن پەی گرڎو کوردەسانی و واتش: "سەرنجەکەو ئېژا ئۆجالانی پەی گرڎو ۋەرکۊتوو مېیامینی کەردەیۆ بەرەین ڕووەو پرۆژێوە تازەو فاڕیایرە. ئانەی باوەڕیش بە دۆزو کوردی بۆ پەنەوازا دارای چی پەیامە گرنگەیە بکەرۆ. چونکی تەنیا مژارێوە سیاسی نییا، بەڵکم پارێزنەرو ئایندەو زۋان و شناسنامەو گەلان. بەڕاسی ئەمنیەتو گەلەکەیما تەنیا بە گفتوگۆ مڕەخسیۆ."
نەسرین قادریە بانگەوازش جە گرڎو گەلو کوردی و بەتایبەت جە ئەڎایا کوردی کەرد بە گرڎ جۊرۍ پاڵپەشتی سەرو بنەماو پەیامە تاریخیەکەو ڕابەر ئاپۆی پاڵپەشتی جە پرۆسەکەی بکەرا.
پرۆسەکە کاریگەری ئەرێنیش هەن پەی ئایندەو هەرێمەکەی'
سەرۆکو کۆڕبەندو ئەڵمانی-کوردی د. یاسین بەهرامیچ ئاماژەش پانەیەدا گەلوو کوردی متاوۆنە بە ئەوەکۆشای هامبەش ئایندەو وێشا دیاری بکەرا و خۆسەری وێشا جە گرڏ و پارچەکا و کوردەسانینە بە دەس بارانە. د. بەهرام پەیوەس بە بانگەوازییەکەو ڕابەر ئاپۆی ئاماژەش پانەی دا بانگەوازییەکە هیوایێ فرەش دلێ گەلا ناوچەکەینە خوڵقنان و واتش: "ئینانی ئا بڕوێنە ئەر ئی پرۆسە بە ئەوەکۆشای و ستراتیژی درووسۆ بریۆ ڕاوە ئانە متاویۆنە جە پانیشتەنە فیدرالێزم، جە وەرنیشتەنە مۆدێلێوە خۆسەری و جە سەرنیشتەنە سیستەمێوە دادپەروەرانە چەسپیۆنە.
بێگومان ئینە ماڕاو سنوورە دەسکردەکا بەینو پارچەکا کوردەسانین ئینەیچ بە ماناو جابەجێ کەردە و سیستەمو کۆنفیدرالێزمی مێ و کاریگەرییێ ئەرێنی پەی گرڏ و گەلا وەرکەوتوو مییامینی ڕەخسنۆنە و بۆنە بە زەمان پەی ئایندەیشا."
