ئەندامەو کۆنسەو سەرۆکایەتی گرڎی کەجەکەی، سۆزدار ئاڤێستا سەرنجش وست سەرو گرنگی ئەوەکۊشای ٥٢ ساڵەی و واتش: "ڕابەر ئاپۆ واتش 'من چێ پېسە سۆسیالیستێوە مژیوو'، بەدەسئاوردەی ئەنجامېوە گۊرە بە ژیۋایۍ سۆسیالیستی مێنە دی".
دماو بانگەوازەکەو ڕابەر ئاپۆی جە ٢٧ و شوباتینە پەی "ئاشتی و گلېرگەی دیموکراتیکی"، سەرو بناغەو ئی بانگەوازیە، پەکەکە جە مابەینو ٥_٧ و ئایارینە جە دوۍ مېڎانۍ جیاوازو هەرێمەکاو پارېزنای مەدیاینە ١٢ هەمین کۆنگرەو نائاسایش بینا. ئەندامەو کۆنسەو سەرۆکایەتی گرڎی کەجەکەی، سۆزدار ئاڤێستا جە کۆنگرەکەنە قسێش کەرڎۍ و واتش: "ڕابەر ئاپۆ، نەک تەنیا جە ئاستو قسەکەردەینە بەڵکم جە پراکتیکیچنە، سۆسیالیزم و دیموکراتیکبیەی و یەکسانی سەرو هێڵۊو پەکەکەی بەدی ئاورڎ".
سۆزدار ئاڤێستا بە یاڎکەردەیۆ گەشمەرڎا ئەوەکۊشای ئازادی کوردەسانی دەسش بە قسەکاش کەرد و واتش: "سەرەتا بە ڕێز و وەشەسیایی و حەسرەتۆ، سڵام پەی ڕابەر ئاپۆی کیانو کە ٥٢ ساڵۍ و مانگێوە و ١٥ ڕوێن، ئەرەمەرزنەر و ڕۆح و مەژگو ئی تەڤگەرەینە. جە کەسایەتی هەڤاڵ حەقی کارەری و مەزڵوم دۆغانی و ساکینە جانسزۍ و هەمڕا فوئادی و هەڤاڵ ڕەزای و ئا هەڤاڵا کە چی دماییەنە جە هەرێمەکاو پارېزنای مەدیاینە گەشمەرڎۍ بیۍ، هەڤاڵ بەسێ و میترا و گابار، گرڎو گەشمەرڎا ئەوەکۊشای ئازادیی گەلو کوردەسانی، بە ڕێز و سوپاس و پنەزانایۆ یاڎۍ مارووە. سەرەو ڕێزی پەی یاڎیشا منامنورە.
تەڤگەرو ئازادی جە سەردەمو ئەوەکۊشای چەکڎارییوە تا ئیساتۍ، جە هەرێمەکاو پارېزنای مەدیاینە بە ئەوەکۊشای جەنگو مەڕەکا یاوان بە بەرزتەرین ئاست. گەلەکەما پەی زانیاری هۊرگېرتەی دەربارەو ئاژەو ڕابەر ئاپۆی جە کوردەسان و جبەرو وڵاتینە، هەڵمەتێوە گۊرێش دەسپنەکەرڎە. پېوەس پی ئەوەکۊشا گۊرەیە پەیوەندی چنی ڕابەر ئاپۆی نریارە. ئی زانیاری هۊرگېرتەیە بە قوربانیدای گۊرۆ بەدەس ئاما.
نمەتاومۍ تەنیا جە چوارچێوەو هەستوسۆزینە هۊرسەنگنای پەی ئا چێوا بکەرمۍ کە جە تاریخو جەهانی و بەتایبەت جە تاریخو گەلو کوردی و ژەنانە ڕووەشا دان. پەکەکە جە تاریخەنە شۆڕشی گۊرەش ئەنجامدا. ڕابەر ئاپۆ سوپاو ژەناش ئەرەمەرزنا و پەرەش پنە دا. ڕابەر ئاپۆ، نەک تەنیا جە ئاستو وتارێنە بەڵکم جە پراکتیکیچنە، سۆسیالیزم و دیموکراتیکبیەی و یەکسانی سەرو هێڵۊو پەکەکەی بەدی ئاورڎ. هامکات ئەوەکۊشای ژەناش پېسە پرەنسیپێوە پەرەپنەدا و بەهێزش کەرد. چا سەردەمەنە، گرڎو کۊششو ئێمە سەرو بناغەو بەسوپابیەی بۍ، واتە ئەوەکۊشایۍ گۊرە بۍ ۋەرا ۋەر بە فاشیزمی.
