کۊششکارو ئەرەیاۋنای ئازاڎی سەید ئەڤران کە جە ٢٢ۍ ئەیلولو ٢٠٢٣ جە سەرنیشتوو ۋەرکۊتوو سوریای بە مەڵامەتوو سەکتەو زېڵێوە گەشمەرڎە بی، جە یووەم ساڵیاڎو گەشمەرڎەبیەیشەنە جە لایەنو هەمڕا و هامپیشەکاشۆ سەرو نزرگاکەیشۆ یاڎش بەرزڕاگیریا.

یاڎەکە جە مەزارگەو گەشمەرڎا گەشمەرڎە دەلیل سارۆخانی جە قامیشلۆ سازکریا و هامپیشەکێش گوڵێشا سەرو قەبرەکێشۆ نیێرە.

جە مەراسیمو یاڎکەردەیۆکەینە دماو دەیەقێوە بە بێدەنگی مردای پەی ڕێزۋنەگێرتەی، ئەندامو ئەنجومەنو بنەیانەو گەشمەرڎا محێدین حەسەن قسێش کەرڎۍ.

محێدین حەسەن دماو ئانەی سەرەوەشیش جە هەمڕایا و بنەیانەو گەشمەرڎە سەید ئەڤرانی کەرد، ئاماژەش بە ئەرەکۊشای گەشمەرڎە سەید ئەڤرانی کەرد و ئەرەیاۋناش کە گەشمەرڎە سەید بە ئەرەکۊشای ۋێش میراتێوە گۆرەش دماو ۋێش جیا ئاست و واتش، "پەنەوازا خاوەنداری جە میراتو گەشمەرڎا بکەرمۍ".

هامسەرۆکو یۆبیەی ئەرەیاۋنای ئازاڎی (یەرەئا) دڵیار جزیری دما پەیامو گەشمەرڎە سەید ئەڤرانیش ۋەناوە و ئاماژەش بە ئەرەکۊشای ٣٠ ساڵەو گەشمەرڎە سەید ئەڤرانی کەرد.

لاو ۋێشۆ ئەندامەو دەسەو ڕاوەبەری یەرەئای ئەڤین ئیبراهیمە واتش، "ئێمە پېسە خۆنکارا گەشمەرڎە سەیدی تا دما نەفەس رێبازو ئەرەکۊشای ئاڎیی درێژە پنەمڎەیمۍ".

جە مەراسیمەکەنە وێنەکۍ رابەرو گەلوو کوردی عەبدوڵا ئۆجالانی و گەشمەرڎە سەید ئەڤرانی بەرزۍ کریێوە و دروشمەو "گەشمەرڎۍ نمەمرا"ی وچیاوە.

مەراسیمەکە بە وەڵاوکەردەیۆ کتێبێوە گەشمەرڎە سەید ئەڤرانی بە نامۍ "رازە و پەنهانی کەشی" دمایش پنە ئاما.