ئەمجەد ئەمینی، تاتەو ژینا ئەمینیۍ دماو بەخشای خەڵاتوو ساخارۊڤی بە کناچەکێش و سەرەوردای 'ژەنی، ژیوای ئازادی'یوە، جە ستۊریێونە لاپەڕەی تایبەتیی وێشنە  تۊڕەو ئینستاگرامینە، پەیامێوەش ئاراسەو ئەنداماو پەرلەمانوو ئەورووپای و لوجنەو ورسەنگنای خەڵاتی میاننەتەوەیی ساخارۊڤی تایبەت بە مافوو ئینسانی کەرد.  

بەشێوە پەیامەکەو تاتەو ژینێنە ئامان، "هەواڵوو ورچنیەی کناچەکێما ژینۍ پێسە  ورگیرەو نامیەتەرین خەڵاتوو تایبەت بە مافوو ئینسانوو یۊبییەی ئەورووپای، نیشانۍ گرنگیپەنەدای شمە و گلێرگەی جیهانین بە ستەموەنەکریایی ژینۍ و فرەو هامتەمەنەکاش کە تەنیا پەی حەزوو مەنەیۊ ژیواێوە ئازادنە، بە دڵتەزنانە مەردێنی."

ئەمجەد ئەمینی واتەنیچش، ئجۊما یەکڕیزیی خەڵکی و پەیوەندییە کۊمەڵایەتی و سیاسییەکا سەرتاسەروو جیھانینە مشۊم دنیۍ کەرۊ بە یاگیوە پارێزنیاتەرە پەی زارۊڵا، گەنجا و ژیوای ئینسانیەتی.

ئاخروو پەیامەکەیشنە تاتەو ژینۍ نویستەنش: "کناچەکێما نەمەردێنە. چەنیش مژیومۍ. دڵوەشێنمۍ کە نامێش بیێنە ڕەزموو ئازادیوازی و یەکسانیوازی جیھاننە و هەست کەرمۍ ژینایچ پێسە ئێمە پینەیە دڵوەشەنە".

هیزی سەرۊکوو پەرلەمانوو ئەورووپای، خەڵاتوو ئێساڵوو ساخارۊڤیش پەی بۊ ئازادیی ڕابەروستەی، پێشکەش بە ژینا ئەمینیۍ و شۊڕشوو 'ژەنی، ژیوا، ئازادی' کەرد، کە کوشیای ئا کناچە کوردۍ بە ئەشکەنجەدایش لاو  پۊلیسوو ئەخلاقوو تارانیوە، بی بە چەخماخەو ئا سەرەوردایە.