ڕابەر ئاپۆ ئازادیی ژەناش کەرد بە پلانەی یوەمینەش
ئەر بەڕاسی ئەوەکۆشای چەکداری ئەنجام بەدەس بارۆنە، تەنیا پێسەو سوپێوە کلاسیکی مەبۆنە، یعنی پێسەو سوپا میللییەکا گەلا ڕوسیای و ڤێتنامی و چینی مەبۆنە، مشۆم سوپێوە بۆنە کە ژەنی دلێشنە خاوەن ئیرادە بۆنە، سەرمەشقایەتیش بکەرا، یەکسانی و مافو وێشا بەدەس بارانە. پۆکەی ڕابەر ئاپۆ جە ساڵەو ١٩٩٣ سوپاو ژەناش ئەرەمەزنا. پەرسەو ئازادی ژەنی و بەسوپابییەی بی بە پلانەو یوەمیش. ئی هەنگامێ، بیی بە گەرەنتی سەرکۆتەو پرۆسەکەی. ڕابەر ئاپۆ جە دیداری یوەمەنە واتش: "چێگە پێسەو سۆسیالیستێوە ژیومێ". ئینە فرە گرنگ بێ. ئەوەکۆشای ٥٢ ساڵەما سەرو ئی بناغەیە بێ. بەڵام پەی ئانەی چیسەوڵای ئەنجام بەدەس بارۆنە، مشۆم ژیوایێ سۆسیالیستی، پەیوەندی کۆمیوناڵ و ژیوایێ کە تاوۆنە جە گلێرگەنە سەرمەشقایەتیش بکەرۆ، بێ دی.
ماناو ئاپۆیی بییەی، هەمڕایەتی حەقەتینەن
ئیسە کاتو وێڕێکوزتەی فیکری گۆرەین. گرڏ و فیکرە گۆرەکا دماو ماوێوە وەڵابیێنێوە. مەسیحییەت وەڵێ ٢٠٢٥ ساڵا بە ١٢ هەمڕێ دەسش پنە کەرد و تا ئارۆ گەشەش کەردەن. جە حزوورو ئی فیکرە و گەشمەرڏانە ماچونە: پەی لوایم چامنەن، وێم پەی ئینەی ئاماڏێنا. جە ڕاپیمای ئاپۆینە، هەمڕایێ جە زینانەنە واتەبێش: "کاتێ ئاپۆییەتی دەسش پنە کەرد، من زاڕۆڵێوەبێنا و جە وڵاتەکەم بڕییابێنارە". منیش ماچونە، جە قۆناغێوەنە کە فیکری ئاپۆیی وەڵابییەبێوە، ئێمەچ چامنێ بێنمێ، وەڵێ پەکەکەی، سەرو دیوارو یانەکاما ئاپۆیی وینێنمێ.
واتاو ئاپۆییەتی چا ڕوۆ تا ئارۆ، هەمڕایەتیێ حەقەتینە و درووس و چالاکا، بییەی بە دڵۆپێوە سەرو ئی هێڵەی. گرڏ هەوڵ و هەڵوێسێ من، چی سەولا پەی ئانەی مشۆم تاوەکو بەشداریێ حەقەتینە چێ ڕێنە درێژە پنە دەونە. جە حزوورو هەمڕێ و گەشمەرڏانە، هەست بە قەرزەکا سەر و شانەیم مکەرو، پەی ئانەی پێسەو هەمڕێوە ئاڏشا هەنگامە بنییەو، نزیکایەتی و هەنگام نییاو من با جۆرە بۆنە. ئی قسێ جە وێمەنە جابەجێ مکەرو".
