پەکەکە ئەرەیاوناش کە بە پاو قەرارەکەو ڕابەر ئاپۆی کە جە ٢٧و شوباتینە ئەرەیاویا نزیکو دۆخەکەی بۆوە. سەیت ئاسڵان، سەرۆکو گرڏی پارتو رەنجی هورسەنگنایش پەی پرۆسەکەی کەرد و واتش: "تاریخوو جەهانی نیشانەش مڏۆنە کە ئاشتی و دیموکراسی تەنیا بە ئەوەکۆشای بەدی مێنە و پارێزیۆنە."

سەیت ئاسڵان ئەرەیاوناش، ئەر حکومەت ئارمانجیش بۆنە، نمەتاوۆنە بییەو پرسو کوردی پەشگۆش وسۆنە و واتش: "بەهێزکەردەو دەسەڵاتداری بەرەو دلینەی جە وەراوەرو دۆخو ئیسەو وەرکەتوو دلێڕاسەینە و کاریگەرییە نەرێنییەکێش سەرو تورکیای کەردێنێ بەهانێ پەی ئی پرۆسەیە. ئێمە ئینێما جە قسە جۆراوجۆرەکا سەرۆککۆمار ئەردۆغانی و هەرپاسە سەرۆکو مەهەپەی، دۆڵەتو باغچەلی و نوویسرییەکێ راوێژکارەکا ئەردۆغانینە وینێنمێ."

دیارا سەرۆککومار ئەردۆغان و کەسێ دەوروبەریش گەرەکشانە ئی پرۆسەیە پێسەو بەشێوە جە سیاسەتەکاشا پەی درێژکەردەیۆ ماوەو دەسەڵاتداری ئەردۆغانی بەکار بارانە. بەڵام ئانێ تەنیا چا چوارچێوەنە پرۆسەکەی هورسەنگنانە، بێ ئاگێنێ جە پێگە و قورسایی پرسو کوردی و کاریگەرییەکە و پرۆسەکەی."

هەرپاسە سەیت ئاسڵان ئاماژەش پانەیە کەرد: "بە ئەوەکۆشای هێزو گەلا دیموکراتیکی، هەرپاسە ئەوەکۆشای ئانیشا ئاشتیشا گەرەکا، بەرگنۆنە کە ئی پرۆسە یاوۆنە کام ئاست."

هەرپاسە لێوەتەرۆ بڕێ هەنگامێ هەنێ کە پەنەوازا پەی ئی پرۆسەیە نریانە. سەرەتا مشۆم سیاسەتمەدارە زینان کرییەکێ، ڕژنامەنوویسا، هامسەرۆکا شارەوانی و پارێزنەرا مافو مرۆڤی ئازادێ کریانە و سیاسەتو قەیومەکا هورشنریۆوە و ئەرکو هامسەرۆکا شارەوانیچ ڕادەسو وێشا کریۆوە. بە مانێوە تەرە مشۆم ئا مافێ کە چنەشا سنریانۆ گێڵۆوە پەیشا و بەربەسەکێ وەردەمو مافو وانای بە زوانو ئەڏی لابریانە.

ئاسڵان جە دماین و قسەکاشەنە ئانەیشش ئەرەیاونا، مشۆم پەی چارەسەرو پارێزناو گەلی و دیموکراتیکو پرسو کوردی سەرو بنەماو هاموڵاتیبییەی یەکسان هەنگامە نریۆ، ئەڵبەتە ئی هەنگامێ کە باسە کریۆنە، پێسەو هەنگامێ سەرەتاییێ بانە پەی ئانەی هاندەرو هەنگامەکا ئایندەی نریانە.

هێزەکا ڕەنج و دیموکراسی مشۆم پشتیوانی جە ئاشتی بکەرا

ئاسڵان جەختش چانەیە کەردۆ کە پەنەوازا هێزەکا رەنج و ئاشتی پشتیوانی ئاشتی بکەرا و ئەرەیاوناش: "تاریخو جەهانی ئانەی نیشانە مڏۆنە کە ئاشتی و دیموکراسی تەنیا بە ئەوەکۆشای بەدەس مێ و تەنیا بە ئەوەکۆشای پارێزیۆنە. بە مانێوەتەر تەنیا قازانج کەردەو پرۆسەکەی وەسێ نییا؛ پەی ئانەی ئا ئاشتییەی کە بەدەس ئامان لاواز نەبۆ مشۆم ئەوەکۆشای بەرز کەرمێوە. دلێ ئی پرۆسەینە، ڕەنگە کەسانێ بانە کە ڕەخنە گێرانە، ئینەیچ چێوێ سروشتییا. بەڵام ئانێ وەدەمو تاریخیینە وێشا بە وەرپرسیار مزانانە مشۆم بە جدییەتۆ ئەوەکۆشایشا بەرز بکەراوە."