کتێبو وېڕاۋەبەریی دێمۆکراتی جە نۋیستەی شەهیدی سەرکەردە ”دیار غەریب"  ئەندامو کۆنسەرو سەرۆکایەتیی گردیی کەجەکە-ی کە پڕۆژېۋن پەی چارەسەرو کېشەکاو کۆمەڵۍ ‌و سیستەمی و فەلسەفە و پەیلۋای ڕابەر ئاپۆ-یش بە بنەما گێرتەن، چاپ کریا.
کتێبەکە جە هۊرگېڵنای (پېڕۊ هۊرگېڵنای پەی زۋانی هۆرامی) و ١ هەزار دانێش چنە چاپۍٚ کریێنۍٚ و  بڕیارە بە ئی زووانە وەڵاو بکریۆنەوە و ڕەوانەو کتێبخانەکاو هەورامانی و کوردستانی بکریۆنە.

سەبارەت بە کتێبەکەی پېڕۊ هۊرگېڵنای پەی زۋانی هۆرامی ئی زانیارێشە دێنۍ.

کتێب/ وېڕاۋەبەریی دێمۆکراتی
نۋیستەی/ دیار غەریب

هۊرگېڵنای/ پېڕۊ هۊرگېڵنای پەی زۋانی هۆرامی
چاپی یەکەم، ٢۰٢٢
دلېنەو کتېبی
- ۋەرینەو ھۊرگېڵنای
- ۋەرینەو نۋیسەری
- ۋەرو چېشی سیستەمو وېڕاۋەبەریی دێمۆکراتی؟
- پرەنسیپەکۍ سیستەمو وېڕاۋەبەریی دێمۆکراتی
- جېیاۋازیی سیستەمو وېڕاۋەبەریی دێمۆکراتی و سیستەمو دۆڵەتی
- پەیۋەڼی سیستەمو وېڕاۋەبەریی دێمۆکراتی و سیستەمو دۆڵەتی
- پایەگێ سیستەمو وېڕاۋەبەریی دێمۆکراتی
- نەخشو کەسەکا جە سیستەمو وېڕاۋەبەریی دێمۆکراتینە
- ئابۇری دۆڵەتیی، ئابۇری تایبەتیی، ئابۇری کۊمەڵۍ
- شېۋازۊ وۍ ڕېکۋستەی جەماۋەری جە سیستەمو وېڕاۋەبەرینە
- نەخشو پېشەنگایەتی جە سیستەمو وېڕاۋەبەریی دێمۆکراتینە
- نەخشو پارتییەکا [حېزبەکا] جە سیستەمو وېڕاۋەبەریی دێمۆکراتینە
- نەخشو ڕېکۋزیاکا جە سیستەمو وېڕاۋەبەریی دێمۆکراتینە
- پایەگاو مافی جە سیستەمو وېڕاۋەبەریی دێمۆکراتینە
- ڕاۋېیەرو سیستەمو وېڕاۋەبەریی دێمۆکراتی پەی چارەسەرو پەرسەکا
- ئەرکو ئەنجۇمەنەکا گەلی جە سیستەمو وېڕاۋەبەرینە
- سیستەمو وېڕاۋەبەریی دێمۆکراتی جە پانیشتو کورڎەسانی
- ئەنجامگیری

ۋەرینەو (هۊرگېڵنای پەی زۋانی هۆرامی)

