دماو ١٠ ساڵا ئاوارەیی ئیتر گەلوو شەنگالی پۆل پۆل مگێڵانێوە پەی سەروو یانە و حاڵ و ماواو وێشا. چەنی  نزیکبییەیوە دەیەمین ساڵیادوو فەرمانەو ٢٠١٤ گلێرگەی ئێزدی گەرەکشەن دۆسیەو ئاوارەیی و کۆچبەری بەتەمامی بوزۆرە و بگێڵۆوە سەروو یانە و حاڵوو وێش و واوەی دەس بە ژیوای ئاسایی وێش بکەرۆوە.

ماوەی ویەردەنە وەزارەتوو کۆچ و کۆچبەراو عێراقی قەرارش دابێ، کە بەرەو سەرجەموو کەمپەکاو ئاوارەکا بوزۆرە و ئا کۆچبەرێ بگێڵاوە پەی زێدوو وێشا، بەڵام بە بۆنەو دەسوستەینەی پەدەکەیوە ئا وەختە کە دیاریی کریابێ، درێژ کریاوە و قەرار دریا تا ٣٠ تەمووزی کەمپەکێ بەتەمامی بوزیارە.  

ئا ١٣٠ یانە ئارۆ گێڵێوە، خەڵکوو دەگا و گلێرگەکاو شەنگالینێ و چا ئەرەنیشتێ باوە و ئیدارەو وێڕاوەبەریی شەنگالیچ بە گردوو هێزوو وێشۆ پەی دابینکەردەی پەنەوزاییەکاشا کەوتێنێ ئامادەباشییوە.

دماو ئانەیە پارێزگاو سلێمانی جە ئاوارەکاو شەنگالی چۆڵ کریا، ئاوارەکاو شەنگالی دهۆکیچەنە گێڵێوە و  تەنیا ئارۆ ١٣٠ یانێ گێڵیوە و زیاتەر جە ٦٠٠ یانای تەریچ ماوەو دووێ ڕوای تەرینە مگێڵاوە.

بە پاو زانیارییەکا ئەگەر پەلە بکریۆ جە ئامادەکەردەی دۆسیە و پەڕەو گێڵایوەی ئاوارەکانە، وەڵێ ساڵیادوو فەرمانەو (٣ی ئاب)ینە سەرجەموو کەمپەکا چۆڵێ مبانە، بەڵام پەدەکە قۆرتێ و وەربەسێ فرێ وەش مکەرۆ تا فرەو ئاوارەکا کەمپەکانە بازۆوە.