جە کەشە ئازاڎەکاوە بەرەو سەرنیشت، جە پانیشتۆ پەی ۋەرکۊتی و ۋەرنیشتوو کورڎەسانی، هەنگام بە هەنگام چنی گەلەکەیش ڕێبازو ڕاسیش گێرتەنە ۋەر. ڕۆنامەنوویسا و خۆنکارا سەید ئەڤرانی ئەرەیاۋناشا کە تا دما نەفەس خاوەنداری جە میراتەکەیش مکەرا.
هەر کەسێ پەی جارێوە سەید ئەڤرانش دیەبۆ، هەست پانەی کەرۍ کە عەیامێوەن مشناسۆش. ئینسان جە ساتی یووەمۆ چنی گەشمەرڎە سەیدی گنۍ ویرو تاریخی ۋییەرڎەیۆ. جە گێڵنایۆ یاڎەوەرییەکاشانە، هەرکەسێ گۆشش ۋنەگێرۍ، چنی یاڎەوەرییەکاش شۊنەو یاڎەوەریەکا کەشینە گێڵێنۍ.
چنی دەسپنەکەرڎەو شۆڕشو ۋەرنیشتی، سەید ئەڤران، یۆ بۍ چا کەسا کە حەقەتینەکا شۆڕشی بە گرڎو دنیۍ ئشناسۍ، چاوە دەگا بە دەگا جە عەفرینەۆ تا دێرکی حەمکۆی هەنگام بە هەنگام ئشناسۍ. جە سەرەتاو شۆڕشیوە تا گەشمەرڎەبیەیش بەردەوام بیەن جە کۆششو ڕۆنامەوانی.
جە سەرەتاو ئەرەمەرزنای ئەرەیاۋنای ئازادیوە جە ۋەرنیشتوو کورڎەسانینە، سەید ئەڤران دەوری گۆرەش گێڵنا. جە ساڵەو ٢٠١١یۆ هەتا ٢٢ۍ ئەیلوولو ٢٠٢٣ سەید ئەڤران نەک هەر بە قەڵەم و کامێراکەیش ئەرەکۊشایش کەرڎ، بەڵکم جەنگەوانێچش وەش کەردې. ئارۆیچ جەنگەوانا گەشمەرڎە سەید ئەڤرانی خاوەنداری جە میراتو ڕاو ڕاسی مکەرا و درێژە پا ئەرەکۆشایە مڎا.
جە یووەمین ساڵیاڎو گەشمەرڎەبیەو ڕۆنامەنوویس سەید ئەڤرانینە، ڕۆنامەنوویسا هەرێموو سەرنیشتی و ۋەرکۆتوو سوریای، کە پەروەردەو گەشمەرڎە سەید ئەڤرانیشا دیەن، پەی یاڎی بەرزیش هەڵوێس و هەستو ۋێشا بەربڕی.
'هەمڕا سەید ئەڤران هەستێوە پڕاوپەڕ زیڼەش بۍ'
ڕۆنامەنوویسە لاڤا ئیبراهیم-ە یووە جە خۆنکارەکاش باسو ئاشنابیەی ۋێش چنی سەید ئەڤرانی کەرد و واتش: "من و هەمڕا سەید جە ئەکادیمیاو ئەرەیاۋناکا گەشمەرڎە فایەقی یۆترینما ئشناسا. جە سەرەتاو ئشناسایمۆ پەی ئەوەڵجاری پاسە هەست کەرێنا کە عەیامێوەن مشناسوش، گرڎ کەسێ هەستێوە چامنەش بۍ. ئانەیچ چانسێوە گۆرە بۍ پەی من. چونکی هەمڕا سەید ئەڤران ڕەنجێوە فرەش دابۍ، ئینسان نمەتاوۆ بە چەند ڕستێوە باسی جەکەسایەتیش بکەرۆ. بەڵام ئاڎ شۆڕشگێڵنێوە جمیەرو ئازادی و ڕۆنامەنوویسێوە شۆڕشگێڵن بۍ کە ٥٣ ساڵۍ ژیۋای ۋێش بە ڕاو حەقیقەتی بەخشا.
