تەڤگەرو ژەنا ئازادی (تەژەئا) سەبارەت بە ٤و نیسانی کە ڕۊوبیەو ڕابەر ئاپۆیا، بە نامونیشانو "بە گلېرگەو دیموکراتیکی بەرەو ئازادی هەنگامە منیەیمۍ" ئەرەیاۋنێوە نویسیاش وەڵاکەرڎۆ.

تەژەئا ئاماژەش پانەی دا ٤و نیسانی بە مڎرامانوو ٨و ئاداری و جۆش و خرۆشو نەورۆزیوە پێشوازیش ۋنە مکەرمۍ و تەئکیدش کەرڎۆ ڕۊبیەو ڕابەر ئاپۆی پەی ژەنا جە ئەڎابیەی گێڵای ئازادییا.

تەژەئا واتش: "ئېژا ئۆجالان بە واتەی 'پرسو ئازادی ژەنۍ، گرڎ گرنگیێوە ۋێش پارېزنۆ' جارێوەتەر پرسو ژەنێش پېسە مېیانو گرڎو پرسەکا گلېرگەی هۊرگېرت. ئێمەی ژەنا بە واتەی 'ئازادی ڕابەرایەتی ئازادیمانە' جوابو ئی حەقەتینەیما داوە. بانگەوازو ئاشتی و گلېرگەی دیموکراتیک پېسە ڕێنێسانسی هۊرسەنگنمۍ و وەرپرسیاری بە گلېرگەییکەردەی ئی بانگەوازییە جە ئەستۆ گێرمۍ. پەی خاوەنداری کەردەی جە بانگەوازو ژیۋای هامبەشی، ڕۆو ٤و نیسانی گرڎو ژەنا بە هوتافەو "بە گلېرگەی دیموکراتیک بەرەو ئازادی هەنگامە منیەیمۍ" خوڵقە مکەرمۍ پەی مېڎانەکا. ئێمەی ژەنا پەی ئانەی ئامای وەهاری بە ئازادی تاجدر بکەرمۍ و پەی بنیاڎنیای ئاشتیێوە شکۆمەندی، جە مېڎانەکانە بیمۍ."

چالاکییەکۍ تەژەئای                                        

ئا چالاکیۍ تەژەئا جە ما بەینو ١-٤و نیسانی ئەنجامشا مڎۆ، پی جۊرەنە:

*جە گرڎو شارەکانە نەمامۍ 'ئازادی' منریا.

*٣ۍ نیسانی مېڎانو فێستیڤاڵینە جە رحانە، گلېرۊبیەو ژەنا ئەنجام مڎریۆ.

*٤و نیسانی بە سەرمەشقایەتی ژەنا جە خەلفەتی تا ئامارا ڕاپیمای ئەنجام مڎریۆ.

*٤و نیسانی جە گرڎو شارەکانە مەراسیم ئەنجام مڎریۆ.