سەرۊكوو یەنەكەی ئەرەیاوناش، گەرەکمانە پەیوەندییەکاما چەنی گرڎ لێوە ئاسایۍ با بێت و ئامادێنمۍ پەی واتەواچی، وەلۍ چێروو فشاری و هەڕەشا و درۊنینە گفتوگۊ مەکەرمۍ و چند داوێوە دەوڵەتوو تورکی هەنۍ ناماقووڵێنۍ و حەرگیز مەیاونمێشا یاگۍ.
بافڵ جەلال تاڵەبانی سەرۊكوو یۊبییەی نیشتمانیی کورڎستان (یەنەکە)ی، کۊبییەیۊێنە هەولێرنە، بارەو هجووم و ئەرەگیرییەکاو دەوڵەتوو تورکی ئەرەگیری پەی سەروو هەرێموو كورڎستانیوە قسێش کەرڎۍ و ئاشکراش کەرڎ، کە "مەتاوۊ بلۊ تورکیا چونکوم بەبۍ هۊ یەرۍ قارەمانۍ هێزەکاو یەنەکەیش فڕۊكەخانەو كشتوكاڵیی عەربەتێنە گەشمەرڎۍ کەرڎۍ، هەرپاسە وەراوەرنە تورکیا چند داوێوەش هەنۍ، کە ناماقووڵینۍ عقولن و حەرگیز مەیاوناشا یاگێ".
ڕۊشنیچش کەرڎۊ، کە "داوا کریۊ چند بارەگا و حزبێوە دلۍ سلێمانیینە وزیارە، چونکوم پەیوەندییشا بە پەکەکەیۊ هەن، ئا یاگۍ مۊڵەتیی ڕسمییشا حكومەتوو هەرێمی و بەغدانە هەنۍ، ئادۍ مەتاوا و مافوو ئانەیشا نییا بارەگاو ئا حزبا وزارە".
باسیچش کەرڎ، "پەنەم سەیرا پەنەم ماچا وەزیروو وەرگێریی توركیای هەڕەشێش وەنە کەرڎەنی، ئێمە کورڎێنمۍ و عینادێنمۍ، بە فشار و هەڕەشۍ و درۊن قسۍ مەکەرمۍ، بەكارئارڎەی ئی ڕۍ غەڵەتا، چونكوم ئینە زوانوو جەنگین و ئێمە نیەنمۍ جەنگنە چەنیشا".
ئانەیچش وات، "هجوومەکاو توركیای پەی سەروو هەرێموو كورڎستانی بەهانێنۍ، چارەسەركەرڎەی كێشەكاو كورڎی بە گفتوگۊ کریۊ، بە فشار كێشەكۍ چارەسەرۍ مەکریا، من بەیانیان ورمێزوو فڕۊكێوە بێفڕۊكەوان سەرمۊ خولییۊوە، ئێمە حەز کەرمۍ بە واتەواچ بیاومۍ ئەنجام".
