سزېوە تازۍ 'دیسپلین' سەروو ڕابەروو گەلوو کورڎی عەبدوڵا ئۊجالانیرە سەپیا
زانیا سزېوە تازۍ 'دیسپلین' سەروو ڕابەروو گەلوو کورڎی عەبدوڵا ئۊجالانیرە سەپیېنە، کە ماوەو یەرۍ ساڵان زانیاری جە بارەشۊ ۋەردەس نییا.
پاڕێزنەرا نۋیسینگەو یاسایی سەڎەی پۍ ئانەی خانەواڎەکۍ چنی ڕابەروو گەلوو کورڎی عەبدوڵا ئۆجالانی و زینڎانیا تەری حامیلی یڵدرم، وەیسی ئاکتاش و عومەر خەیری کۆناری جە زینڎان و ئیمراڵینە دیڎار ئەنجام بڎا، جە ١٠و تشرینی یۋەمینە سەردای داڎگاو جابەجېکەرڎەی سزاو بورسایشا کەرڎەبۍ.
پاڕێزنەرا جە سەرداکەیشانە داواشا کەرڎېبۍ کە خانەواڎەکۍ دیڎار چنی موەکیلەکاشا ئەنجام بڎا و ئەگەر 'سزاو دیسپلین'ی تازۍ بۊ ۋێنە و نمونېوەش جە پەڕاوەکا ۋنەپەرسایۊ وزیۊ ڕووە و ئەگەر 'سزای' تازۍ بۊ، پەنەوازا هۊرشنیۊوە.
داڎگاو جابەجېکەرڎەی سزاکا جە ١٣و تشرینی یۋەمینە جواب و داواکاری پارێزنەراش داوە و ئەرەیاۋناش، کە جە بارەو عەبدوڵا ئۆجالانی و زینڎانیا تەری 'سزاو دیسپلین'ی تازە بیەیش هەن، بەڵام ئاماژە پانەی نەکریان کە ئا 'سزاو دیسپلین' ەکەی سەپیان.
داڎگاکە گرڎوو داواکارییەکا پارێزنەراش جە بارەو هۊرگېرتەی نمونېوە جە دۆسیە و پەڕاوەکا بە بەهانۍ ئانەی "رەنگە جە دەزگاکا ئەرەیاۋناینە ۋەڵاکریاوە" ڕەڎکەردۊ.