هەرپاسە ئیبراهیم-ە باسو هەمڕا سەید ئەڤرانیش کەرڎ و واتش: "هەستێوە پڕاوپەڕ و زیڼەش بۍ، بە سۆزێوە فرۆ باسو یادەوەرییەکاش کەرۍ، پاسە هەست کەرێنمۍ کە ئێمەیچ چا چنیش ژیۋێنمۍ. هەڤاڵ سەید جە چوار پارچەو کورڎەسانینە ڕەنجێوە فرەش کێشتەبۍ. بەردەوام ئانەی لاشۆ گرنگ بۍ گەل بۍ و بەردەوام واچۍ؛ 'جەیاڎتا نەشۆ، ئێمە هەرمانە پەی گەلەکەیما مکەرمۍ'. پنەما واچۍ ڕۆنامەنوویس پەنەوازا بەردەوام جە گێڵای و ئاشکرا کەرڎەی حەقەتینەکانە بۆ."
'هەمڕا سەید تەنیا ڕۆنامەنوویس نەبۍ، بەڵکم شۆڕشگێڵنێوەیچ بۍ'
هەرپاسە پەیامنێرو کەناڵو ڕۆناهی تیڤی، زەکەریا شێخۆ، ئەرەیاۋناش، کە عەفرینەنە بەشداری ڕائاوردەو ئەرەیاۋنایش کەرڎەن و چا هەمڕا سەید ئەڤرانش ئشناسان و ماچۆ "تایبەتمەندی هەمڕا سەیدی کە قەد هۆشم مەشۆ، ئانە بۍ کە سۆزێوە تایبەتیش بە پەروەردە دای بۍ. سەید ئەڤران تەنیا ڕۆنامەنوویس نەبۍ، جە حەقەتینەنە شۆڕشگێڵنیچ بۍ و بەردەوام هەوڵ دۍ گلێرگەی بشناسۆ و چنەش کۆڵیۆوە. هەڤاڵ سەید ئەڤران گەنجینەو ڕۆنامەگەری پەکەکەی بۍ. ئا شارەزایانە باس جە حەقەتینەکا پەکەکەی کەرۍ و بە وردی ویر و فەلسەفەو ڕابەر ئاپۆی شرۆڤە کەرۍ. سەید ئەڤران بە تایبەتی پەی ڕۆنامەنوویسا هەرێمەکاو سەرنیشتوو ۋەرکۊتوو سوریای پېسە ڕەمزۍ بۍ."
'ئێمە ئەرەکۊشای هەمڕا سەیدی درێژە پنە مڎەیمۍ'
هەرپاسە ڕۆنامەنوویس نور حەسەن باسش چانەیە کەرڎ، سەرەتا جە ئەکادیمیاو ئەرەیاۋناکا گەشمەرڎە فایەقینە هەمڕا سەیدش ئشناسان و واتش: "هەڤاڵ سەید تەمەنێش بۍ، بەڵام بە زېڵێوە گەنجانۆ جە گەنجا نزیک بێوە. هەرپاسە باسو کەسایەتی ڕۆنامەنوویسا و پەیوەندییەکاشا جە گلێرگەنە پەیما کەرۍ. من دلۍ هەمڕاکامەنە جە ئەکادیمیانە گولانەتەرینشا بێنا. هەمڕا سەید بەردەوام پنەم واچۍ پەنەوازا کۆششی زیاتەر بکەری و وەڵۍ گنی، چونکی ئاینڎەت گۆرەن. هەمیشە قسەکێش ئینۍ یاڎمەنە. دماو پەروەردەی چا قەولم دا جە کارەکامەنە سەرگنوو. چەمەڕاو هەمڕا سەیدی بێنا کە بێ و ئا بەرنامەی کە ئاماڎەم کەردەبۍ بوینۆش، داخەم نمەشۆ دەرفەت نەبی. هەرچڼە گەشمەرڎەبیەو هەڤاڵ سەیدی ئێشۍ گۆرەش بە زېڵۍ ئێمە یاونا، بەڵام ئی ئێشەیە مکەرمۍ بە هێز و جە جابەجێ کەرڎەی ئەرکەکامانە ڕاو هەڤاڵ سەیدی درێژە پنە مڎەیمۍ.
