ئا ژەنۍ سەروو داواو  تۊڕەو کۊشیای دژوو تندوتیژ ئامەدنە کوۍ بیێوە، تا سەرنجەو دنیۍ کێشا پەی سەروو ھجوومەکاو وەرنیشتی و فەلەستینی، وەردەموو دادگاو ئامەدینە وێنیشانەداێوە ی ناڕەزایەتییشا ڕێک وست.

ھێزەکاو پۊلیسی داواشا وەنەو ژەنە چالاکا کەردە، کەلیمۍ "وەرنیشت"ی سەروو لافیتەکاشاوە لا بەرا. پەوکای نزیکەی ٤٠ گفتوگۊیا کریێ، وەلۍ چالاکۍ کۊڵشا نەدا.

دماتەر ئەسمەر ئۊزەرە، سەرۊکەو ناوەندوو مافوو ژەناو سەندیکاو پارێزنەراو ئامەدی واتش: چی پۊلیس ڕاشا وەنە گێرۊ ئەوەخوایش کەردۊ، "ئێمەی ژەنی جەنگما گەرەک نیا، قەرار بۍ ئارۊ چێگە کۊنگرێوە ڕۊنامەنویسی کەرمێ، وەلۍ ڕاشا وەنە گێرتیمۍ چونکوم سەروو لافیتەکەیۊ کەلیمۍ 'وەرنیشت'ی نویسیێنە".

ئا ژەنە چالاکۍ هجوومەکاو تورکیایشا پەی سەروو وەرنیشتی و هەم هجوومەکاو ئیسرائیلیشا پەی سەروو فەلەستین-ی ئیدانە کەردێ، ھەرپاسە پێسە نیشانەدای ناڕەزایەتی وەراوەروو ئا پۊلیسا ڕاگێرییشا وەنە کەردێنۍ چالاکیی نیشتەیرەیشا کەرد.  

چالاکییەکەنە دروشمەکاو "وەربەس پەی ئیسرائیلی بنیەیدێرە نەک پەی ژەنا" و "ژەنی جەنگشا گەرەک نیا" و "ژەنی، ژیوای، ئازادی"یشا واتێوە.  

ھێزەکاو پۊلیسی ڕاشا نەدا بە ژەنە چالاکەکا کۊنگرەی ڕۊنامەنویسی بەسا، وەلۍ حیچ کاردایۊشا وەراوەروو ئا کەسا نیشانە نەدا کە پەی فەلەستینی ڕاشا پیما.