فیدراسیۆنو سەردەمو ئارناشیزم سەرەڕاو پەسەنکەردەو سزاو جەقەنارەدای پەخشان عەزیزیێ ئەرەیاوناش، "سزاو جەقەنارەدای ئازادیوازێ پەخشان عەزیزیە، تنوتیژی سەرکوتکارانەو دۆڵەتو فاشیستو کۆمارو ئیسلامی بە راو گرڏی نیشانە مرۆنە".
جە چوارچێوەو ناڕەزایەتیە وەربڵاوەکا وەراوەرو پەسەندکەردەو سزاو جەقەنارەدای پەخشان عەزیزیێ، بەشو ئەرەیاوناو فیدراسیۆنو سەردەمو ئانارشیزم جە بەیاننامێوەنە پەسەن کەردەو سزاو جەقەنارەدای پەخشان عەزیزیێ، توێژەرو کۆمەڵایەتی، زینانو سیاسی کوردی و ڕۆنامەنویس جەلایەن دەسەڵاتو دادوەری ئێرانیۆ شەرمەزارکەردەن.
دەقو ئەرەیاوناکەی فیدراسیۆنو سەردەمو ئانارشیزم کە چێرو نامونیشانو "سزاو جەقەنارەدای پەخشان عەزیزیێ تەنیا بە ئامادەبییەی وەربڵاو ئێمە جە مەیانەکا ناڕەزایەتی بەربڕییەی هۆرشنیۆوە" وەڵاکریانۆ، بی جۆرە:
"حیچ یاگێ و سەردەمێوەنە، جەقەنارەداو چالاکوانا سیاسی نەک هەر نەتاوانشا بۆ بە مایەو مەنەیۆ دەسەڵاتەکا یان ڕاگیری جە جوڵەو شۆڕشگێڵی، بەڵکووم ئەنجامێوە پێچەوانەش بییەن. لە جە تاریخو ئەرەکۆشای جەماوەرینە، سەرکوتکەردەی و تنوتیژی نەک هەر جمیەرە ئازادیوازەکا نەمردنانش، بەڵکووم ئەرەکۆشای ئاریشاش رادیکاڵتەر کەردەن. جەقەنارەداو چالاکوانا سیاسی، تاکتیکێوە شکستواردەو بێ کەڵکا پەی پارێزناو دەسەڵاتی کە جە حەقیقەتەنە، تەنیا قینی و توڕەیی خەڵکی زیاترەر مکەرۆ و کەرۆش یادگەو جەماوەری بە ئاراسەو یەکڕیزیشا جە دژو دۆڵەتەکا و بۆ بەمایەو وڕناو ئا دۆڵەتا.
سزاو جەقەنارەدای ئازادیوازێ پەخشان عەزیزیە، تنوتیژی سەرکوتکارانەو دۆڵەتو فاشیستو کۆمارو ئیسلامی بە راو گرڏی نیشانە مرۆنە، چونکە سیستمێوە دەسەڵاتوازا کە پەی مەنەیۆ دەسەڵاتەکەیش جەقەنارەدای بەکارمارۆنە.
جە ویرو ئانارشیستو ئێمەنە جەقەنارەدای هێماو پێکئامای دەسەڵات و تنوتیژی چەسپیان جە هەناو دۆڵەتینە، کە مشۆم رووبەڕوووش بیمێوە و دلێش بەرمێنە. ئەرەکۆشایما جە دژو دەوڵەتەکا، دژو گرڏ جۆرە سوڵتێوە و دەسەڵاتوازیێن کە جەقەنارەدایش بە بەشێوە چانەیە منیۆرە.
هێزو ئێمە جە یەکڕیزی و هامپشتیی جەهانین، کە چا ڕێوە متاومێ دمای بە تاوانەکا دۆڵەتی بارمێنە، تا بە دلێشیەی بەرەو گلێرگێوە ئازاد و قوتارکەر جە سوڵتە و تنوتیژی هەنگام بنیێیمێ و تاومێنە جەهانێوە بە بێ بییەو هەر چەشنە دۆڵەتێ، دەسەڵات، زینان، ئەشکەنجە و جەقەنارەی بنیادبنیەیمێ و پەی چەسپناو سیستمێوە ئازادیوازی، یەکسانوازی و دادپەروەرانە پەی گرڏی، هەنگامێ بنییەیمێ.
داوا جە گرڏو ئازادیوازا مکەرمێ کە جەوەراوەرو ئی تاوانا مرداوە و دەنگو قوربانیا جەقەنارەدای یاونا وەرو گۆشو خەڵکو جەهانی. چونکە ئی ئەرەکۆشایە نەک جە دژو یەک حکومەتین، بەڵکووم جە دژو گرڏو شێوەکا دیکتاتۆریەتی و سەرکوتکەردەین".
