جمیەروو ئازاڎیی ژناو ئێزدی "تاژۍ" باەری ئڕفانای ژەنە ئێزدییەکاوە جە یاگەکاو چێروو کۊنترۊڵوو پارتی "پەدەکە"ی، بەتایبەتی کەمپەکانە ئەرەیاوناێش وەڵا کەردۊ.

جە ئەرەیاوناکەینە ئامان: جە ٣ۍ ئابوو ٢٠١٤یۊ، دەیان هەزار ئێزدیۍ ئینۍ کەمپەکاو پانیشتوو کورڎستانینە و پێسە ئەسیری کامپەکانە، لاو پارتی"پەدەکە"یۊ گیریێنۍ.

تاژۍ ئاماژیچش دا پانەیە، سیاسەتێوە پیس کەمپەکانە دژوو خەڵکی ملۊ ڕاوە و واتش: "پارتی"پەدەکە" سیاسەتێوە ناشایسە و خراپ دژوو ژەنە ئێزیدییەکا بەرۊ ڕاوە و جە کولتووری و باوڕ و ڕەوشتی دوورێشا وزۊوە".

ئەرەیاوناکەینە ئامان: جە چند ساڵی ویەرڎەنە، دەیان ژەنۍ ئێزدیۍ ڕاو گرووپەکاو سەر بە پارتی "پەدەکە"یۊ ئڕفانیێنۍ و ئانەیچ جە ئەرەیاوناکەینە ئامان: "تا ئیساتۍ چارەنویسشا دیار نییا. دماین جاریچ جە چند ڕۊی ویەرڎەنە ٢ ژەنۍ کەمپ و یاگە ئێزیدییەکاو چێروو دەسەڵاتوو پارتی "پەدەکە"ینە ئڕفانیۍ. دەیان نموونۍ چانۍ هەنۍ، کە بنەیانەکۍ جە تەرسەو فشاری و هەڕەشەکاو پارتی "پەدەکە"یۊ بێدەنگۍ بیێنۍ".

تاژۍ ئاماژەیچش پانەیە دا، ئی نزیکبییەیۊیۍ وەرانوەروو ژەنا و گلێرگەو ئێزدی فرە یاگۍ تەرسێنۍ و ئانەیچش وات: "حیچ فەرقێوەشا چەنی کرڎەوەکاو داعشی نییا. داعش بەزۊر کناچۍ و ژەنە ئێزدییەکا جە ئاینی و باوڕوو وێشا دوورۍ وزێوە، وەلێم پارتی "پەدەکە" بە سیاسەتە پیسەکەو وێش هەمان هەرمانۍ کەرۊ، چا ڕێوە کناچا و ژەنە ئێزدییەکا جە باوڕی و گلێرگەکەیشا بڕۊرە. پەدەکە گەرەکشا جە کەسایەتیی ژەناو ئێزدینە ئێزدایەتی جە ڕێخەوە بارۊ".

جە ئەرەیاوناکەو تاژێنە ئامان: ڕاگێریکەردەی چا هجووما و چارەسەرش، ئەوەگێڵاین پەی زێدوو وێشا و ڕزگاربییەین جە دەسەڵات و سیاسەتوو پارتی "پەدەکە"ی و ئاماژەیچش پانەیە دا: "تا میللەتەکەما جە کەمپەکاو پانیشتوو کورڎسانینە، ئەسیروو سیاسەتەکاو پارتی "پەدەکە"ی بۊ، کۊکوشی و سڕیەیۊ کولتووری و ئەخەلاقی وەراوەرشا درێژەش بۊ".

جە ئەرەیاوناکەینە، داوا جە گلێرگەی و بەتایبەتی ژەنا کریان،  وەراوەروو ئا هەرمانە پیس و قیزەونانە بێدەنگۍ نەبا و واتیچش: "ئێمە دەنگوو یاونمۍ ئەنجوومەنوو ڕوحانی، کە وێشا وەراوەروو ئا هەرمانە قیزەونانە بێدەنگ نەکەرا. وێشا چا ئەرک و وەرپەرسبییەیە نەدزاوە، کە  وەراوەر بە گلێرگەکەیشا ئینا ملشاوە".

س.ز