 وەنەرۍ ئازیزە، وەنەری ئازیز، ئی کتېبە کە گیانبەخش (دیار غەرەیب) نۋیستەن، ئېمە پېسەو پېڕۊ هۊرگېڵنای پەی زۋانی هۆرامی پەنەۋازما زانا، پەی ئاشناکەرڎەی پەیلۋای و ۋەیرلەکا نۋیسەری، ئی کتېبەیە پەی زۋانی هۆرامی هۊرگېڵنمۍ. هامکات گەرەکمانە جە ڕاو هۊرگېڵنای ئی کتېبەیۆ کۊششېۋ ڕاۋزمۍ، کە ئەشیێ جە ماۋەو سی ساڵی ۋېیەرڎەینە ڕاۋزیابېیێ و ڕادەی کەم جە سەرەتاو هەزارەی دۋەمیۆ، کە پەی ئەۋەگېڵنای زۋانی هۆرامی پەی بوارو نۋیستەی و وانای و ...تد کۊشش کریان، پەی ئاشناکەرڎەی فېروازە هۆرامی-زۋانەکا بە نۋیستەی هۆرامیی و چنی ئاڎېچی ئاشناکەرڎەی قسەکەرا زۋانەکا تەرو ئێراقی و ئێرانی بە زۋانی هۆرامی و ڕاگېرتەی جە فۆتیای ئی زۋانە کۊن و تەسەل و فراۋانەیە، ئی هەنگامۍ نریێبېیێ.
ئېمە پەی ئا مەبەسەیە، هەنگامۍ یەکەمەما بە هۊرگېڵنای ئا کتېبا [کە بە هۆرامی یان سۆرانی نۋیسیێنۍ پەی سەرو زۋانەکەی تەری] دەس پنە کەرمۍ و بە پەیلۋاو ئېمە پەی ئەۋەژیۋنای و تواناڎارکەرڎەی و پەرەدای بە ڕۊتو ئارۊو زۋانو و ئەدەب و کولتۇر و ڕۊشنۋیریی ناوچەو هۆرامانی کتېبۍ پەنەۋازۍ هەنۍ و متاۋا بە ۋەڵکۆتەی ناوچەو هۆرامانی خزمەت کەرا و وەنەرۍ هۆرامی زۋانۍ پەی پارېزنای زۋانی ئەڎایی وېشا هۊشیارۍ کەراۋە و هەر پاسەیچ پەی ئا سۆرانی زۋانۍ کە ئارەزۇمەڼۍ فېربېیەی زۋانی هۆرامی هەنۍ، ئاسانکاریی و یاریدایېۋ بۊ.
پەی ئا مەبەسەیە، ئېمە هامکاتو هۊرگېڵنای کتېبەکەی، ۋەراۋەرو هەر لاپەڕیۋی هۊرگېڵیایۆ، هەمان لاپەڕە بە زۋانی سۆرانی منیەیمېرە، ۋاتا کاتېۋ کە وەنەرۍ ۋەرو نائاسناییشا بە زۋانی هۆرامی یان چنین نۋیستەی زۋانی هۆرامی، ۋاچېۋە یان دەسەۋاچېۋە نەیاۋانە، بە سەرنجدای دەقە بنەڕەتییە سۆرانییەکەی گرفتو ئەنەیاۋای یان ئەۋەوانای نۋیستە هۆرامییەکەی پەی ئاڎېشا چارەسەر کریۊ.
ئېمە چېگەنە پېسەو دەس ۋەڵۋستېۋی پەی یاریدای و پەشتیۋانیکەرڎەی جە هۊرگېڵنای پەی زۋانی هۆرامی، ئاماڎۍ هەنمۍ، گرڎ بەڕېزېۋۍ|بەڕێزیۋی پەی دەس پنە کەرڎەی کۊششېۋی چیمنەیە یارڎی بڎەیمۍ. گرنگ نېیا هۊرگېڵنای کتېبەکا پەی کامە دیالێکتو زۋانی هۆرامی ئەنجامبڎریا، گرنگ ئانەن، کە ڕانۋیسو هۊرگېڵناینە ئەلفابێتو زۋانی هۆرامی پەیڕەۋ کریۊ، بەتایبەت جە هېمسازیی یان نۋیستەی دۋۍ دەنگە هۆرامییە تایبەتانە ( ۊ ، ې ) کە یەکەم پېسەنە دەنگو بۊرەی (ضمە) عەرەبی و دۋەم پېسەنە دەنگو