واتەواچەو دەم پارتی ئایشەگوڵ دۆغانە دەربارەو گلېرۆبیەو لوجنەو ڕاوەبەری مېیانو پارتەکەیش جە مېیانو گرڎیی پارتەکەیشەنە کۆنگرەی ڕۆنامەوانیش بینا.

'ئەشۆ هەنگامەی پەنەوازە بنریۆ'

ئایشەگوڵ دۆغانە سەرنجش وست سەرو مەراسیمو دلېنەبەردەی چەکی جە لایەنو گەریلاکاوە جە ١١و تەمموزی، ئەرەیاۋناش ئی پرۆسە هەنگامېوە تاریخیەنە پەی ئاشتی. سوپاسو گرڎو بەشدارا و هامکارا ئی هەنگامێشە کەرد، ئەرەیاۋناش دماو قەرارەکا کۆنگرەو ١٢هەمینو پەکەکەی، جەختکریاوە سەرو هەنگامنیای جە ستراتیجو ئەوەکۊشای چەکڎارییوە بەرەو ستراتیجو سیاسەتی دیموکراتیکی، واتش: "ئێمە ئینایمې چنی دیالۆگی و ئەرەنیشتەی پەی چارەسەری کێشەکاو تورکیای و پەی ئی ئامانجیە هەرمانە مکەرمې. پەی ئانەی چەک جە گرڎ ڕوێوە دووروزیۆوە و ئی هەنگامې هەمیشەییە بۆ و مېڎانو سیاسەتو دیموکراتیکی بەهێزتەر بۆ، پەنەوازا بەبێ دماکۊتەی، هەنگامەی پەنەوازە بنریۆ. ئەشۆ میکانیزمەکې ئاماڎە بکریا. پېسە جە قسەکا ئی دماییەینە ئامان، کۆمیسیۆنێوە پێکمې. بە وەشحاڵیۆ پێشوازی چی هەنگامې مکەرمې".

'پەنەوازا دەمودەس کۆمیسیۆن پێکبې'

ئایشەگوڵ دۆغانە، واتش: "ئەشۆ گرڎو پارتە سیاسییەکا بەشداری ئی کۆمیسیۆنیە بکەرا. پېسە دەم پارتی، ئەسرارش مکەرمېوە، ئەشۆ کۆمیسیۆنەکە بەشێوێوە هەرمانە بکەرۆ کە ئەنجامی کاریگەر و هەمیشەیش چنە گنۆوە".

'دەم پارتی، پارتو دیالۆگی و گفتوکۆین'

جە جواب و ڕەخنەکا سەرو پارتەکەی، ئایشەگوڵ دۆغانە ئەرەیاوناش هەڵوێس و گوتارە و دەم پارتی ڕۆشنا، واتش: "ئێمە لایەنگرو دیالۆگی و گفتوکۆینمێ. ئێمە لایەنگرو نیارە و یاسێوە هاموڵاتیبییەی یەکسانینمێ جە تورکیانە. هەمیشە ڕەخنە و پێشنیارەکا بە گرنگ وینمێ. هەڵوێسەکێما پەیوەندیشا بە هورچنییە و ڕێژەو دەنگەکاوە نییا، بەڵکوم هەڵوێسەکێما گرێدراوو پرەنسیپەکەکامانە".

'پێوەرە سەروەریی یاسێ بنیات منییەیمێ'

ئایشەگوڵ دۆغانە جەختش کەردۆ مشۆم گرڏما هەڵوێسما بۆنە و بە وەرپرسیارێتییۆ مامەڵە بکەرمێ، جەختش کەردۆ مشۆم جە تورکیانە سەروەریی یاسێ بۆنە، واتش: "پەی بەدیئاردە و ئی ئامانجەی، بانگەواز جە ژەنا و جوانا و کرێکارا و گرڏ و توێژەکا گلێرکەی مکەرمێ، تاومێ پێوەرە سەروەریی یاسێ بنیات بنییەیمێ".

'ئازادیی عەبدوڵا ئۆجالانی، داواکاریێوە ڕۆشنا'

ئایشەگوڵ دۆغانە دەربارەو ئازادیی جەسەیی ڕابەر ئاپۆی جواب و پرسیارە و ڕۆنامەنوویساش داوە، ئەرەیاوناش ئی بابەتە لاو دەم پارتی ڕۆشنا، واتش: "ئۆجالان جە دووەمین پەیامو ڤیدیۆینە، پەیوەس بە ڕەوشی وێش باسو ئازادیی گلێرگەیش کەرف. ماچۆ کاتێ گلێرگە ئازاد بۆنە، تاکیش ئازاد بۆنە. من پی جۆرە جوابتا مرەوە. مشۆم گرڏ و ڕەفتارە نادیموکراتیکەکا دمایشا بێ و مەبۆنە ڕەوشو ئیمراڵی پی جۆرە بەردەوام بۆ. جە دووەمین پەیامو ڤیدیۆینە ماچۆنە، بڕێ دیدار و گلێرۆبیێ بێنێ. دەربارەو ئا گفتوگۆیا چی بارۆ هەنێ بەڕۆشنی قسێ مکەرۆ. بەڵێ، جە یەکەم ڕۆوە، جە ساڵە و١٩٩٩ـی، داواو ئازادیی جەسەی مکەرۆ. ئێر تەنها داواو ئا ڕێکوزتەیە نییا کە ئار ئەرەمەزنانش. جە گرد یاگێنە ڕووبەڕوو ئی داواکارییە بیمێ. وێش ڕاستەوخۆ جواب و ئی پرسیاراشە دانۆ".