چېرەی (کسرە)ی عەرەبی و جە زۋانی سۆرانی و کرمانجییەنە نېیەنۍ و ئەلفابێت و کیبۆردۍ سۆرانی-کرمانجییە بە نۋیستەی و پارېزنای ئاڎېشا وەڵام نمەڎۊۋە. هەر ئا وەڵام نەڎایە و نەبېیەی پیتەکا جە کیبۆردۍ سۆرانییەنە، بېیەن بە مەڵامەتو هەڵە بەکاربەرڎەی دۋۍ پیتا تەری ( ۆ ، ێ )، کە ئا دۋە دەنگە جە زۋانی هۆرامیچەنە هەنۍ و بەکاربەرڎەیشا پەی دۋە دەنگە هۆرامییە جېیاۋازەکەی ( ۊ ، ې ) بۊ بە مەڵامەتو شېۋنای و تېکەڵ بېیەی ۋاتاو ۋاچە جېیاۋازەکا، کە جە زۋانی هۆرامینە فرەو کرڎارەکا و یاۋەرکرڎارەکا و نامەکا و یاۋەرنامەکا و ئامرازە ڕازۋانییەکا ئا دۋە دەنگەشا ( ۊ ، ې )  چنە هەنۍ و نەبېیەی پیتۍ تایبەتۍ پەی ئاڎېشا، بۊ بە شېۋنای سەراپاو زۋانی هۆرامی.
ۋەرو ئا مەڵامەتەیە و سەرو ئا بنەمێ، ئېمە ئاماڎۍ هەنمۍ، جە ئا هۊرگېڵنایا پەشتیۋانی کەرمۍ، کە بە درۊس نۋیستەی هۆرامی گرنگیی مڎا و زۋانی هۆرامی نمەشېۋنا.
ئېمە بە ئا هومېڎە ئی هەنگامە یەکەمۍ منیەیمۍ و بە پەنەۋازیی چاپکەرڎەی دۋە زۋانیی هۊرگېڵیاکا گرنگیی مڎەیمۍ و بەپاو تواناو وېما پەشتیۋانی کەرمۍ، بە هومېڎو ئانەیە ئی هەنگامۍ بۊ بە یاریدایېۋی گۆرە پەی ئا هۆرامی زۋانا کە گەرەکشانە هۆرامی نۋیستەی فېرۍ با و هەر پاسە پەی ئا سۆرانی زۋاناچە کە گەرەکشانە زۋانی هۆرامی فېرۍ با. بە هومېڎو ئانەیە هۊرگڵنای جە گرڎو زۋانەکاۋە پەی زۋانی هۆرامی بە دۋە زۋانە چاپکریۊ؛ ۋاتا لاپەڕېۋ بە زۋانی هۆرامی و لاپەڕەی ۋەرانۋەرش بە زۋانی بنەڕەتیی نۋیسیاکەی.
پەی بەشداریکەرڎەی و پەشتیۋانیکەرڎەی و یارڎیدای و هامکارییکەرڎەی (پېڕۊ هۊرگېڵنای پەی زۋانی هۆرامی)، بېژگە مەرجۊ درۊس نۋیستەی ئا دۋە دەنگە ( ۊ ، ې)  تایبەتا زۋانی هۆرامی و بەکاربەرڎەی پیتۍ تایبەتۍ پەی نۋیستەیا، هیچ مەرجی تەر بېیەیش نېیا.
وەنەرۍ بەڕێزە، وەنەری بەڕێز، پەی ئاسان بېیەی ئەۋەوەنەی ئی کتېبەیە پەی شمەی تازە ئاشنێ بە نۋیستەی ھۆرامی و درۊس ئەۋەوەنەی پیتە تایبەتەکا ئەلفابێتی ھۆرامی، سەرو لینکو پاڵو کتېبەکا کلیک کەرڎۍ:
ڎ : https://t.me/Ferhengu_Zvani_Horami/2851                                
ڼ : https://t.me/Ferhengu_Zvani_Horami/3353                                
ۋ :    https://t.me/Ferhengu_Zvani_Horami/3461                                 
ۊ : https://t.me/Ferhengu_Zvani_Horami/3512